اۋە كومپانياسىنىڭ جاڭا مۇمكىندىكتەرى

ۆەتنامنىڭ باستى ىسكەرلىك ورتالىعى سانالاتىن حوشيمين قالاسىندا «ەير استانا» اق وكىلدىگى قازاقستان رەس­پۋبليكاسىنىڭ ۆەتنامداعى ەلشى­لىگىنىڭ قولداۋىمەن شاھارداعى جەتەك­شى تۋريستىك كومپانيالار مەن اۆيا­گەنتتىكتەر ءۇشىن «قازاقستاندا توقتاۋ جاسا – ءار باعىتىڭا ءىز قالدىر» دەگەن تاقىرىپپەن سەمينار وتكىزدى. سەمينار ەلوردادا وتەتىن ەكسپو-2017 حالىقارالىق كورمەسىنىڭ قارساڭىندا وسى ايتۋلى شاراعا ورايلاس ۇيىمداستىرىلدى. جيىننىڭ بەتاشارىندا «ەير استانا» اق-تىڭ قيىر شىعىس جانە اۆستراليا بو­يىنشا وڭىرلىك باس مەنەدجەرى دحانۆانتري گۋنەتيلەكە ءسوز سويلەپ, «حوشيمين-استانا» اۋە باعىتىنىڭ مۇمكىندىكتەرى ارتىپ كەلە جاتقانىن, سول ارقىلى ۆەتنامنان قازاقستانعا, قازاقستان ارقىلى تمد مەن ەۋروپا ەلدەرىنە تۋريستەردىڭ قاتىناۋى جىل ساناپ كوبەيىپ كەلە جاتقانىن ايتتى. كومپانيانىڭ وڭىرلىك وكىلى «ەير استانانىڭ» الماتى مەن استاناداعى حابتاردان جاسالاتىن 60-تان استام حالىقارالىق جانە ىشكى رەيستەردى قامتيتىن جەلىگە يە ەكەندىگىن تىلگە تيەك ەتتى.  گۋنەتيلەكە مىرزا ايتىپ وتكەندەي, «ەير استانا» «ەكسپو-2017 رەسمي تاسىمالداۋشىسى» ەكسكليۋزيۆتىك مارتەبەسى بار رەسمي سەرىكتەس بولىپ تابىلادى. كەلەر جىلى استاناعا كەلگەن جانە بارلىق ترانزيتتىك جولاۋشىلارعا كور­مەگە تەگىن كىرۋ قۇقىعى بەرىلمەك. وسى جيىندا قازاقستان رەس­پۋب­ليكاسىنىڭ ۆەتنامداعى ەلشىسى بەكەت­جان جۇماحانوۆ پەن ەلشىلىك قىز­مەت­كەرلەرى ءسوز سويلەدى. ب.جۇماحانوۆ «ەير استانانىڭ» اۋە باعىتتارى ارقىلى ەكسپو-2017 كورمەسى سىندى اسا ءىرى ۇلتتىق جوبانى ىلگەرىلەتۋگە تولىق ءمۇم­كىن­دىك بار ەكەنىن اتاپ ءوتتى. سەمينار بارىسىندا قاتىسۋشىلار ەلىمىزگە ۆيزالارىن الۋ ءتارتىبى, ەكسپو-2017 كورمەسىنە وراي, استاناعا تۋريس­تەردى تارتۋ ىسىندەگى ۆيزالاردى جەڭىل­دەتۋ تۋرالى حاباردار بولدى. قا­تىسۋ­­شىلار نازارىنا قازاقستان مەن حالىق­ارالىق كورمە تۋرالى بەينەروليكتەر, باسقا دا ماتەريالدار ۇسىنىلدى. «ەگەمەن-اقپارات»