ىستانبۇلدىڭ ىقىلاسىنا بولەندى

قازاق ۇلتتىق بالەت ونەرى باعىنا جۇلدىزداي جارقىراپ تۋعان جەڭىمپاز بالامىزدىڭ اتى-ءجونى – باقتيار ادامجان. جاقىندا «استانا وپەرا» مەملەكەتتىك وپەرا جانە بالەت تەاترىنىڭ جەتەكشى ءسوليسى تۇركيانىڭ ىستانبۇل قالاسىندا وتكەن بالەت ارتىستەرىنىڭ V حالىقارالىق بايقاۋىندا باس جۇلدەنى قانجىعاسىنا بايلادى. قازاقستان, رەسەي, اۆستراليا, برازيليا, بولگاريا, جاپونيا, كانادا, وڭتۇستىك افريكا, وڭتۇستىك كورەيا جانە باسقا دا بىرقاتار ەلدەردەن ىرىكتەلگەن قاتىسۋشىلار سيۋرەي وپەرالىق تەاترىندا (قادىكەي اۋدانى, ىستانبۇل قالاسى) باس قوسقان بولاتىن. ءۇش كەزەڭ بويىنشا ءوت­كىزىلگەن ونەر سىنى 13 شىلدەگە دەيىن جالعاستى. وعان جاستارى 15 پەن 26 ارالىعىنداعى جاستار قاتىستى. سالتاناتتى گالا-كونتسەرتتە باقتيار ادامجان مەن اقتىق سايىسقا جولداما العان جەڭىمپاز جاستار كونكۋرس رەپەرتۋارىنان ۇزدىك نومىرلەر ۇسىندى. بەرلين مەملەكەتتىك بالەتىنىڭ كوركەمدىك جەتەكشىسى, «توكيو-بالەتتىڭ» شىعارماشىلىق ءجونىن­دەگى كەڭەسشىسى ۆلاديمير مالاحوۆ توراعالىق ەتكەن قازىلار القاسى قۇرامىندا ر.نۋرەەۆ اتىنداعى بالەت ارتىستەرىنىڭ حالىقارالىق كون­كۋرسىنىڭ ديرەكتورى ر.بوكور, سكوپە (ماكەدونيا) بي تەاترى جانە بي فەستيۆالىنىڭ ديرەكتورى ر.ريسيمكين, «Dance for You» جۋرنالىنىڭ رەداكتورى م.ۆيەرۋ, قازاقستاننىڭ حالىق ءارتىسى گ.تۇتقىباەۆا, بوستون بالەتىنىڭ كوركەمدىك جەتەكشىسى م.نيسسينەن, گوللانديالىق بي فەستيۆالىنىڭ كوركەمدىك جەتەك­شىسى, روتتەردامداعى ونەر ۋني­­ۆەرسيتەتىنىڭ «كودارتس» بي اكا­دە­ميا­سىنىڭ اتقارۋ كەڭەسىنىڭ ءمۇ­شەسى س.ۆيۋرستەن جانە باسقالار بار. جەتەكشى سوليست ىستانبۇلدىق ساحنادا ل.مينكۋستىڭ «دون كيحوت», «بايادەركا», ب.اسافەۆتىڭ «پاريج جالىنى», تس.ءپۋنيدىڭ «ەسمەرالدا» كلاسسيكالىق بالەتتەرىنەن ۆارياتسيالار ورىندادى. مۇنىمەن قاتار, باقتيار ارنايى ەكى زاماناۋي ءنومىر – قازاقستاندىق حورەوگراف سيازبەك ۋاليبەكوۆتىڭ «مەنىڭ بولىگىم» (Part of me) جانە يسيان چجاننىڭ (بەيجىڭ ق., قىتاي) «ويانۋ» (In the wake) تۋىندىسىن ۇسىندى. باقتيار ادامجاننىڭ بيلەگە­نىن العاش كورگەن بەلگىلى بەيجىڭدىك حورەوگراف يسيان چجان, ءارتىستىڭ بولاشاعى زور جانە دە قاي جاعىنان بولسىن جوعارى ماراپاتقا لايىق ەكەنىن اتاپ ءوتتى. – ءنومىردىڭ الدىندا باقتيار­دىڭ ءستيلى مەن تەحنيكاسىن انىقتاۋ ماقساتىندا بيلەپ بەرۋىن ءوتىندىم. ءسوليستىڭ دايىندىعى كوڭىل كون­شىتەدى, ول ءبارىن جىلدام ءارى لەزدە قاعىپ الادى, سولاي بولا تۇرا الداعى ۋاقىتتا ءالى كوپ نارسەنى ۇيرەنۋى مۇمكىن. ونىمەن بىرىگىپ جۇمىس ىستەي باستاعان العاشقى ساتتەن-اق وزگەرىستى بايقادىم – وسى قىسقا ۋاقىت ىشىندە ءارتىس ءوزى ءۇشىن جاڭا ءستيلدى مەڭگەرىپ, اي­تار­لىقتاي بيىككە كوتەرىلدى. مەن ونىڭ شەبەرلىگى مەن العان ءبىلىمىن پاش ەتۋگە تىرىستىم, – دەيدى يسيان چجان. ءوز كەزەگىندە باقتيار ادامجان دايىندىقتىڭ العاشقى مەزەتىندە-اق جەڭىسكە جەتۋگە تالپىنعانىن ايتتى. – ىستانبۇلداعى كونكۋرسقا الەم­نىڭ ءار وڭىرىنەن ۇزدىك بيشىلەر كەلدى, سول سەبەپتى ءبىز ءبىر-بىرىمىزدەن مولىنان تاجىريبە الماسۋعا تى­رىستىق. تۇرىك كورەرمەنى مەنىڭ ونەرىمدى ىستىق ىقىلاسپەن قارسى الدى. زاماناۋي حورەو­گرافيادان كەيىن كلاسسيكالىق بيگە «اۋىسۋ» وڭاي بولعان جوق. شىنىن ايت­قاندا, بويىمدى تىلسىم ءبىر كۇش بي­لەپ الدى. جاقىندا ۇلىم دۇنيەگە كەلگەن بولاتىن. پەرزەنتىمنىڭ قۋانىشىنان  اسەرلەنىپ, قۇسشا شارىقتاعان شىعارمىن. جەڭىس ادامعا بۇرىنعىدان دا زور جاۋاپ­كەرشىلىك جۇكتەيدى. ەندەشە, الدىمدا مۇنان دا بيىك اسقارالى اسۋلار تۇر, – دەدى جۋرناليستەرمەن وي بولىسكەن باقتيار ادامجان. تاعى ءبىر ايتا كەتەتىن جايت, كونكۋرستىق باعدارلامانىڭ ءتورت كلاسسيكالىق ۆارياتسياسىن دايىنداۋمەن «استانا وپەرا» بالەت­تىك ترۋپپاسىنىڭ كوركەمدىك جە­تەكشىسى, رەسەيدىڭ حالىق ءارتىسى التىناي اسىلمۇراتوۆا مەن پەداگوگ-رەپەتيتور, رەسەيدىڭ ەڭبەك سىڭىرگەن ءارتىسى كونستانتين زاك­لينسكي اينالىستى. «ارتىستەر ءۇشىن حالىقارالىق كونكۋرستاردىڭ ورنى قاشاندا ماڭىزدى سانالادى, سەبەبى, دايىندىق پەن دوداعا قاتىسۋ ونەردىڭ ءورىسىن وسىرەدى, دامىتادى, بۇل, ءتىپتى, توزىمدىلىكتى تەك­سەرۋمەن تەڭ. جالپى, مۇندا كون­كۋرسقا ارنالعان جانە كون­كۋرسقا ارنالماعان ءارتىس دەيتىن ۇعىمدار بار, ويتكەنى, مۇنداي اۋىرتپالىقتى كوتەرىپ شىعاتىن جاندار نەكەن-ساياق. بالەتتىڭ كوپ جاعدايدا سپورتپەن ۇقساس بولۋى سودان. بالەت سىنى ۇزدىكسىز دايىندىقتى تالاپ ەتەدى. سول سەبەپتى جاستىق شاقتا ولارعا ءتۇرلى ونەر بايگەلەرىندە باقتارىن سىناۋعا تۋرا كەلىپ جاتادى. مىنە, سونداي حالىقارالىق دودادا باقتيار ادامجان ءبىزدىڭ ۇلكەن بالەتتىك اۋلەتىمىزدى جەرگە قا­رات­قان جوق, لايىقتى دەڭگەيدە ونەر كورسەتتى» – دەپ التىناي اسىلمۇراتوۆا ساپار تۋرالى اڭگىمەسىن تۇيىندەدى.  قارشىعا كۇلەن