ءۇش قارعىپ سەكىرۋدىڭ ۇزدىگى

ءۇش قارعىپ سەكىرۋدەن كوپتەن بەرى قازاقستاننىڭ ۇكىلەگەن ءۇمىتى بولىپ جۇرگەن ولگا رىپاكوۆا لوندون جەرىندە التىننان القا تاعىپ ورالعاندا, ونىڭ العا قويعان ءبىر ۇلكەن ماقساتىنىڭ ورىن­دالعانىنا ءبارىمىزدىڭ كوزىمىز جەتتى. بىراق جەڭىل اتلەت سونىمەن بار بيىكتى باعىندىرىپ بولدىم دەپ قاراپ وتىرماي, جانكەشتى جاتتىعۋلارىن ودان ءارى جالعاستىرا بەردى. البيون جەرىندەگى الامانعا دەيىن 2010 جىلى كاتاردىڭ دوحا قالاسىندا وتكەن جابىق مانەجدەگى الەم چەمپيوناتىندا باس جۇلدە الىپ, 2011 جىلى وڭتۇستىك كو­رەيانىڭ تەگۋ كەنتىندە جالاۋ  جەلبىرەتكەن جاھاندىق جارىستا كۇمىس جۇلدەگە قول سوزعان, سونداي-اق, 2012 جىلى تۇرىكتىڭ ىستانبۇل شاھارىندا دۇبىرلەتكەن باسپانا ىشىندەگى عالامدىق سايىستا ەكىنشى تۇعىر­دان كورىنگەن تارلانىمىز سودان كەيىن دە وسىنداي ايتۋلى سىناقتاردان سىرت قالعان جوق. ولگا رىپاكوۆا 2014 جىلى كورەيانىڭ ينچحون قالاسىندا ازيا ويىندارىندا توپ جارىپ, 2015 جىلى بەيجىڭدە كەرۋەن كەرگەن الەم چەمپيوناتىندا قولا مەدالدى قورجىنعا سالدى. ال بيىل «گاۋھار ليگا» گران-ءپريى جارىسىندا الدىمەن كۇمىس, سوسىن التىن مەدالداردى جەڭىپ الدى. وسىنىڭ ءبارى ءبىزدىڭ سپورتشىنىڭ ناعىز سپورتتىق بابىندا كەلە جاتقانىن كورسەتەدى. دەمەك, ريو-دە-جانەيروداعى ويىنداردان ونىڭ جۇلدەمەن قايتاتىنىنا ءۇمىت ارتۋىمىزعا تولىق بولادى. – مەن باستاپقى كەزدە جەتى سايىسپەن اينالىستىم. ۋاقىت وتە كەلە بۇل سپورت تۇرىمەن اينالىسۋ, اسىرەسە, نايزا لاقتىرۋ, يادرو لاقتىرۋ ماعان كوپتەگەن قيىنشىلىقتار تۋعىزدى. كەيىن مەن ءوزىمنىڭ تاڭداۋىمدى ۇزىن­دىققا سەكىرۋگە اۋىستىردىم, ءبىر جىلدان كەيىن ءۇش قارعىپ سەكىرۋمەن اينالىسا باستادىم. مۇمكىن تابيعاتىم وعان جاقىن شىعار, مەن قارعىپ سەكىرۋ تەحنيكاسىن جىلدام مەڭگەردىم. بۇل جەردە ۇزىندىققا سەكىرۋمەن سالىستىرعاندا, جىل­دامدىقتى قاتتى ارتتىرۋ ماڭىزدى ەمەس, مەن دۇرىس تەحنيكانىڭ ارقاسىندا, بار جىل­­دامدىعىمدى ساقتاي الامىن, – دەيدى سپورتشىنىڭ ءوزى. ءبىز ونىڭ وسى ارتىق­شى­لىقتارىن باسىرەلى باسەكەلەردە ءتيىمدى پايدالانا الاتىنىنا سەنگىمىز كەلەدى.  دامير قوجامقۇل