«ماراكانادا» وليمپيادا الاۋى جانىپ تۇر

ريو – 2016 وليمپياداسىنىڭ اشىلۋ سالتاناتى اتاقتى «ماراكانا » ستاديونىندا ءوتتى. برازيليا قازىر ەكونوميكالىق قيىندىقتاردى باسىنان وتكەرىپ جاتقانىمەن جۇمىر جەردەگى ەڭ ۇلى سپورتشىلاردىڭ بىرەگەيى پەلەنى بەرگەن مەملەكەت. سوندىقتان دا قۇرمەت جوعارى بولا بەرمەك. « ماراكانا » پەلە سياقتى سايىپقىرانداردىڭ ماڭداي تەرى توگىلگەن قاسيەتتى ستاديون بولعاندىقتان دا ۇلى ءدۇبىردى تاماشالاۋشىلاردىڭ قاتارى كوپ بولعاندىعى انىق. جالپى, وسى سالتاناتتى شارانى وتكىزۋگە 21 ملن. دوللار جۇمسالدى دەپ حابارلاندى رەسمي دەرەكتە. بەيجىڭ وليمپياداسىنىڭ الاۋىن قابىلداپ العان اعىلشىندار لوندوندا قىتايلىقتار سەكىلدى شاشىلمايتىندىقتارىن ايتقان بولاتىن. ولاردىڭ لوندون وليمپياداسى ويىندارىنا سالعان قارجىسى ريودان ەكى ەسە كوپ بولعانىن ەسكەرسەك, بۇل سپورت سالتاناتىنىڭ قورجىنىنىڭ ءبۇيىرى سولىڭقى ەكەندىگى ءبىلىنىپ قالادى. ەرىنبەگەندەردىڭ ءبارى برازيليانى جەردەن الىپ جەرگە سالىپ جاتقاندىقتان ارزانقولداۋ وتكەن سپورت مەرەكەسى جايىندا وسى جەردەن توقتاۋدى ءجون كوردىك. ريو وليمپياداسىنىڭ ەللادا ەلىنەن جەتكىزىلگەن الاۋىن برازيليانىڭ ەڭ تاڭداۋلى سپورتشىلارى قولدان قولعا وتكىزدى. ال, الاۋدى تۇتاتۋ قۇرمەتى مارافونشى ۆاندەرلەي كوردەيرۋ دي ليماعا كورسەتىلدى. وليمپيادا ويىندارىنىڭ ءانۇرانىن بالالار حورى ورىندادى. برازيلياداعى وليمپيادا-2016 ويىندارىنىڭ ۇيىمداستىرۋ كوميتەتىنىڭ توراعاسى كارلوس نۋزمان جاعدايمەن حاباردار ەتكەننەن كەيىن حوك پرەزيدەنتى توماس باح ءسوز الىپ, دۇنيە جۇزىنەن كەلگەن بارشا قاۋىمدى ۇلى مەرەكەمەن قۇتتىقتادى. توماس باح ءوز سوزىندە ءبىرىنشى رەت وليمپيادا قوزعالىسىنا سىڭىرگەن قايراتكەرلەر ءۇشىن وليمپيادا وردەنى بەكىتىلگەندىگىن ايتتى. ەڭ ءبىرىنشى وردەن ەكى دۇركىن وليمپيادا ويىندارىنىڭ جەڭىمپازى كەنيالىق جەلاياق كيپچەگە كەينوعا تابىس ەتىلدى. وليمپيادا ويىندارىنىڭ شەرۋىنە 207 مەملەكەت سپورتشىلارىمەن قاتىسسا, قازاقستان 40-ى بولىپ ءوتتى. ەلىمىزدىڭ تۋى تاەكۆونداشى رۋسلان جاپاروۆتىڭ قولىندا جەلبىرەگەن. «ماراكاناداعى» سالتاناتتا برازيليانىڭ پرەزيدەنتى مىندەتىن ۋاقىتشا اتقارۋشى ميشەل تيمەر ريو-2016 وليمپياداسىنىڭ رەسمي اشىلعانىن حابارلاعاناننان كەيىن تۇنگى اسپاندى كۇندىزگىدەي جارقىراتىپ جىبەرگەن وتشاشۋعا كەزەك جەتتى. وليمپيادا شەرۋىندە بوسقىن سپورشىلاردان قۇرالعان توپ وتكەندە بۇۇ-ى پرەزيدەنتى پان گە مۋن مەن حوك پرەزيدەنتى توماس باح ورىندارىنان تۇرىپ قۇرمەت كورسەتتى. سپورت – دوستىقتىڭ, بەيبىتشىلىكتىڭ مەرەكەسى. سپورتتا شەكارا بولمايدى. «ماراكانادا» وتكەن شەرۋدىڭ سوڭى الەمنىڭ بارشا تۇكپىرىنەن كەلگەن سپورت جانكۇيەرلەرىنىڭ دە ورتاق, ءبىر – ءبىرىن ءتىلسىز تۇسىنىسكەن مەرەكەسىنە اينالدى. كوڭىلدە ءبىر عانا تۇيتكىل قالعان. الەمدىك تاماشادان ءبىر ادامدى كورە المادىق. ول – پەلە. كەلەمىن دەپتى. الاۋىن تۇتاتامىن دەپتى. كەلمەدى, كەلە المادى. لوندوندا مارقۇم ۇلى بوكسشى مۇحاممەد ءاليدى كورىپ ەدىك. قول اربامەن كەلىپ قۇتتىقتاۋىن ايتىپ كەتكەن. پاركينسون سىرقاتىنان ءتىلى تۇتقىرلانىپ تۇرسا دا جەتكەن ەدى. پەلە وكپەلەسە ۋاقىتشا ۇكىمەتكە وكپەلەگەن شىعار. ونى الىستان كورسە دە كوڭىلىنە مەدەۋ سانايتىن, جاس بالاشا قۋانىپ قايتاتىن, مۇنداعى كەلەڭسىزدىكتەردى ءبىر پەلە ءۇشىن عانا ۇمىتاتىن جانكۇيەرلەردىڭ جازىعى قانشا؟, دەپ ويلادىق. قايران, پەلە كوكەم – اي. بىراق, سپورت تويىنان جۇرت قۇر اتتاي جايتاڭداپ, كوڭىلدى قايتتى. الدا 2016-جىل تامىز ايىنىڭ تەڭدەسسىز كۇندەرى ەسىگىن ايقارا اشىپ تۇر. باقتيار تايجان – ريو-دە-جانەيرودان.