الماتى وبلىسىندا 70-تەن استام وزبەك گاستاربايتەرى ۇستالدى

تالدىقورعان. 21 مامىر. الماتى وبلىسى, پانفيلوۆ اۋداندىق پروكۋراتۋراسى قىزمەتكەرلەرى پوليتسەيلەرمەن بىرگە وتكىزگەن رەيد بارىسىندا جاركەنت قالاسىنىڭ سالىنىپ وتىرعان نىسانداردىڭ بىرىندە زاڭسىز ەڭبەك ەتىپ جۇرگەن وزبەكستاندىق 73 ازاماتتى تاپتى. بۇل تۋرالى وبلىستىق پروكۋراتۋرا ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى. پانفيلوۆ اۋداندىق پروكۋرورى ايدىن تورەبەكوۆتىڭ ايتۋىنا قاراعاندا, شەتەلدىكتەردىڭ قۇجاتتارىن تەكسەرۋ كەزىندە ولاردىڭ قازاقستان رەسپۋبليكاسىندا ەڭبەك قىزمەتىن زاڭسىز تۇردە جۇزەگە اسىرعاندارى, ياعني جۇمىسقا ورنالاسۋ رۇقساتىن الۋسىز ورنالاسقاندارى بەلگىلى بولعان. «تەكسەرۋ قورىتىندىلارى بويىنشا ءبىز پانفيلوۆ اۋداندىق ىشكى ىستەر ءبولىمى باستىعىنىڭ اتىنا زاڭدىلىقتىڭ بۇزىلۋىن جويۋ جونىندە ۇسىنىس ەنگىزدىك. كىنالى تۇلعالارعا قاتىستى اكىمشىلىك حاتتامالار تولتىرىلىپ, سوت قاراۋىنا جىبەرىلدى», - دەپ اتاپ ءوتتى پروكۋرور. وسىنىڭ ناتيجەسىندە جوعارىدا اتالعان ءتارتىپ بۇزۋشىلىقتاردى جىبەرگەن ازاماتتار انىقتالدى. ولار ايىپتى دەپ تانىلىپ, قازاقستان رەسپۋبليكاسى اكىمشىلىك قۇقىق بۇزۋشىلىقتار تۋرالى كودەكسىنىڭ 517-بابى, 5-بولىمىمەن اكىمشىلىك جاۋاپكەرشىلىككە تارتىلدى. نۇربول الدىباەۆ. دەرەك: الماتى وبلىستىق پروكۋراتۋراسىنىڭ ءباسپاسوز قىزمەتى.