بۇل ماسەلە ءبىزدى بىرىكتىرۋى كەرەك

بۇرناعى كۇنى وبلىستىق قوعامدىق كەڭەستىڭ كەڭەيتىلگەن وتىرىسى ءوتتى. وتىرىسقا سوڭعى ۋاقىتتا قىزۋ تالقىعا ءتۇسىپ جاتقان جەر ماسەلەسىنە قاتىستى پىكىرلەرىن بىلدىرگەن قوعام بەلسەندىلەرى, ساياسي پارتيالاردىڭ وبلىستىق فيليال جەتەكشىلەرى, قوعامدىق ۇيىمداردىڭ, ارداگەرلەر مەن جاستار ۇيىمدارىنىڭ باسشىلارى, اسسامبلەيا مەن ازاماتتىق اليانس مۇشەلەرى قاتىستى. – بۇل كەزدەسۋدىڭ ماقساتى – قالىپتاسقان جاعدايدى بىرلەسە وتىرىپ تالقىلاۋ, پىكىرلەر مەن ۇسىنىستاردى جيناقتاپ, رەسپۋبليكالىق كەڭەسكە ۇسىنۋ. مەملەكەت باسشىسى بۇل ماسە­لەنى شەشۋدىڭ ناقتى جولىن ايقىنداپ بەردى. ەندىگى جۇمىس – وسىنداي كەزدەسۋلەر, رەسپۋبليكالىق كوميس­سيا­نىڭ مۇمكىندىكتەرى ارقىلى جەر كودەكسىندەگى داۋ تۋعىزىپ وتىرعان باپتاردى جان-جاقتى تالقىلاپ, كەلىسىمگە كەلۋ. ءار­كىمنىڭ ساياسي كوزقاراسى ءارتۇرلى بولعانىمەن, جەر ماسە­لەسى ءبىزدى ەكىگە بولمەۋى كەرەك, كەرىسىنشە بىرىكتىرە ءتۇسۋى ءتيىس, – دەدى وبلىس اكىمى قىرىمبەك كوشەرباەۆ. باسقوسۋدا جەر تۋرالى زاڭ­نامانىڭ تالاپتارى مەن موراتوري جاريالانعان باپتارى جايلى وبلىستىق جەر قاتىناستارى باسقارماسىنىڭ باسشىسى شاحماردان قوي­شىباەۆ حابارلاما جاسادى. ال, ءا.مامبەتاليەۆ جەردىڭ تۇزدانۋىن, ساپاسىن باقى­لاۋ­دىڭ ناتيجەلەرى تۋرالى, س.اڭساتوۆ كەزىندە تاراتىلعان جەر ۇلەستەرى تۋرالى ساۋال قويدى. «قولدارىندا قۇجاتتارى بار تۇرعىندار ول جەردىڭ قايدا ەكەنىنەن دە حابارى جوق. جەر ۇلەسىن العاندار ول كەزدە جەردى پايدالانۋعا مۇمكىندىگى بولماعاندىقتان شارۋا­شىلىقتارعا بىرىكتى. ەندى سول جەردى ساتىپ الۋ مەن جالعا الۋدىڭ تەتىكتەرى قانداي؟ جالعا بەرىپ قويعان ادامدار ءوزى پايدالانعىسى كەلسە قالاي ارەكەت ەتپەك؟ بۇل تۇرعىدا ءتۇسىندىرۋ جۇمىستارى جۇرگىزىلۋى كەرەك», دەدى ول. وبلىستىق ءماسليحات دەپۋتاتى ش.ابدىكارىموۆ جەر ۇلەسىن پايدالانۋعا وراي تۇسىندىرمە جۇمىستارىن بەلسەندى ءجۇر­گىزۋدىڭ ماڭىزىنا توقتالدى. بۇل ماسەلەنى ناقتىلاپ بەرۋ ءۇشىن ماماندارعا ۇسىنىس بەرىلەدى. «اۋعان سوعىسى ارداگەرلەرى مەن مۇگەدەكتەرى» قوعامدىق بىرلەس­تىگىنىڭ توراعاسى ع.كامالوۆ جەر كونسورتسيۋمىن قۇرىپ, جەر الۋعا ىنتالى ازاماتتار سول كونسورتسيۋمعا اقشا قۇيسا, مەملەكەت ساقتاندىرسا دەگەن ۇسىنىسىن جەتكىزدى. بۇل كەزدە جەردىڭ نارىقتىق اينالىمى دا رەتتەلەدى, ينۆەستورلار دا كەلەدى. اتالعان سۇراق كوميسسيا قاراۋىنا ۇسىنىلاتىن بولادى. س.تەڭىزباەۆ جەرگىلىكتى ءماسليحاتتار دەپۋتاتتارى سايلاۋشىلارىمەن كەزدەسىپ, وي-پىكىرلەرىن جيناقتاۋ كەرەكتىگىن ايتتى. وبلىستىق ءماسليحات حات­شىسى ن.بايقاداموۆ دەپۋ­تات­تاردىڭ حالىقپەن كەزدە­سۋ­لەرى مەن قوعامدىق قابى­ل­­داۋ­لار كەستەگە ساي جۇرگىزى­لىپ جاتقانىن باياندادى. ءماس­ليحاتتا دا ءبىرشاما ۇسىنىستار جيناقتالعان. ازىرگە زاڭعا موراتوري جاريالاندى, وزگەرىس­تەرگە قاتىستى حالىقتىڭ پىكى­رى ارقيلى. جەر ماسەلەسى تەك بيلىكتىڭ كوزقاراسىمەن شەشىل­مەيدى. قازاق تاريحىنا قاراساق, قانداي دا بولماسىن كۇردەلى ماسەلەنى مامىلەگە كەلۋ ارقىلى شەشكەن. مەملەكەتتىك كوميسسيا وسى ماقساتپەن قۇرىلىپ وتىر. باسقوسۋدا ەڭبەك ارداگەرى س.اڭساتوۆ, قازاقستان كوممۋ­نيس­تىك حالىق پارتياسى» وبلىس­تىق كوميتەتىنىڭ جەتەك­شىسى ت.تەلەۋباەۆ, قازاقستان جازۋشىلار كونگرەسىنىڭ قىزىل­وردا وبلىستىق فيليالىنىڭ توراعاسى ن.جاليەۆ, «نۇر وتان» پارتياسى وبلىستىق في­ليالى­­نىڭ ءبىرىنشى ورىنباسارى ي.قۇتتىقوجاەۆ, تاعى باسقا ازاماتتار ءوز پىكىرلەرىن ءبىلدىرىپ, ويلارىمەن ءبولىستى.  گۇلجازيرا جالعاسوۆا, جۋرناليست  قىزىلوردا