ولكەتانۋ مۋزەيى

ءوزىنىڭ 150 مىڭىنشى ەكسپوناتىن كۇتۋدە قاراعاندى وبلىستىق تاري­حي-ولكەتانۋ مۋزەيى ءوزىنىڭ ءتول مەرەكەسىن كەنشىلەر استانا­سىنداعى ورتالىق ساياباقتا اتاپ ءوتتى. بۇل جەردە قالا مۋزەيى دەسە ىشەك اسىن جەرگە قويعان اعايىن كوپتەپ جينالدى. ولار اشىق اسپان استىنا قويىلعان تاريحي جادىگەرلەردى قىزىعا تاماشالادى. اسىرەسە, ساماۋرىندار جيىنتىعى جۇرتتىڭ ىقىلاسىنا بولەندى. سونداي-اق, ءجۇز جىلعا جۋىق تاريحى بار شويىن ۇتىكتەردىڭ ءتۇر-ءتۇرى, ەسكى ساعاتتار مەن العاش شىققان تەلەديدارلار دا جۇرت نازارىن وزىنە اۋداردى. مۇراجاي قىزمەتكەرى مەرۋەرت ورىسباەۆانىڭ ايتۋىنشا, ورتالىق ساياباقتاعى مۇراجاي الاڭقايىنا 100-دەن استام جادىگەر قويىلعان. جالپى, وبلىستىق تاريحي-ولكەتانۋ مۇراجايىنىڭ قورىندا بۇگىنگى كۇندە 149 985 جادىگەر بار. قازىرگى مۇراجاي «سۇيىكتى قالاما سىي» اكتسياسىن جاريا­لاپ, قولىندا تاريحي جادىگەرلەر بار قالا تۇرعىندارىنا ۇندەۋ تاستاعان. وسىعان وراي مۇراجاي ءوزىنىڭ 150 مى­ڭىنشى ەكسپوناتىن اسىعا كۇتۋدە. مۇراجاي قىزمەتكەرلەرى كاسىبي مەرەكە كۇنى مۋزەيدىڭ تابالدىرىعىن اتتاعان جۇرت ءۇشىن ءتۇرلى تاقىرىپتى قاۋزاعان زياتكەرلىك-تانىمدىق ويىندار مەن ۆيكتورينالار ۇسىندى. بۇدان بولەك, ولار قالا تاريحىمەن جاقىن تانىس بولعىسى كەلەتىن جاستارعا ارنايى اۆتومارافون ۇيىمداستىردى. بۇل شارا بارىسىندا ستۋدەنتتەر مەن وقۋشىلار اۆتوبۋسپەن قالانىڭ تاريحي ءھام كورىكتى جەرلەرىن ارالاپ, ەكسكۋرسيا جاسادى. قايرات ءابىلدينوۆ, «ەگەمەن قازاقستان» قاراعاندى