اتىراۋدا گاستەربايتەرلەردى بوپسالاعان 2 پوليتسەي سوتتالدى

اتىراۋ. 30 مامىر. اتىراۋ قالالىق №2 سوتىنىڭ ۇكىمىمەن قالالىق ىشكى ىستەر باسقارماسىنىڭ ەكى پوليتسەيى 4 جىل مەرزىمگە باس بوستاندىعىنان ايرىلدى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. «تەرگەۋ دەرەگىنە سايكەس, پوليتسيا قىزمەتكەرلەرى 2015 جىلدىڭ شىلدە ايىنان باستاپ اتىراۋ قالاسىندا جۇرگەن وزبەكستان رەسپۋبليكاسىنىڭ ازاماتتارىنا وزدەرىن كوشى-قون پوليتسياسى قىزمەتكەرلەرى رەتىندە تانىستىرىپ, ولاردى قورقىتىپ اقشالارى مەن ۇيالى تەلەفوندارىن اشىق توناعان. ءسويتىپ, ولار بىرنەشە رەت وزبەكستان رەسپۋبليكاسىنىڭ 5 ازاماتىن زاڭسىز ۇستاپ, ولاردان 800 مىڭ تەڭگەدەن استام قارجىنى جىمقىرىپ العان» دەپ حابارلادى اتىراۋ وبلىستىق سوتىنىڭ ءباسپاسوز حاتشىسى بورانباي عاليەۆ. سوت ۇكىمىمەن پوليتسيا قىزمەتكەرلەرى قىلمىستىق كودەكستىڭ 191- بابىنىڭ 2 - بولىگىنىڭ 2, 3-تارماقتارىمەن, 190-بابىنىڭ 3-بولىگىنىڭ 2-تارماعىمەن كوزدەلگەن قىلمىستىق ارەكەتتەرى ءۇشىن كىنالى دەپ تانىلدى. ءسويتىپ, ولارعا قۇقىق قورعاۋ ورگاندارىندا لاۋازىم اتقارۋ قۇقىعىنان ءومىر بويىنا, سونىمەن بىرگە, 4 جىل مەرزىمگە باس بوستاندىقتارىنان ايىرۋ جازاسى تاعايىندالدى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. فوتو: inform.kz.