ەرتەڭ, ياعني 23 تامىز كۇنى اباي قۇنانباي ۇلىنىڭ تۋعان كۇنى. وسىعان بايلانىستى ۇلى اقىننىڭ تۋعان كۇنىنە وراي اباي قورىق-مۋزەيىندە وسى زەردە ورداسىندا جيناقتالعان تۋىندىلار نەگىزىندە «شىڭعىستاۋ» سۋرەت گالەرەياسى اشىلدى.
شىڭعىستاۋ – قازاق حالقىنىڭ ۇلى پەرزەنتتەرى اباي قۇنانباي ۇلىنىڭ, شاكارىم قۇدايبەردى ۇلىنىڭ, مۇحتار اۋەزوۆتىڭ تۋعان مەكەنى. ەۆرازيانىڭ كىندىك تۇسىندا جاتقان شىڭعىستاۋ جەرىندە ءۇش الىپتىڭ دۇنيەگە كەلىپ, ءسوز ونەرىن اسەمدىك بيىگىنە كوتەرۋى – ادامزات تاريحىندا سيرەك كەزدەسەتىن قۇبىلىس.
قاسيەتتى شىڭعىستاۋ ءوڭىرىنىڭ تابيعاتى مەن تاريحي جەرلەرى اباي قورىق-مۇراجايى قورىندا جيناقتالعان جەرگىلىكتى قىلقالام شەبەرلەرىنىڭ تۋىندىلارى ارقىلى كورسەتىلەدى. سۋرەت-گالەرەياسىندا بەلگىلى ونەر يەلەرى م.الياكپاروۆ, م.بەلياەۆ, ع.ماكاروۆ, ن.وتەپباەۆ ت.بايعاليەۆ, ت.تاتيەۆ جانە تاعى باسقا سۋرەتشىلەردىڭ 100-دەن استام تۋىندىلارى قويىلعان.
اباي مۋزەيىنە كەلۋشىلەردىڭ, اسىرەسە حالقىمىزدىڭ سۋرەت ونەرىندەگى ماقتانىشى ءابىلحان قاستەەۆتىڭ جاۋھار تۋىندىلارى ەرەكشە قىزۋشىلىعىن تۋدىرادى دەپ سەنەمىز. ايگىلى قىلقالام شەبەرىنىڭ مۋزەي قورىندا 12 تۋىندىسى ساقتالعان بولسا, سونىڭ ءبىرى – «جاس اباي» سۋرەتى دە كەلۋشىلەردىڭ كوزايىمىنا اينالادى.
ابايدىڭ «جيدەباي-ءبورىلى» مەملەكەتتىك قورىق-مۇراجايىنىڭ ءباسپاسوز قىزمەتى
سۋرەت گالەرەياسىنىڭ ءبىر ەرەكشەلىگى – قىلقالام شەبەرلەرىنىڭ تۋىندىلارى مۋزەيدەگى اباي ءومىرى مەن شىعارماشىلىعىن پاش ەتەتىن بولىمدەردىڭ مازمۇنىن تەرەڭىرەك اشا تۇسۋگە كومەكتەسەدى. ماسەلەن, «جاز» زالىنىڭ ماڭداي الدىنداعى قىلقالام شەبەرلەرىنىڭ تۋىندىلارى شىڭعىستاۋ ءوڭىرىنىڭ تابيعاتىن الدىڭىزعا جايىپ سالىپ, «ءۇش قاينار بۇلاق» ەكسپوزيتسياسىنداعى سۋرەتتەر ۇلى اقىن شىعارمالارىنىڭ تەرەڭ تامىرلارىمەن ۇندەسىپ كەتەتىندەي.
داستان كەنجالين
فوتو: جيدەباي-ءبورىلى» مەملەكەتتىك قورىق-مۇراجايى
