«جاس قانات» قانات قاقتى

تالانتتىنى تانىپ, ونەر­لىنى ورگە شىعارۋدا «جاس قانات» جوباسىنىڭ الار ورنى ايرىق­شا ەكەنى ايتپاسا دا ايقىن. قا­زىرگى قازاق ساحناسىنداعى جا­رىق جۇلدىزداردىڭ جولىن اشىپ, ءان الەمىندەگى ونەر مايتال­مان­دارىنىڭ باستاۋ باسپالداعى بول­عان دا وسى جارىس دەسەك, جاڭى­لىسپايتىن شىعارمىز. تاۋەلسىز ەلىمىزبەن تۇيدەي قۇرداس بۇل بايقاۋدىڭ بيىلعى جاڭالىعى دا جەتەرلىك, ماقساتتارى دا ماڭىزدى. ساحنا ساڭلاقتارىن ساراپتايتىن سايىستىڭ شىمىلدىعى كەشە ءتۇرىلدى. سايدىڭ تاسىنداي ىرىكتەلگەن قاتىسۋشىلاردىڭ دا قارقىنى قاتتى دەيدى ۇيىم­داس­تىرۋشىلار. بيىلعى ۇمىتكەر­لەردىڭ اراسىندا, «ءۇش ءجۇز» تو­بى (قاراعاندى), نۇريسلام قاميت­بەكوۆ (جەزقازعان), قارشىعا يل­تانوۆ (سەمەي), پاراسات وتان (سەمەي), ايبەرگەن بولاتحان (تال­دىقورعان), اقجول ساپارالى (الماتى), ادەمى قوڭىراتباي (الماتى), ەرنار دۇيسەەۆ (اقتو­بە), جالعاس سۇلتانوۆ (استانا), ايبەك داۋلەتقاليەۆ (ورال), لاۋرا تاۋساروۆا (اقتوبە), اي­زادا الىمبەكوۆا (شىمكەنت), ما­ليكا احمەتجانوۆا (وسكەمەن), نۇرجان ورازوۆ (اقتوبە) سىندى جۇزدەن جۇيرىك شىققان جاس دارىندار بار. ءوزىنىڭ قالاعان ونەرپازىنا قولداۋ كورسەتۋگە كەلگەن كورەر­مەننىڭ دە قاراسى قالىڭ. ءۇش كۇن بۇرىن سۋىرىلعان جەرەبە بويىن­شا ساحنا تورىنە العاش بولىپ «ءۇش ءجۇز» توبى كوتەرىلدى. بەلگىسىز توپتىڭ ورىنداۋىنداعى «بەلگىسىز جان» ءانى ءساتتى شىقتى دەۋگە بولادى. وعان كورەرمەننىڭ قول سوعىپ, قوسىلا ورىنداۋى دالەل. «جاس قاناتتىڭ» العاشقى جە­ڭىمپازدارى مەدەۋ ارىنباەۆ, ەرلان كوكەەۆ, مادينا ءسادۋا­قاسوۆا سياقتى بەلگىلى ونەر جۇلدىز­دارىنان قۇرالعان قازىلار القاسى ءۇش كۇن بويى ۇمىتكەرلەردىڭ تالابىن تاماشالاپ, باعاسىن بەرەدى. ايتا كەتەتىن تاعى ءبىر جايت, سايىس 22 مامىر كۇنى قورىتىندىلانىپ, «جاس قاناتتىڭ» جاڭا جەڭىمپازى انىقتالادى. راۋان قايدار, «ەگەمەن قازاقستان» سۋرەتتى تۇسىرگەن سۇلتان سەيىت