گاز ءليميتىن ارتتىرۋ كوزدەلۋدە

  وبلىستىق ەنەرگەتيكا, تۇرعىن ءۇي جانە كوممۋنالدىق شارۋاشىلىعى باسقارماسى باسشىسىنىڭ مىندەتىن اتقارۋشى امانتاي بەكنيازوۆتىڭ ايتۋىنشا, ەنەرگەتيكا مينيسترلىگى وڭىرگە ورتا ەسەپپەن ايىنا 4 000 توننا گاز بولەدى. جاز مەزگىلىندە گازعا سۇرانىستىڭ ارتۋىنا بايلانىستى باسقارما ەنەرگەتيكا مينيسترلىگىنە ليميت مولشەرىن ارتتىرۋ تۋرالى ۇسىنىسپەن شىعۋدى ۇيعارىپ وتىر. پايدالانىلاتىن سۇيىتىل­عان گازدىڭ كولەمىن دۇرىس انىقتاۋ ماق­­ساتىندا 2016 جىلدىڭ باسىندا وبلىس اكىمدىگىندە جۇمىس توبى قۇ­رىلىپ, ونىڭ قۇرامىنا ەنەرگەتيكا, تۇرعىن ءۇي-كوممۋنالدىق شا­رۋاشىلىعى, كاسىپكەرلىك باسقار­مالارى مەن تابيعي مونوپوليالاردى رەتتەۋ اگەنتتىگى دەپارتامەنتىنىڭ ماماندارى كىردى. ەكى اي كولەمىندە ولار بارلىق گاز قۇيۋ بەكەتتەرىندە اپتا سايىن ەسەپ جۇرگىزىپ كەلدى. وبلىستا بارلىعى 60 اۆتوگاز قۇيۋ بەكەتى جۇمىس ىستەيدى, ونىڭ 33-ءى اقتوبەدە, 27-ءسى اۋدانداردا ورنالاسقان. ءبىر گاز قۇيۋ بەكەتى كۇنىنە ورتا ەسەپپەن 7-8 توننا گاز قۇيادى, ال اۋداندارداعى ورتاشا كورسەتكىش 3 توننانى قۇرايدى. – نەگىزى وبلىستا تۇتىنىلاتىن گاز كولەمى 5486 توننا, ونىڭ 3638 تونناسى وبلىس ورتالىعىندا, 1848 تونناسى اۋدان ورتالىقتارىندا تۇتىنىلادى. جول پوليتسياسى باسقارماسىنىڭ ءما­لىمەتتەرىنە سۇيەنسەك, وبلىستا 206 938 اۆتوكولىك بار, ونىڭ 23 697-ءسى گازدى پايدالانادى. بۇل كورسەتكىش اي سايىن 150-200 بىرلىككە ارتىپ كەلەدى. وبلىس اكىمىنىڭ تاپسىرماسىمەن 850 ۆەدومستۆولىق كولىك گازدى پاي­دالانادى, – دەپ اتاپ ءوتتى امانتاي بەكنيازوۆ. ماۋسىم ايىندا وبلىسقا 4000 توننا گاز جەتكىزىلدى, شىلدە ايىندا 4200 توننا وتىن اكەلىنەدى دەپ كۇ­تىلۋدە. ونىڭ 3300 تونناسىن «سنپس-اقتوبەمۇنايگاز», قالعان 870 تونناسىن «قازاقويل اقتوبە» جشس وندىرگەن. ايتا كەتەيىك, «سنپس-اقتوبە­مۇ­نايناز» كومپانياسى اي سايىن 28 000 توننا, «قازاقويل اقتوبە» 3000 توننا گاز وندىرەدى. وتىن استانا قالاسى, اقمولا, قوستاناي, قاراعاندى, سولتۇستىك قازاقستان, باتىس قازاقستان, اتىراۋ وبلىستارىنا جەتكىزىلەدى. ساتىبالدى ءساۋىرباي,  «ەگەمەن قازاقستان»  اقتوبە وبلىسى