ريو-2016: قورجىندا 1 كۇمىس, 1 قولا مەدال بار

وتكەن جىلدان بەرى قازاقستان قۇراماسى ساپىندا ونەر كورسەتىپ كەلە جاتقان, قازىر وڭتۇستىك قازاقستان وبلىسى اتىنان سىنعا ءتۇسىپ جۇرگەن موڭعول دزيۋدوشى قىزى وتگونتسەتسەگ گالبادراح اقجولتاي سپورتشى بولىپ كەزىكتى. ونىڭ وليمپيادادا رەسپۋبليكا اتىنان ءبىرىنشى بولىپ العان قولا مەدالى ارتىنشا ەلدوس سمەتوۆتىڭ كۇشىمەن كۇمىس مەدالمەن تولىقتى. تامىزدىڭ 6-سى كۇنى ريو-دە-جانەيرودا ءوتىپ جاتقان وليمپيالىق ويىنداردا دزيۋدوشى قىزدار ءتۋرنيرىنىڭ 48 كيلوعا دەيىنگى باسەكەسى ءبىرىنشى بولىپ اياقتالىپ, العاشقى جۇلدە يەسىن تانىتتى. وندا وتگونتسەتسەگ گالبادراح قازاقستان قۇراماسىنا العاشقى مەدالدى الىپ بەرىپ, قولا جۇلدەگەر اتاندى. ءبىزدىڭ دزيۋدوشى قىز ءۇشىنشى ورىن ءۇشىن تالاستا كۋبالىق دايارەس مەسترە الۆارەستى يپپونمەن ۇتتى. ونىمەن بىرگە جاپون امي كوندو قولا جۇلدەگە قول جەتكىزدى. ال وليمپيادا چەمپيونى اتاعىن ارگەنتينالىق پاۋلا پارەتو جەڭىپ الدى. ول فينالدىق ايقاستا كورەيالىق چجەون بوك يۋندى «ۆيزاري» ادىسىمەن لاقتىرىپ, جەڭىسكە جەتتى. بۇدان كەيىن ءبىزدىڭ الەم چەمپيونى اتاعى بار دزيۋدوشىمىز ەلدوس سمەتوۆ فينالدا رەسەيلىك بەسلان مۋدرونوۆتان ۇتىلىپ, كۇمىس مەدالدى قاناعات تۇتتى. ءۇشىنشى ورىنعا جاپون ناويسا تاكاتو مەن وزبەك ديوربەك ۋروزباەۆ ورنالاستى. دامير قوجامقۇل تەحنيكالىق ناتيجەلەر دزيۋدو. ەرلەر. 60 كگ. 1. بەسلان مۋدرانوۆ (رەسەي). 2. ەلدوس سمەتوۆ (قازاقستان). 3. ناويسا تاكاتو (ياپونيا), ديوربەك ۋروزبوەۆ (وزبەكستان). ايەلدەر. 48 كگ. 1. پاۋلا پارەتو (ارگەنتينا). 2. چجەون بوك يۋن (كورەيا). 3. امي كوندو (جاپونيا), وتگونتسەتسەگ گالبادراح (قازاقستان).