سۇيەكتەن دە سىر تۇيۋگە بولادى

«ەل ءىشى – ونەر كەنىشى» دەگە­نىمىز راس. ىزدەي بەرسەڭ, ءىنجۋ-مارجان تابىلىپ جاتاتىنىنا دا قانىقپىز. سونىڭ ءبىر مىسالىن اقمولا وبلىسىنىڭ شورتاندى اۋىلىندا تۇراتىن بەكتاس كارىمگە قاراتىپ ايتۋعا بولادى. بەكتاس باۋىرىمىز ەرەكشە سۋرەتشى بولىپ شىقتى. ونىڭ باسقالاردان ايىرماشىلىعى, ارتىقشىلىعى دەسەك تە بولار, كا­دىمگى مالدىڭ سۇيەگىنەن قولونەر بۇيىمدارىن جاسايدى. جالپى, سۇيەكتەن ونەر تۋىندىسىن تۋدىرۋ ەرتەدەن بار. بىراق, بەكتاس كارىمنىڭ ايتۋىنشا, قازاقستاندا مۇنداي باستامانى ول ءبىر كەزدەگى اتاقتى قولونەر شەبەرى داركەنباي شوقپار ۇلىنان كەيىن ەكىنشى بولىپ قولعا الىپ وتىر. سەبەبى, باسقا سۋرەتشىلەر مەن مۇسىنشىلەر سۇيەكتى تولىعىمەن, ياعني ونى قاز-قالپىندا ءبىر كومپوزيتسياعا ارنايدى ەكەن. ال بەكتاس سۇيەكتى ويىپ, ودان عا­جايىپ بەينەلەر جاساي بەرەدى. بۇگىنگى كۇنى سۋرەتشى اۋدان­دىق مادەنيەت ۇيىندە ەڭبەك ەتىپ ءجۇر. وندا ءوزىنىڭ ارنايى مەكتەبىن دە اشتى. وتىز جىل­عا جۋىق حا­لىق ونەرىن ءتۇر­لەن­دىرۋگە ۇلەس قوسىپ كەلە جاتقان بەكتاستىڭ مەكتەبىندە ون بالا ءتالىم الۋدا. – نەگىزگى ماقسات – ءوز بىلگەنىڭدى ۇرپاققا ۇيرەتۋ. ءوزىڭنىڭ سۇيەكتەن جاساعان دۇنيەلەرىڭدى كىم ۇيرەنەم دەسە, كىم سۇراسا, سونىڭ جولىن ۇقتىرىپ, كورسەتىپ, يگىلىككە جاراتۋ, – دەيدى شەبەر. سۇيەكتەن ءتۇيىن تۇيۋدەن بولەك, سۋرەتشى مۇندا ساحنانى ارلەۋ, شىمىلدىقتى تۇرلەندىرۋ, كيىم­دەر ۇلگىسىن جاساۋمەن دە اينالىسادى. باقبەرگەن امالبەك, «ەگەمەن قازاقستان» اقمولا وبلىسى