بايان ەسەنتاەۆا: «ودان دا ءبارىن ءوزىم ايتايىن»

  پروديۋسەر بايان ەسەنتاەۆا ماۋسىم ايىندا كۇيەۋىمەن بولعان جانجالدا سوققىعا جىعىلىپ, اۋرۋحاناعا تۇسكەلى ءبىرىنشى رەت سۇحبات بەرىپ, سول كۇنگى وقيعالار تۋرالى باياندادى. «سول بەس كۇن ومىرىمدەگى ەڭ جامان كۇندەر بولدى. 10 ماۋسىمداعى جاعداي ءالى سانامنان شىقپايدى» دەدى ول. سۇحباتتى ەسەنتاەۆا تەلەجۇرگىزۋشى دينارا ساتجانعا بەردى. «ءالى دەپرەسسيادامىن» پروديۋسەر وسى كۇنگە دەيىن ءوز-وزىنە كەلە الماي جۇرگەنىن ايتتى. «راسىن ايتقاندا, ءالى دەپرەسسيادان شىققام جوق. سەبەبى, ۇرەيدەن ارىلا الماي ءجۇرمىن. بەس قادامعا جاقىنداعان كەز كەلگەن ەر ادامنان قورقام» دەيدى بايان ەسەنتاەۆا. جانە دە مۇنداي جاعدايدا ءوز-ءوزىن ۇستاۋ قيىنعا سوعاتىنىن ايتادى. تابيعاتىمنان ەرىك-جىگەرىم كۇشتى بولعاندىقتان, بۇل قيىندىقتان شىعۋ كەرەكتىگىن تۇسىنەم دەيدى پروديۋسەر. وسى وقيعالار تۋرالى جانە قازىرگى كۇيىن بايانداۋ ەسەنتاەۆاعا وتە اۋىر ەكەنى سۇحبات كەزىندە انىق بىلىنەدى. ول بىرنەشە رەت كوزىنە كەلگەن جاستى ارەڭ توقتاتتى. ال سۇحبات ورتاسىندا كوز جاسىن ىركە المادى. «بۇل سۇحباتتى بەرمەس ەدىم. ويتكەنى, قازىر جۇرت بەت-الپەتىمنىڭ قانداي ەكەنىن كورىپ وتىر عوي. بۇل دا ماعان وتە قيىن. بىراق امال نە, باق تاراپىنان ماعان سۇمدىق شابۋىل جاسالىپ جاتىر. ونداي ارەكەتكە بارماۋدى, بولماعاندى بولعانداي ەتىپ جازباۋدى بىرنەشە رەت سۇرادىم. جازىلعانداردىڭ كوبى وتىرىك, كوبى جورامال. وسىنىڭ ءبارى مەنى ودان ءارى ازاپقا سالادى. بىراق امال جوق, وسى سۇحباتتى بەرۋگە ءماجبۇر بولدىم. ويتكەنى, مەنىڭ جەكە ءومىرىم ادامار ءۇشىن تەاترعا اينالىپ كەتتى. سوندىقتان ويدان شىعارىلعان اڭگىمەلەرگە توسقاۋىل قويۋ ءۇشىن ءبارىن ءوزىم ايتۋدى شەشتىم» دەگەن بايان ەسەنتاەۆا بۇدان ءارى قاراي سول كۇنى بولعان وقيعانى بايانداپ بەردى. سەميادا ۇرىس 5 ماۋسىم كۇنى باستالعان. كۇيەۋىنىڭ قوقان-لوقىسىنان قورىققان پروديۋسەر ۇيىنە بەس كۇن كەشىگىپ 10-ى كۇنى قايتقان. سول كۇنى ول كەلە جاتقان تاكسي سۆەتوفوردا توقتاپ تۇرعاندا ماشيناعا كوزدى اشىپ-جۇمعانشا كۇيەۋى كىرىپ كەلگەن. سوسىن قولىندا پىشاعىن ايەلىنە سۇعىپ العان. بايان بۇل ساتتە ەش اۋرۋدى سەزبەگەنىن تەك, كوزىنەن جۇدىرىقپەن ۇرعاندا عانا اۋرۋدى سەزگەنىن ايتادى. ودان كەيىن كۇيەۋى ونى باسقا ماشيناعا كىرگىزىپ, ەكى ساعات بويى ۇرىپ-سوققان. «بارلىق جەرىمنەن قان اقتى. ەرنىم ءبولىنىپ كەتتى, ءتىسىمدى ءتۇسىردى, بەتىمدى ءتىلدى, مۇرنىمدى سىندىردى. بالالاردى ويلاسايشى دەگەن ءسوزىم ءۇشىن تاعى ءبىر سوققى الدىم. سودان بەرى ءۇش اي وتسە دە سول جاعىمنىڭ ەتى سەمىپ قالعان, ەكىنشى دەڭگەيدە كونتۋزيا الدىم, سول جاق كوزىم كورمەيدى» دەيدى بايان. راسىندا سۇحباتتا پروديۋسەردىڭ سول جاق كوزى تولىق جۇمىلمايتىنى كورىنەدى. ەسەنتاەۆا بۇدان بىلاي ايەلدەر قۇقىن قورعاۋمەن اينالىسقىسى كەلەدى بايان ەسەنتاەۆا سۇحبات بويى بىردە-ءبىر رەت بۇرىنعى كۇيەۋىن اتىمەن اتاعان جوق. تەك «ول» دەپ سويلەدى. «جاقسى اكە, جاقسى كۇيەۋ بولدى, مەنى شاماسىنا قاراي جاقسى كوردى. بىراق مەن جاقسى كوردىم بە, ماسەلە سوندا. ەشكىمگە بىلدىرگىم, شاعىمدانعىم كەلمەدى. ودان نە وزگەرەدى؟ بىرنەشە جىل بويى اجىراسۋدى ءوتىندىم. بىراق ول كونبەدى. اجىراسساڭ ولتىرەم دەپ قورقىتاتىن. سوڭعى بىرنەشە جىل ءومىرىم ۇرەيمەن, ازاپپەن ءوتتى. ەندى وسىنىڭ ءبارىن بۇكىل ەلگە جايىپ سالىپ وتىرمىن. سەبەبى, قانشاما ايەل وسىلاي ءومىر ءسۇرىپ جاتىر. ۇرەيمەن, زاڭدى بىلمەي ءومىر سۇرۋدە. ايتەۋىر بىرەۋى ايتۋى كەرەك قوي مۇنى» دەدى بەلگىلى پروديۋسەر. ول ەندى تۇرمىستىق زورلىق-زومبىلىقتان زارداپ شەككەن ايەلدەردىڭ قۇقىن قورعايتىن قوعامدىق ۇيىم قۇرماق ەكەنىن ءمالىم ەتتى. وسىنداي جاعدايعا ۇشىراعالى بەرى وزىنە بىردە-ءبىر ايەلدەر ۇيىمى حابارلاسپاعانىن, كومەك ۇسىنباعانىن ايتتى. «سوندىقتان ايەلدەر ماسەلەسىمەن اينالىساتىن ءبىر ۇيىم كەرەك دەپ ويلادىم. ويتكەنى, ايەلگە قول جۇمسايتىن ەركەكتەر زاڭ بويىنشا جازالانادى. ايەلدەر مۇنى بىلمەيدى. مۇمكىن, ولاردىڭ پروبلەماسىنا نازار اۋدارۋ ءۇشىن مەنىڭ وسىنداي جاعدايعا ۇشىراۋىم كەرەك بولعان شىعار» دەدى بايان ەسەنتاەۆا.