كونستيتۋتسيالىق كەڭەس ءوز ۇيعارىمىن ءبىلدىردى

اتا زاڭعا وزگەرىستەر مەن تولىقتىرۋلار ەنگىزۋ جونىندەگى پارلامەنت قابىلداعان زاڭنىڭ كونستيتۋتسياعا سايكەستىگىن تەكسەرۋ تۋرالى پرەزيدەنت نۇرسۇلتان نازار­باەۆ­تىڭ ءوتىنىشىن وندىرىسكە قابىلداعان كونس­تي­تۋتسيالىق كەڭەس كەشە وزىندىك ۇيعارىم جاسادى. ۇستىمىزدەگى جىلى پارلامەنت پالا­تا­لا­رى ءوزىنىڭ بىرلەسكەن وتىرىسىندا رەسپۋبليكا حالقىنىڭ پىكىرىن قولداپ, قازاقستان رەس­پۋبليكاسىنىڭ تۇڭعىش پرەزيدەنتى ن. نازارباەۆتىڭ پرەزيدەنتتىك وكىلەتتىگىن ۇزار­تۋ مەرزىمىن كوزدەيتىن كونستيتۋتسياعا وزگەرىس ەنگىزۋ تۋرالى زاڭ جوباسىن تال­قىلاپ, قابىلدادى. ول زاڭ پرەزيدەنت قا­راۋىنا جىبەرىلدى. ال پرەزيدەنت ونىڭ اتا زاڭعا سايكەستىگىن تەكسەرۋدى كونستي­تۋ­تسيا­لىق كەڭەسكە جۇكتەدى. كونستيتۋتسيالىق كەڭەس ءوز كەزەگىندە جي­ناق­تالعان زاڭدى قۇجاتتاردى سارالاي كەلە پارلامەنت قابىلداپ, پرەزيدەنتتىڭ قول قويۋىنا ۇسىنىلعان «قازاقستان رەسپۋبلي­كا­سىنىڭ كونستيتۋتسياسىنا وزگەرىس پەن تو­لىقتىرۋ ەنگىزۋ تۋرالى» زاڭىن ەل كونس­تيتۋتسياسىنا سايكەس ەمەس دەپ تاپتى. ءسوي­تىپ ەندى ول زاڭعا قول قويىلمايدى جانە ول قول­دانىسقا ەنگىزىلمەيدى جانە شاعىم­دا­نۋعا جاتپايتىن بولدى. وسىعان وراي اتالعان نورماتيۆتىك قاۋلىنىڭ ءمان-ءجايىن كونستيتۋ­تسيالىق كەڭەس توراعاسى ي.روگوۆ قىسقاشا ءتۇسىندىرىپ بەردى. كونستيتۋتسيالىق كەڭەستىڭ پايىمداۋىن­شا, كونستيتۋتسيا رەسپۋبليكالىق رەفەرەن­دۋم­دى حالىقتىڭ ءوز بيلىگىن تىكەلەي جۇزەگە اسىرۋىنىڭ نىسانى جانە مەملەكەت ءومى­رىنىڭ اسا ماڭىزدى ماسەلەلەرىن شەشۋدىڭ دەمو­كراتيالىق ءادىسى دەپ ايقىندايدى, دەمەك, تۇڭعىش پرەزيدەنتتىڭ – ەلباسىنىڭ پرە­زي­دەنتتىك وكىلەتتىگىن ۇزارتۋ دا وسىنداي ماسەلە بولۋى مۇمكىن. پارلامەنت ءوزىنىڭ كونس­تيتۋتسيالىق وكىلەتتىگى نەگىزىندە مەملەكەت باسشىسىنىڭ پرەزيدەنتتىك وكىلەت­تىگىن رەس­پۋبليكالىق رەفەرەندۋمدا ۇزارتۋ جونىندە حالىقتىڭ ەرىك ءبىلدىرۋىن قامتاما­سىز ەتۋگە قۇقىقتىق نەگىز جاساۋعا ءتيىس بولاتىن زاڭدى قابىلدادى. الايدا, زاڭدى زەردەلەۋ بارىسىندا كونستيتۋتسيالىق كەڭەس بۇل زاڭنىڭ پرەزي­دەنتتىڭ وكىلەتتىگىن ۇزارتۋدى كوزدەيتىن نور­ماسى زاڭدىق تۇرعىدان ءدال جازىلماعانىن انىقتادى. زاڭنىڭ 1-تارماعىنان قازاقستان رەسپۋبليكاسى تۇڭعىش پرەزيدەنتىنىڭ – ەل­باسىنىڭ پرەزيدەنتتىك وكىلەتتىگى قاي مەرزىمگە ۇزارتىلاتىنى بايقالمايدى, مۇنداي ۇزار­تۋدىڭ ءبىر جولعى الدە قايتالاناتىن سيپاتتا بولاتىنى, نە بولماسا مەملەكەت باسشىسىن سايلاۋدان تولىعىمەن باس تارتۋ كوزدەلەتىنى انىق ەمەس. وسى كونستيتۋتسيالىق نورمانىڭ انىق جازىلماۋى كونستيتۋتسيادا كوزدەلگەن مەملەكەتتىك جانە قوعامدىق ينستيتۋتتاردىڭ تاجىريبە جۇزىندە ۇيلەسپەۋشىلىگىنە اكەلىپ سوق­تىرۋى مۇمكىن. سوندىقتان, ەل پرەزي­دەن­تىنىڭ پارلا­مەنت قابىلداعان زاڭنىڭ كونستي­تۋ­تسيا­لىعىنا كۇمان كەلتىرۋى ابدەن نەگىزدى بولىپ شىقتى دەپ اتاپ وتۋگە بو­لادى. كونس­تي­تۋتسيالىق كەڭەس بۇل زاڭدى كونستيتۋتسياعا سايكەس ەمەس دەپ تاپتى. الەكساندر تاسبولاتوۆ.