شاڭعى
قازاقستان كومانداسىنىڭ قورجىنىنا العاشقى التىن مەدالداردى سالدى قازاقستاندىق سپورتشىلار دا ءوز سايىپقىراندىعىن سولداتسايدا تانىتا ءبىلدى. مۇندا قىسقى ازيا ويىندارى مەدالدارىنىڭ العاشقى جيىنتىعى شاڭعىداعى سپورتتىق باعدارلاۋ بويىنشا ءباسكە سالىنعان ەدى. وسىناۋ سپرينتەرلىك جارىستا قايسارلىق تانىتىپ, جەڭىپ شىققان ولگا نوۆيكوۆا ەل قورجىنىنا تۇسكەن العاشقى التىننىڭ يەگەرى اتاندى. ول قاشىقتىقتى 13 ءمينوت 4,7 سەكونتتە ءجۇرىپ ءوتتى. ودان 4 ءمينوت 25,1 سەكونتكە قالىپ قويعان قىتايلىق ليۋ سياوتين ەكىنشى ورىنعا شىقتى. قازاقستاننىڭ تاعى ءبىر وكىلى ەۆگەنيا كۋزمينا جۇلدەگەرلەر ۇشتىگىن تۇيىندەدى. ول 18 ءمينوت 46,8 سەكونت ۋاقىت كورسەتتى. ۋاقىت ايىرماشىلىعىنان-اق جەڭىمپازدىڭ ايقىن باسىمدىعى تانىلىپ تۇرعانداي. ولاي بولسا, وسى ازيادادا سپورتتىق باعدارلاۋ جونىندەگى ەل قۇراماسىنىڭ كوشباسشىسى ولگا نوۆيكوۆا ءوزىنىڭ الەمنىڭ مىقتى باعدارلاۋشىلارىنىڭ ۇشتىگىنە كىرەتىنىن تاعى ءبىر ايعاقتادى. ال ەندى ەرلەر اراسىنداعى شاڭعىمەن باعدارلاۋداعى سپرينتەرلىك ءبىرىنشىلىكتە بارىن سالعان ميحايل سوروكين قازاقستانعا ازيا ويىندارىنىڭ ەكىنشى التىن مەدالىن اكەلدى. قاشىقتىقتى ءجۇرىپ وتۋگە ول 13 ءمينوت 31 سەكونت ۋاقىت جۇمسادى. سوروكيننەن 1 ءمينوت 42,7 سەكونت ۇتىلعان كوماندالاس جولداسى الەكساندر بابەنكو كۇمىستى ولجالادى. ال قولا مەدالدى موڭعوليا وكىلى گەرەلت-ود باياراا ەنشىلەدى. شىعىسقازاقستاندىق الەكسەي پولتورانين شاڭعى مەن سپرينتەرلىك جۇگىرۋدەگى 1,6 شاقىرىمدىق جەكە بىرىنشىلىكتە جەڭىمپاز اتانىپ, كوماندا قورجىنىنداعى التىن القالاردى مولايتا ءتۇستى. فينالدىق باسەكەدە ول مەيلىنشە شيەلەنىسكەن تايتالاس-تارتىس بارىسىندا ءوزىنىڭ كوماندالاس جولداسى اقمولالىق نيكولاي چەبوتكودان مارەدەن سىنىق سۇيەم دەرلىكتەي عانا بۇرىن ءوتتى. ولار قاشىقتىقتىڭ سوڭعى سانتيمەترلەرىنە دەيىن ايانباي كۇرەستى. قورىتىندىسىندا پولتورانين 3 ءمينوت 59,9 سەكونت ۋاقىتپەن تۇعىردىڭ ەڭ بيىگىنە كوتەرىلسە, چەبوتكو ودان نەبارى 0,1 سەكونت عانا قالىپ قويدى. قالاي دەسەك تە, التىن دا, كۇمىس تە بىزدىكى بولدى. دەي تۇرساق تا, وندانىڭ وكىنىشىنىڭ ورنىن سپرينتەرلىك جەكە بىرىنشىلىكتە ءوز ەلىنە ازيادانىڭ العاشقى التىن مەدالىن سىيلاعان جاپوندىق شاڭعىشى قىز مادوكا ناتسۋمي تولتىردى. اقتىق جۇگىرۋدە مادوكا جارىس جولىنىڭ ورتا تۇسىندا باسەكەلەستەرىنەن بىرنەشە مەتر سىتىلىپ شىعىپ, سودان ءمارەگە جەتكەنشە وزىنە ەشكىمدى ماڭايلاتپادى. جەڭىمپازدىڭ ءناتيجەسى 3 ءمينوت 35,2 سەكونت بولدى. بياتلوننىڭ 7,5 شاقىرىمدىق سپرينتەرلىك بىرىنشىلىگىندە قازاقستاندىق قىزداردىڭ التىن ولجالايتىن رەتى دە, مۇمكىندىگى دە بار-اق ەدى. بىراق بۇل جولى قىتايلىق ۆان ءچۋنليدىڭ جولى بولعانى انىق. ول ەكى اتىس شەبىندە بىردە-ءبىر رەت ءمۇلت جىبەرمەي مەرگەندىك تانىتىپ, اقىرىندا قاشىقتىقتى 23 ءمينوت 12,1 سەكونت ۋاقىتپەن اياقتاپ, التىندى اۋزىمىزدان جىرىپ اكەتتى. اتىس شەبىندە ءبىزدىڭ ۆانكۋۆەر وليمپياداسىنداعى كۇمىس جۇلدەگەرىمىز ەلەنا حرۋستالەۆا دا قۇرالايدى كوزگە اتقان مەرگەندىگىن كورسەتكەنىمەن, جىلدامدىعىن ۇدەتە الماي, ەكىنشى ورىندا قالدى. ءبىز بولساق, ءبىرتالايعا دەيىن ەلەنا التىندى العان-اق شىعار دەپ ويلاعانبىز. ەكىنشى اتىس شەبىندە ءبىر رەت جاڭىلعان تاعى ءبىر وكىلىمىز مارينا لەبەدەۆا جۇيرىكتىگىنىڭ ارقاسىندا ءۇشىنشى ورىندى ەنشىلەدى. ءسويتىپ, جەڭىستىڭ ەكىنشى جانە ءۇشىنشى تۇعىرىنا ءوز وتانداستارىمىز كوتەرىلدى. قالاي دەسەك تە, التىن مەن كۇمىس ولجالاۋدان سولداتسايداعى قارقىنىمىز جامان باستالماعان سياقتى. قورعانبەك امانجول.
