استانادا ەكى كۇن بۇرىن جوعالعان 11 جاسار قىز تابىلدى

استانا. 21 مامىر. استانادا بۇدان ەكى كۇن بۇرىن ءۇشتى-كۇيلى جوعالىپ كەتكەن 11 جاسار جامال بەكەتوۆا امان-ەسەن تابىلدى. بۇل تۋرالى استانا قالالىق ىشكى ىستەر دەپارتامەنتى ءباسپاسوز قىزمەتىنىڭ اقپارىنا سۇيەنگەن egemen.kz ءتىلشىسى حابارلادى. «ءيا, جوعالعان قىزدىڭ تابىلعانى راس», - دەدى ءباسپاسوز قىزمەتىنىڭ قىزمەتكەرلەرى. ەسكە سالا كەتەيىك, جاسى كامەلەتكە جەتپەگەن قىز بالانىڭ اناسى التىنشاش بەكەتوۆا بۇدان ەكى كۇن بۇرىن, 19 مامىردا ساعات 23:00 شاماسىندا پوليتسياعا قىزىنىڭ اياق استىنان جوعالىپ كەتكەنىن ايتىپ, شاعىمدانىپ كەلگەن ەدى. ول 2005 جىلى تۋعان جامال بەكەتوۆانىڭ سول كۇنى شىعىپ كەتكەننەن قايتىپ كەلمەگەنىن جەتكىزدى. «جەدەل-ىزدەستىرۋ شارالارى كەشەنى بارىسىندا جوعالىپ كەتكەن جامال بەكەتوۆانىڭ جۇرگەن جەرلەرى انىقتالدى. ول استانا قالاسىنىڭ جەلەزنودوروجنىي كەنتىنەن تابىلدى. وعان قارسى ەشقانداي زاڭعا قارسى ارەكەتتەر جاسالماعان. قازىرگى ساتتە استانا قالاسىنىڭ الماتى اۋدانى ىشكى ىستەر باسقارماسىنىڭ يۋۆەنالدى پوليتسياسىنىڭ قىزمەتكەرلەرى قىزدى اتا-اناسىنا اپارىپ تاپسىردى», - دەپ حابارلادى قالالىق ىشكى ىستەر دەپارتامەنتىنىڭ ءباسپاسوز قىزمەتىندەگىلەر. پوليتسياداعىلار تەكسەرۋ جۇمىستارىنىڭ ناتيجەسىندە قىز بالانىڭ بۇدان بۇرىن دا ۇيدەن بىرنەشە رەت كەتىپ قالعانىن انىقتاعانىن باياندادى. وسىعان بايلانىستى ىشكى ىستەر قىزمەتكەرلەرى ونىڭ اتا-اناسىمەن الدىن الۋ جۇمىستارىن جۇرگىزىپ تە كەلگەن ەكەن. اتاپ وتەتىن جايت, ىزدەستىرۋ جۇمىستارىنا ۆولونتەرلەر مەن جەرگىلىكتى تۇرعىندار دا قاتىسقان. قىزدىڭ جوعالعانى جايىنداعى حابارلاندىرۋلار الەۋمەتتىك جەلىلەردە دە جاريالانعان. تالعات رايىمبەك. دەرەك, فوتو: استانا قالاسى ىشكى ىستەر دەپارتامەنتىنىڭ ءباسپاسوز قىزمەتى.