تيىمدىلىك جانە الەۋمەتتىك كەپىلدىكتەر

«قازمۇنايگاز» ۇلتتىق كومپانياسى مەن «قازمۇنايگاز» بارلاۋ ءوندىرۋ» اكتسيونەرلىك قوعامى اراسىنداعى ءوزارا قارىم-قاتىناستار تۋرالى شارتقا وزگەرىستەر ەنگىزۋ تۋرالى ۇسىنىس جاسالدى. وندا ءوندىرۋ كومپانياسىنىڭ جۇيەلىك پروبلەمالارىن شەشۋگە جانە ونىڭ ەڭبەك ۇجىمدارىندا تۇراقتىلىقتى ساقتاۋعا باعىتتالعان بىرقاتار العىشارتتار بار. بۇل جونىندە وسى اپتانىڭ ەكىنشى كۇنى «قازمۇنايگاز» ۇلتتىق كومپانياسى» اق-تا وتكەن ءباسپاسوز كونفەرەنتسياسىندا باسقارما توراعاسى ساۋات مىڭباەۆتىڭ ءوزى اڭگىمەلەپ بەردى. ۇلتتىق كومپانيا باسشىسى جۋرناليستەرگە ەنشىلەس كاسىپورىن – «قازمۇنايگاز» بارلاۋ ءوندىرۋ» اق جارعىسىنا, ەكى كوم­پانيانىڭ اراسىنداعى ءوزارا قارىم-قاتىناستار تۋرالى شارت­قا وزگەرىستەر ەنگىزۋگە وراي ۇلت­تىق كومپانيانىڭ ۇسىنىستارى تۋرا­لى تاراتىپ ايتىپ بەردى. الەمدىك مۇناي نارىعىنداعى احۋالعا توقتالىپ, بۇگىنگى تاڭدا قاندايدا ءبىر ناقتى بولجام جاساۋ وتە قيىن ەكەنى تۋرالى اڭگىمەلەگەن ۇلتتىق كومپانيا باسشىسى وسى كەزەڭدە ءتۇرلى جاعدايعا دايىن بولۋ كەرەكتىگىن جەتكىزدى. «مۇنداي جاع­دايدا «قازمۇنايگاز» ۇلتتىق كوم­پانياسى ۇسىنىستارىنىڭ ماق­ساتى وپەراتسيالىق تيىمدىلىكتى ارت­تىرۋ بولىپ تابىلادى. راسىن ايت­قاندا, مۇناي باعاسىنىڭ قۇل­دىراۋى جاعدايىندا باسقارۋ مەن وندىرىستىك ۇدەرىستە جۇيەلىك پروب­لەمالار شىعا باستادى. كومپانيا قايتادان پايداعا شىعا باس­تاۋى ءۇشىن ول ماسەلەلەردى شەشۋ قا­جەت­تىلىگى تۋىنداپ وتىر. ءبىز وپەراتسيالىق جانە اكىمشىلىك شىعىنداردى قىسقارتۋعا, بيزنەس-ۇدەرىستەردى ستاندارتتاۋعا جانە جاناما قىزمەت كورسەتۋ فۋنكتسيا­لارىن اۋتسورسينگكە شىعارۋعا باعىتتالعان اكىمشىلىك-باسقارۋ پەرسونالىنا قاتىستى بىرقاتار داعدارىسقا قارسى شارالاردى ۇسىنىپ جاتىرمىز», دەدى ول. باسقارما توراعاسى ۇلتتىق كومپانيا وسىناۋ ۇسىنىستارى بو­يىن­شا اكتسيونەرلەرىنىڭ بار­لىعى داۋىس بەرە الۋى ءۇشىن «قازمۇنايگاز» بارلاۋ ءوندىرۋ» اق اكتسيونەرلەرىنىڭ كەزەكتەن تىس جالپى جينالىسىن شاقىرۋ تۋرا­لى رەسمي تۇردە جۇگىنىپ وتىر­عانىن ايتتى. ونىڭ سوزىنە قارا­عان­دا, اتالعان ۇسىنىستاردىڭ تولىق بەكىتىلۋى ءۇشىن ونى «قازمۇنايگاز» بارلاۋ ءوندىرۋ» اق اك­تسيو­نەر­لەرىنىڭ كەزەكتەن تىس جالپى جي­نالىسىندا داۋىس بەرگەن مينو­ري­تارلىق اكتسيونەرلەردىڭ باسىم كوپشىلىگى قولداۋى ءتيىس ەكەن. اكتسيو­نەرلەردىڭ بۇل جينالىسى وسى جىلدىڭ 3 تامىزىنا جوسپارلانىپ قويىپتى. ءباسپاسوز ءماسليحاتى بارىسىن­دا ءتۇرلى سۇراقتار تۋىندادى. وندا ايماقتارداعى قاراپايىم جۇ­مىسشىلاردىڭ جۇمىس ورىندارى دا ايتىلماي قالمادى. ءون­دىرىستىك ايماقتارعا جوسپار­لى جۇمىس ساپارىمەن بارۋ «قازمۇنايگاز» ۇلتتىق كومپانياسىندا داستۇرگە اينالعان. كومپانيا باسشىلىعى مەن ارنايى ماماندارى ەڭبەك ۇجىمدارىنىڭ جانە كاسىپوداقتاردىڭ وكىلدەرىمەن تۇراقتى نەگىزدە كەزدەسىپ, تولعاعى جەتكەن ماسەلەلەردى دەر كەزىندە تالقىلاپ وتىرۋدى ادەتكە اينالدىردى. تالقىلاناتىن باستى ماسە­لەلەر, نەگىزىنەن, جۇمىس پەن تۇرمىس جاعدايلارىن جاقسارتۋ, قوسىمشا جۇمىس كولەمىمەن قامتاماسىز ەتۋ جانە تاعى باسقالارىنا قاتىستى. كوپ جاعدايدا بۇل تالاپتار ءادىل دەۋگە بولادى, مۇنايشىنىڭ جۇ­مى­سى كليماتى قاتال وڭىرلەردە اۋىر جۇمىستارمەن بايلانىس­تى. سول سەبەپتى, كاسىپوداق پەن جۇمىس­كەرلەر كوشباسشىلارىنىڭ بارلىق ەسكەرتپەلەرى نازارعا الىنىپ, ءمۇم­كىن بولعان جاعدايدا ءتيىستى باسشى­لارعا ولاردى شەشۋ تۋرالى نۇسقاۋ­لار بەرىلەدى. «قازمۇنايگاز» بارلاۋ ءون­دىرۋ» اق-تىڭ ايماقتارداعى جۇ­مىس­شىلارىن قىسقارتۋ نەمەسە پەرسونالداردىڭ قىزمەتىن وڭ­تاي­لاندىرۋ شاراسى بويىنشا دا سۇراق قويىلدى. «قازىرگى كۇندە الەمدىك ەكو­نوميكالىق داعدارىستىڭ سال­قى­نى ءبىزدىڭ ەلگە دە كادىمگىدەي اسەر ەتىپ وتىرعانى جاسىرىن ەمەس. وسىعان وراي مەملەكەت باس­شىسى مۇمكىندىگىنشە جۇمىس ورىن­دارىن بارىنشا ساقتاپ قالۋ­مەن قاتار, ءونىم كولەمىن دە قىس­قارت­پاۋ بويىنشا تاپسىرما جۇك­تە­گەن. «قازمۇنايگاز» ۇلتتىق كوم­پانياسى وسى تاپسىرماعا وراي ءوز جاۋاپكەرشىلىگىن جاقسى سەزىنەدى. سوندىقتان وندىرىستەگى جۇمىس­شى­لاردى جۇمىستان قىسقارتۋ ۇلت­تىق كومپانيانىڭ جوسپارىندا جوق», دەدى باسقارما توراعاسى. نۇرباي ەلمۇراتوۆ, «ەگەمەن قازاقستان»