قايتا تۇلەگەن «قازپوشتانىڭ» اۋىلداعى قىزمەتتەرى

كەشە اقپارات جانە كوممۋنيكاتسيالار ءمينيسترى داۋرەن اباەۆ «قازپوشتا» اق اقپاراتتىق ءباسپاسوز تۋرى اياسىندا اقمولا وبلىسىنىڭ شورتاندى اۋىلىنداعى اۋداندىق پوشتالىق بايلانىس تورابىندا بولدى. ءىس-شاراعا «سامۇرىق-قازىنا» ۇاق, اۋداندىق اكىمدىك, باق وكىلدەرى جانە بلوگەرلەر قاتىستى. مەملەكەت باسشىسى نۇرسۇلتان نازارباەۆ حالىققا ءتۇرلى قىزمەت كورسەتۋدە قالا مەن اۋىل اراسىن جاقىنداتىپ, اۋىل تۇرعىندارىنا مۇمكىندىگىنشە قولايلى جاعداي جاساۋدى تاپسىرعان بولاتىن. شورتاندىعا ساپارمەن بارعان ءباسپاسوز تۋرىندا كورگەنىمىز سول يگىلىكتەردىڭ باستاماسى بولىپ شىقتى. وسى جونىندە اڭگىمەلەگەن د.اباەۆ, اۋىل تۇرعىندارىنا قا­زىرگى زامانعى كوممۋنيكاتسيالىق قىزمەتتەردى ۇسىنۋ جاڭا مينيستر­لىك جۇمىسىنداعى ماڭىزدى باعىت­تاردىڭ ءبىرى ەكەنىن اتاپ ايتتى. «ءححى عاسىرداعى مەملە­كەتتەردىڭ باسەكەگە قابىلەتتىلىگىن انىقتايتىن بەلگىلەردىڭ ءبىرى – ازاماتتاردىڭ كۇندەلىكتى ومىرىنە جوعارى تەحنولوگيالاردىڭ ەنۋ دەڭگەيى بولىپ تابىلادى. ءبىزدىڭ ەلىمىز وسى سالادا ەداۋىر جەتىستىكتەرگە جەتتى دەۋگە نەگىز بار. الايدا, باعىندىرار شىڭىمىز ءالى الدا ەكەنى ايان. ارينە, ەڭ الدىمەن تەحنولوگيالىق پروگرەسس جەتىستىكتەرىن اۋىلدىق جەرلەرگە ەنگىزۋ تۋرالى ءسوز قوزعالادى. بۇگىن تانىستىرىلىپ وتىرعان الەۋمەتتىك جوبالار – سونىڭ جارقىن كورىنىسى. مۇنداي يگى جۇمىستار ءوز ناتيجەلەرىن كوپ كۇتتىرمەيدى. ونىڭ جەمىسىن تاياۋ ۋاقىتتا كورەمىز دەگەن ۇمىتتەمىن», دەدى مينيستر. كەزدەسۋ بارىسىندا «قاز­پوش­تا» اق باسقارما توراعاسى باع­دات مۋسين پوشتا سالاسىنداعى جاڭالىقتار تۋرالى ايتا كەلە, قا­تى­سۋشىلارعا پوشتالىق جانە قارجىلىق قىزمەتتەردى – ەلەكترون­دى كەزەك, «سالەمدەمەلەر سۋپەر­ماركەتى», postmarket.kz (e-commerce) ساۋدا الاڭى, ەسەپ­تىك-كاسسالىق قىزمەت كورسەتۋ, تەمىر­جول بيلەتتەرىن ساتۋ, زاڭدى تۇلعا­لارعا قىزمەت كورسەتۋ جانە تاعى باسقا شارالارمەن تانىس­تىردى. شاراعا كەلگەندەردىڭ نازارىنا «Salem, Mobile» دەپ اتالاتىن تاۋارلار مەن قىزمەتتەرگە تولەم جاساۋ جونىندەگى جاڭا قىز­مەت تانىستىرىلدى. ونىڭ قا­را­پايىمدىلىعى مەن قولجەتىمدىلىگى – ساتۋشىعا تولەم جۇرگىزۋ ءۇشىن قىمبات تۇراتىن جابدىقتار (تەرمينال) ساتىپ الۋ جانە ينتەر­نەتكە قوسىلۋدىڭ قاجەتى جوق. تۇتىنۋشىنىڭ تولەمى كەز كەلگەن ۇلگىدەگى ۇيالى تەلەفون قۇرا­لىمەن USSD پارمەنىن, ياعني قىسقا حا­بارلامالار قىزمەتى بولىپ سانا­لاتىن *499# نومىرىنە جىبەرۋ ارقىلى جۇزەگە اسىرىلادى. ساتىپ الۋشىعا تاۋارلار مەن قىزمەتتەرگە تولەم جاساۋ ءۇشىن ينتەرنەت كەرەك بولمايدى, سونداي-اق, تولەم كارتاسىن وزىمەن بىرگە الىپ ءجۇرۋ دە شارت ەمەس. تولەمدەر جۇرگىزۋ ءۇشىن ءوز كارتاڭىزدى ءبىر رەت قانا www.post.kz تىركەۋ جەتكىلىكتى. – ەلىمىزدە قولدانىسقا العاش ەنىپ وتىرعان بۇل تەxنولوگيانىڭ ارتىقشىلىعى – جول قاتىناسى مەن بانك قىزمەتى جانە ينتەرنەت جۇيەسى قولايسىز شالعاي اۋداندار مەن ەلدى مەكەندەردەگى xالىقتىڭ دۇكەن, سۋپەرماركەتتەردە ساۋدا جاساۋى مەن تولەم جۇمىستارىنىڭ اۋىرتپالىعى بۇرىنعىعا قاراعاندا وسى تەحنولوگيا ارقىلى جەڭىلدەتىلەدى. بۇل جۇيە افريكا ەلدەرىندە الدەقاشان قولدانىسقا ەنىپ, ءوزىنىڭ وڭ ناتيجەسىن بەرگەن ەكەن. اتالعان تەرمينال ورناتىلعان دۇكەننەن كەرەگىڭىزدى الۋ ءۇشىن قولىڭىزدا قاراپايىم تەلەفون عانا بولسا جەتىپ جاتىر. ءسىز زات ساتىپ الاتىن كەز كەلگەن دۇكەندە سول جەردەگى پوشتانىڭ جانە دۇكەننىڭ ساۋداعا ارنالعان كودى بولادى. سونى تەرىپ, الاتىن زاتىڭىزدىڭ باعاسىن sms ارقىلى جىبەرىپ, ءوز قاجەتىڭىزگە جاراتا الاسىز, – دەدى باسقارما توراعاسى. «قازپوشتا» الەۋمەتتىك باعدارلى كومپانيا رەتىندە اۋىل تۇرعىندارىنا ارنالعان جۇمىس ورىندارىن قۇرعان. بۇگىندە اۋىلدىق پوشتا تاراتۋشىلارىن ارنايى كيىمدەرمەن, سمارتفوندارمەن جانە ۆەلوسيپەدتەرمەن قامتاماسىز ەتەدى. بۇعان قوسا, «قازپوشتانىڭ» شالعايدا ورنالاسقان 50 بولىمشەسىندە اۋىل تۇرعىندارىنا ىڭعايلى بولۋ ءۇشىن «ينتەرنەتكە قولجەتىمدىلىك ورىندارى» ورنالاستىرىلىپتى. مۇنداي ورىندار تۇرعىنداردىڭ ينتەرنەتتى تەگىن پايدالانۋىنا, ساۋدالىق ينتەرنەت-الاڭداردا وپەراتسيالار جۇرگىزۋگە, بۇلارمەن بىرگە الىستا ورنالاسقان اۋىلدى جەرلەردەگى تۋىسقاندارىمەن Skype ارقىلى بايلانىسقا شىعۋىنا مۇمكىندىك بەرەدى ەكەن. بۇل يگىلىكتىڭ جاقسى ءبىر مىسالىن سول جەردىڭ وزىندە كوردىك. قول ونەرىمەن شۇعىلداناتىن امان توقتا ۇلى اتتى شەبەر ءوزىنىڭ ۇلتتىق بۇيىمدار جاساۋمەن اينالىساتىنىن ايتىپ, ءدال وسى «ينتەرنەتكە قولجەتىمدىلىك ورنىنىڭ» ءوز كاسىبىنە پايداسى ءتيىپ وتىرعانىن اڭگىمەلەپ بەردى. ونىڭ سوزىنە قاراعاندا, بۇعان دەيىن جاساعان بۇيىمدارىن تەك شاعىن اۋىل تۇرعىندارى عانا ساتىپ الىپ كەلسە, ەندى اتالعان ورىنداعى قىزمەتتىڭ ارقاسىندا ۇلتتىق بۇيىمدارى ينتەرنەتكە شىعىپ, تەگىن جارناماعا يە بولعان. ناتيجەسىندە, ەلىمىزدىڭ وزگە وڭىرلەرىنەن دە تاپسىرىس­تار تۇسە باستاپتى. تاپسىرىستى پوش­تا ارقىلى قابىلداپ الاتىن شەبەر, دايىندالعان بۇيىمدى تۇتىنۋشىعا جەتكىزىپ بەرۋ ءۇشىن دە پوشتا قىزمەتىنە جۇگىنەدى. ءسويتىپ, «قازپوشتا» اۋىلداعى شاعىن كاسىپكەرلەردىڭ ينتەرنەت-ساۋدا الاڭدارىنا شىعىپ, تاۋارلارىن بۇكىل رەسپۋبليكا كولەمىنە تانىس­تىرۋىنا مۇمكىندىك تۋدىرىپ, ءونىمىن كەز كەلگەن جەرگە جەتكىزۋگە ءوز قىزمەتىن ۇسىنىپ وتىر. باسقارما توراعاسىنىڭ ايتۋىنا قاراعاندا, تاياۋ بولاشاقتا اۋىل ادامدارى اۆيابيلەتتەردى دە ءوز پوشتالارىنان الا بەرەتىن بولادى. ەسەسىنە, تەمىرجول مەن اۆيابيلەتتەردى ساتقان پوشتا وپەراتورلارى ءاربىر بيلەت ءۇشىن جالاقىسىنا 100 تەڭگە قوسىپ الادى ەكەن. بۇل شارا پوشتا قىزمەتكەرلەرىن ىنتالاندىرا ءتۇسىپتى. بۇگىنگى كۇنگە دەيىن اۋىل پوشتالارى ارقىلى 30 مىڭنان استام تەمىرجول بيلەتتەرى ساتىلىپ ۇلگەرىپتى. بۇل – جاڭا قىزمەتتەردىڭ جۇرتقا ءتيىمدى ەكەنىن كورسەتسە كەرەك. ويتكەنى, ەندى ولار ۇشاق پەن پويىزعا بيلەت الۋ ءۇشىن قالاعا بارىپ, كاسسالارعا كەزەككە تۇرىپ اۋرە بولىپ جاتپايدى جانە وسىعان كەتەتىن ۋاقىت پەن جول شىعىندارىن ۇنەمدەپ قالادى. نۇرباي ەلمۇراتوۆ, «ەگەمەن قازاقستان» اقمولا وبلىسى