جاڭارۋ

نيكولاەۆ كەن بايىتۋ فابريكاسى قايتا جاڭعىرتىلدى ەلىمىزدەگى جەتەكشى مىس ءوندىرۋشى كومپانيالاردىڭ ءبىرى – KAZ Minerals توبى. اتالعان كومپانيانىڭ شىعىس وڭىرىندە ءتورت كەنىشى, ءۇش بايىتۋ فابريكاسى جۇمىس ىستەيدى. 10 مىڭعا جۋىق ادامدى جۇمىسپەن قامتىپ وتىرعان وسى توپقا قاراستى «شىعىستۇستىمەت» جشس-ءنىڭ نيكولاەۆ كەن بايىتۋ فاب­ريكاسىندا سوڭعى جىلدارى قايتا جاڭعىرتۋ جۇمىستارى جۇرگىزىلۋدە. اتالعان فابريكانىڭ نەگىزگى قىزمەتى – مىس, مىرىش, پوليمەتالل كەندەرىن ۇگىتۋ, ۇساتۋ, ءبولۋ, فلوتاتسيالاۋ ارقىلى مىس, قورعاسىن, مىرىش كونتسەنتراتتارىن ءوندىرۋ. بۇگىندە 500-دەن استام ادام ەڭبەك ەتەتىن فابريكانىڭ كەندى قايتا وڭدەۋ بويىنشا جىلدىق جوسپارلى كولەمى 2 ميلليون تونناعا جۋىقتادى. قازىرگى تاڭدا كاسىپورىندا ءوندىرىستى جاڭعىرتۋ باعدارلاماسى اياقتالۋعا جاقىن. جۋىردا وبلىس اكىمى دانيال احمەتوۆ شەمونايحا اۋدانىنا جۇمىس ساپارى اياسىندا اتالعان جاڭعىرتۋ جوباسىمەن تانىستى. «شىعىستۇستىمەت» جشس باسقارما توراعاسى يلسۋر داۋتوۆتىڭ ايتۋىنشا, 2012 جىلدان باستاپ جۇرگىزىلگەن جاڭعىرتۋ جوباسىنىڭ قۇنى 90 ميلليون دوللاردى قۇرادى. جاڭعىرتۋ جۇمىستارىنىڭ ارقاسىندا كاسىپورىننىڭ كەندى قايتا وڭدەۋ قۋاتى 1,8 ميلليون توننادان 2,2 ميلليون توننا كەنگە دەيىن ارتتى. جاڭعىرتۋ جۇمىستارىنان كەيىن مىس, مىرىش جانە قورعاسىن كونتسەنتراتتارىن كەننەن ءبولىپ الۋ ارتا تۇسەدى دەپ جوسپارلانعان بولاتىن. كاسىپورىن اتالعان ۇدەدەن تابىلىپ وتىر. ماسەلەن, مىستى ءبولىپ الۋ كوەففيتسيەنتى 82 پايىزدان 89 پايىزعا دەيىن كوبەيدى. وسىنىڭ ارقاسىندا ءوندىرىس قالدىقتارىنىڭ ۇلەسى دە تومەندەي تۇسەدى. بۇل ەكولوگيالىق احۋالدى وڭالتۋعا ءتيىمدى. باسقارما توراعاسى فابريكانىڭ ارتەمەۆ وندىرىستىك كەشەنىنىڭ اۆتوماتتاندىرىلعان باسقارۋ ورتالىعىمەن تانىستىردى. مۇندا كەن كەلىپ تۇسكەننەن كونتسەنتراتسيا العانعا دەيىنگى بارلىق بايىتۋ ۇدەرىسىن كومپيۋتەر ارقىلى قاداعالاپ, باسقارۋعا مۇمكىندىك جاسالعان. بۇل جۇمىس بارىسىن وڭتايلاندىرۋعا ۇلكەن سەپتىگىن تيگىزىپ وتىر, دەيدى فاب­ريكا جەتەكشىلىگى. جاڭعىرتۋ اياسىندا ۇساتۋ, فلوتاتسيا, رەاگەنتتەردى دايىنداۋ بولىمدەرىندە جانە دوزالاۋ الاڭىندا جوندەۋ جۇمىستارى جۇرگىزىلىپ, جابدىقتار اۋىستىرىلدى. قولدانىستاعى ديىرمەندەر, سورعى-گيدروتسيكلوندى قوندىرعىلار, تەحنولوگيالىق جابدىقتار, قۇبىرلار, قۇبىرلاردىڭ تىرەۋلەرى, فلوتتى ماشينالارعا ارنالعان باعانالار مەن ارقالىقتار جاڭارتىلدى. سونىمەن قاتار سۇزگىلەۋ بولىمىندە بۇرىنعى كەپتىرۋ باراباندارىنىڭ ورنىنا پرەسس-سۇزگىلەر ورناتىلدى. بۇل شاڭ-توزاڭدى ازايتىپ, وندىرىسكە ەكولوگيالىق جاعىنان جاعىمدى بولماق. سونداي-اق قورعاسىن كونتسەنتراتىنىڭ تەحنولوگيالىق جۇيەسى مەن وعان ارنالعان جەكە قويما سالىندى. فابريكاعا تيەسىلى اۋماقتا اباتتاندىرۋ جۇمىستارى ءجۇرىپ جاتىر. جالپى, نيكولاەۆ كەن بايىتۋ فابريكاسى 1980 جىلى پايدالانۋعا بەرىلگەن. ارتەمەۆ جانە يۋبيلەينىي-سنەگيريحين كەنىشتەرىنىڭ كەنىن قايتا وڭدەۋمەن شۇعىلدانادى. دۋمان اناش, «ەگەمەن قازاقستان» شىعىس قازاقستان وبلىسى, شەمونايحا اۋدانى