دۋالدى وقىتۋعا دەن قويىلماق

تەوريانى وندىرىسپەن ۇشتاستىرا وقىتۋ تەحنولوگياسى دۋالدى وقىتۋ جۇيەسى بولىپ تابىلادى. اتالعان جۇيەنىڭ كاسىپتىك جانە بىلىكتى ماماندار دايارلاۋ بارىسىنداعى تيىمدىلىگى مەن ناتيجەلىگى الدەقاشان دالەلدەنگەن. دۇنيەجۇزىن قامتىعان وقى­تۋدىڭ وسى ءتۇرى ۋاقىت ساناپ ءوزىنىڭ جەمىسىن بەرىپ كەلەدى. ارينە, دامۋشى مەملەكەت رەتىندەگى ءبىزدىڭ بۇل جۇيەدەن قالىس قالماۋىمىز ورىندى. سوندىقتان دا, ەلباسى «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي جيىرما قادام» تۇجىرىمداماسىندا كادر­لار بىلىكتىلىگى جايىندا ەرەكشە ايتا وتىرىپ, ەلىمىزدە دۋالدى وقىتۋ جۇيەسىن ەنگىزۋ قاجەتتىگىن اتاپ كورسەتكەن بولاتىن. بۇل ورايدا پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ەنەرگەتيكا مينيسترلىگىنىڭ مۇناي ونەركاسىبىن دامىتۋ دەپارتامەنتى ديرەكتورىنىڭ ورىنباسارى باقىت ماحانوۆتىڭ ايتۋى بو­يىنشا, مۇناي باعاسىنىڭ تومەندەۋىنە بايلانىستى قارجىلىق قيىندىقتارعا قاراماستان, «قازمۇناگاز» كومپانيالار توبى دۋالدى ءبىلىم بەرۋ بويىنشا وقۋ ورتالىقتارىنىڭ قۇرىلىسىن قاراستىرىپ وتىر. بۇل نىسانداردىڭ ىشىندە جاتاقحانا, جابدىقتار جانە ۇڭعىمالاردى جوندەۋگە نەگىزدەلگەن قوندىرعىلار قامتىلادى. جانە دە اتالعان وقىتۋ جۇيەسىن مۇناي جانە گاز سالاسى بويىنشا العاش بولىپ قولعا العاندار قاتارىندا «پاۆلودار مۇناي-حيميا زاۋىتى» جشس, «قازمۇنايگاز» ءبو» اق كومپانياسى توبى جانە اتىراۋ مۇناي-گاز ينستيتۋتى مەن قازاقستان-بريتان تەحنيكالىق ۋنيۆەرسيتەتى بار ەكەندىگىن ەسكە سالدى. ءبىزدىڭ ويىمىزشا, قازاقستاندىق مۇنايشىلار دۋالدى وقىتۋ جۇيەسىن دامىتۋدا بارلىق مۇمكىندىكتەرگە يە. دۋالدى وقىتۋ باعدارلامالارى مۇناي-گاز سالاسىنىڭ كومپانيالارىنا قو­سىم­شا جوعارى بىلىكتى تەحنيكالىق كادر­لار دايار­لاۋ­دا ءتيىمدى مۇمكىندىكتەرگە جول اشادى, سونداي-اق, ۇسىنىلاتىن كاسىبي باعدارلامالاردىڭ كوپتۇرلىلىگىن ارتتىرۋ مەن وسى سالا بو­يىنشا وقىپ جاتقان جاستاردىڭ جان-جاقتى بولۋىنا ىقپال ەتەدى, دەدى ول. جانە دە دايىندالعان كادرلار وقۋدى تامامداعاننان كەيىن بىردەن وندىرىسكە ارالاسا الاتىنىن, ياعني كاسىبي بەيىمدەلۋدىڭ قاجەتتىلىگى بولمايتىنىن كولدەنەڭ تارتتى. ەلميرا ماتىباەۆا, «ەگەمەن قازاقستان»