جۇمىسىن جەلى ارقىلى جانداندىرعان

ەلىمىزدە ۇلتتىق ناقىشتا ويۋ-ورنەك توقىپ, قازاقتىڭ ءتول تۋىندىسىن ناسيحاتتاپ وتىرعان توپتار بار. ون ساۋساعىنان ونەرى تامعان سونداي قولونەر شەبەرلەرى قاتارىندا مۇمكىندىگى شەكتەۋلى ازاماتتار دا كەزدەسەدى. تاعدىردىڭ تەپەرىشىنە قارسى تۇرعان, سونداي شەبەرلەردىڭ ءبىرى – جەڭىسكۇل داۋلەتوۆا بۇگىندە الەۋمەتتىك جەلى ارقىلى تاپسىرىس قابىلداپ, جۇمىس جاساۋدى جۇزەگە اسىرىپ كەلەدى. بۇدان جەتى جىل بۇرىن اپاتقا ۇشىراپ, توسەك تارتىپ جاتقاندا, اجەسى قولىنا ينە-ءجىپ ۇستاتىپ, تىگىنشىلىككە باۋلىعان ەكەن. العاشىندا اۋەستىكپەن باستالعان تىگىنشىلىك ونەرى قازىر تابىس كوزىنە اينالدى. بۇگىندە ول ءوز بىلگەنىن وزگەگە ۇيرەتىپ, جاستاردى ونەرگە باۋلۋدا. جەڭىسكۇلدىڭ فەيسبۋك پاراقشاسى ارقىلى الىس-جاقىن شەتەلدەردەن دە تاپسىرىس تۇسەدى ەكەن. كوزدىڭ جاۋىن الاتىن ءتۇرلى بۇيىمدارعا دەگەن سۇرانىس كۇن سايىن ارتۋدا. «اسىرەسە, شەتەلدىكتەر ءبىزدىڭ قوشقار مۇيىزبەن جاسالعان تۇسكيىز, جاستىق سياقتى  بۇيىمدارىمىزعا تاپسىرىس بەرەدى», – دەيدى ول. بيىلعى جىلى شەبەر قازاقى قول ونەردىڭ بارلىق تۇرلەرىن, اسىرەسە, سۇرانىسقا يە قىز جاساۋىن جاساۋدى, ادەمى ناقىشتاعى ويۋ-ورنەكتى  كيىمدەر تىگۋدى قولعا الماقشى. – قارجى بولسا, قالا ورتالى­عىنان ءسان ءۇيىن اشىپ, جاستاردىڭ  ءتول ونەرىمىزگە  كەلۋىنە ءوز ۇلە­سىم­دى قوسقىم كەلەدى, – دەيدى جەڭىس­كۇل. ۇلتتىق بوياۋى قانىق وتان­دىق ءونىم­دەرىمىز شەتەلدىكتەر سۇرا­نىسىن قاناعاتتاندىرىپ, وزىق تانىلىپ جاتسا, قانەكي! ايمان مۇقىشەۆا