سانكت-پەتەربۋرگتەن جەتكەن سۋرەتتەر

جۋىردا ەلورداداعى تۇڭعىش پرەزيدەنت مۋزەيىندە سانكت-پەتەربۋرگ كونتسەرتتىك حورىنىڭ (سمولنىي سوبورىنىڭ كامەرالىق حورى) باعدارلاماسى اياسىندا «جاڭا كوز­قاراس. New Vision» فوتوسۋرەتتەر كورمەسىنىڭ اشىلۋ ءراسىمى ءوتتى. كورمەنى قازاقستان رەسپۋبليكاسى تۇڭعىش پرەزي­دەنتى مۋزەيىنىڭ ديرەكتورى الما ساعىنعالي اشىپ بەردى. سودان سوڭ رەسەيدىڭ حالىق ءارتىسى, «يسااكي سوبورى» مەملەكەتتىك ەسكەرتكىش-مۋزەيىنىڭ ديرەكتورى نيكولاي بۋروۆ ءسوز الىپ, قازاقستان مەن رەسەي اراسىنداعى مادەني-گۋمانيتارلىق ىنتىماقتاستىقتىڭ نىعايا تۇسەتىنىنە سەنىمى زور ەكەندىگىن, سونداي-اق قۇر قول كەلمەي, استانا تۇر­عىندارىنا كورمە الا كەلگەندەرىن ايتىپ, مۋزەي قىز­مەتكەرلەرىنە ريزاشىلىعىن ءبىلدىردى. جيىندا اتاقتى حور ۇجىمدارىنىڭ ءبىرى – سانكت-پەتەربۋرگ كونتسەرتتىك حورى ونەر كورسەتتى. حور 1991 جى­لى قۇرىلعان ەكەن. بايقاعانىمىزداي, اتالعان حوردىڭ ۆو­كالدىق ورىنداۋ مانەرىندە ەۋروپالىق جەڭىل داۋىس ىرعاعى مەن ناعىز ورىس حالقىنا ءتان داۋىس تەمبرى ادەمى ۇيلەسىم تاپقان. بۇل جولى ءبىز سانكت-پەتەربۋرگتە بول­ماساق تا, ءوزىمىزدى سول ءبىر عاجاپ قالانىڭ تۇرعىنىنداي ەلەستەتتىك. ويتكەنى, مۋزەيگە قويىلعان «New Vision» فوتوسۋرەتتەر كورمەسى وتە اسەرلى جانە شىنايى شىققان. كوپشىلىك نازارىنا ۇسىنىلعان تاماشا سۋرەتتەر كەلگەن قوناقتاردىڭ ەرەكشە تاڭدانىسىن تۋعىزباي قويمادى. وسى جوبا بارىسىندا قالا تۇرعىندارى مەن قوناقتارى سانكت-پەتەربۋرگتى جا­ڭا قىرىنان تانىپ, قالانىڭ زاماناۋي تىنىسىن جانە كلاس­­سيكالىق داستۇرلەر كوركەمدىگىنە باي ءومىر ىرعاعىمەن جاقىنىراق تانىسۋىنا مۇمكىندىك الدى. مۇنداعى تۇپكى ماقسات – سانكت-پەتەر­بۋرگكە جانە قالانىڭ كورىكتى جەرلەرىنە, سونداي-اق, بىرەگەي تاريحي-كوركەمدىك كەشەن – ءتورت سوبور مۋزەيى: يسااكي سوبورى, حريستوستىڭ قايتا ارىلۋ عيباداتحاناسى («سپاس نا كروۆي»), سمولنىي سوبورى, سامپسونيەۆ سوبورلارىنا دەگەن جاس فوتوسۋرەتشىلەردىڭ وزىندىك كوزقاراسىن كورسەتۋ بولسا, سول ماقسات ورىندالدى دەپ بىلدىك. راۋشان تاۋىرحانقىزى, «ەگەمەن قازاقستان»