قازاقستان-كورەيا قاتىناسى نىعايا تۇسۋدە

الماتىداعى دوستىق ۇيىندە ۇزاق مەرزىمدى ەكونوميكالىق-مادەني بايلانىس­تاردى ناقتىلاي ءتۇسۋ ماقساتىندا قازاقستان-كورەيا ىنتىماقتاستىق فورۋمى بولىپ ءوتتى.   فورۋمعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭ­گەرۋشىسى ەرالى توعجانوۆ, كورەيا رەسپۋب­لي­كا­سىنىڭ الماتى قالاسىنداعى باس كونسۋلى دجون سىن مين, «KOTRA» ساۋدا جانە ينۆەستيتسيالار جونىندەگى اگەنتتىكتىڭ ديرەكتورى دجونگ ۋە يونگ, «Caspian group» اق باسقارماسىنىڭ ءتور­اعاسى يۋري تسحاي, «مەملەكەت-جەكەمەنشىك سەرىكتەستىگىنىڭ قازاقستاندىق ورتالىعى» اق باسقارما توراعاسىنىڭ ورىنباسارى عا­­­لىمبەك مامراەۆ, «KAZNEX INVEST» الماتى وكىلدىگىنىڭ ديرەكتورى ءسابيت نارباەۆ, «اتامەكەن» ۇلتتىق كاسىپكەرلەر پالاتاسى ال­ماتى قالالىق بولىمشەسى ديرەكتورىنىڭ ورىنباسارى تيمۋر حاكيموۆ قاتىستى. سونداي-اق, ەكىجاقتى ءتيىمدى قاتىناستار تەرەڭ قوزعالعان جيىندا پارلامەنت ءماجى­لىسىنىڭ دەپۋتاتتارى, قازاقستان حالقى اس­سام­بلەياسىنىڭ مۇشەلەرى, رەسپۋبليكالىق ەتنومادەني بىرلەستىكتەردىڭ باسشىلارى, وتاندىق كاسىپكەرلەر مەن وڭتۇستىك كورەيادان, رەسەي, قىرعىزستان, وزبەكستاننان كەلگەن شەتەلدىك كاسىپكەرلەر ءوزارا تاجىريبە الماسىپ, الداعى ۋاقىتتا تىعىز بايلانىستار ورناتۋعا مامىلە جاسادى. – قازاقستان مەن وڭتۇستىك كورەيانىڭ ەكو­نوميكالىق-مادەني قاتىناسى ەگەمەندىك العان كەزدەن باستاپ جاقسى جولعا قويىلعانى ءمالىم. ەل ىرگەسى بەكىپ, مەملەكەت ءوزىنىڭ دامۋ جولىنا تۇسكەن كەزەڭدە وڭتۇستىككورەيالىق ارىپتەستەرىمىز ەل ەكونوميكاسىنا ەلەۋلى ينۆەس­تيتسيا سالىپ, ەكىجاقتى قاتىناستىڭ ىلگەرى باسۋىنا زور ىقپال ەتتى. ەندى, قازاقستان ءۇشىن اسا ۇلكەن ماڭىزعا يە ەكسپو-2017 حالىقارالىق كورمەسى اياسىندا دا وسى بايلانىسىمىزدى جاڭا بەلەسكە كوتەرەمىز دەپ سەنەمىز, – دەدى قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ. فورۋم قازاقستاندىق جانە وڭتۇستىك­كو­رەيالىق بيزنەسمەندەر, باسقا ەلدەردەن كەلگەن سەرىكتەستەر ءۇشىن ينۆەستيتسيالار تارتۋ, قولايلى بيزنەس-ورتا قۇرۋ, اكىمشىلىك كەدەر­گىلەردى جويۋ جانە باسقا دا ماڭىزدى ماسەلەلەر تالقىلانعان ديالوگ الاڭى بولا ءبىلدى. ىنتىماقتاستىق جۇزدەسۋلەر اياسىندا قازاقستان كورەيلەرى قاۋىمداستىعى مەن كورەيا رەسپۋبليكاسىنىڭ ءوزارا ءىس-قيمىل جاساۋى مىسالىندا, ەتنومادەني بىرلەستىكتەردىڭ قازاقستان مەن ەتنوستاردىڭ تاريحي وتانى بولىپ تابىلاتىن ەلدەر اراسىنداعى حالىقتىق ديپلوماتيا تەتىگى رەتىندەگى ءرولى قارالدى.  قانات ەسكەندىر, «ەگەمەن قازاقستان» الماتى