سەكسەننىڭ سەڭگىرىنەن سويلەدى اقىن

اباي اتىنداعى مەملەكەتتىك وپەرا جانە بالەت تەاترىندا اقىن, كينودراماتۋرگ, پۋبليتسيست, زەرتتەۋشى-عالىم, قوعام قايراتكەرى, قازاقستاننىڭ ەڭبەك ەرى ولجاس سۇلەيمەنوۆتىڭ 80 جاسقا تولۋىنا وراي ۇيىمداستىرىلعان شىعارماشىلىق سالتاناتتى كەش ۇلكەن تابىسپەن ءوتتى. وسىناۋ مەرەيتوي سالتاناتىنا الىس جانە جاقىن شەتەلدەردەن كوپتەگەن كورنەكتى مادەنيەت قايراتكەرلەرى كەلىپ, قۋانىشتى بىرگە ءبولىستى. رەجيسسەر ءانۋار ءمۇستافيننىڭ ولجاس اقىن تۋرالى تۇسىرگەن «مە­نىڭ جولىم» دەپ اتالاتىن دەرەكتى فيلممەن باستالعان جىر كەشىندە قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى مەرەيتوي يەسىنە ەلباسى نۇرسۇلتان نازارباەۆتىڭ ارنايى جولداعان قۇتتىقتاۋ حاتىن وقىپ بەرىپ, اقىن شىعارماشىلىعى جونىندە جىلى لەبىزىن ءبىلدىردى. قۇرمەتتى قوناقتار قاتارىندا قاتىسقان قازاقستان جازۋشىلار وداعى باس­قارماسىنىڭ توراعاسى, سەناتور نۇرلان ورازالين مەن ءماجىلىس دەپۋتاتى قۋانىش سۇلتانوۆ, سون­داي-اق, بۇلبۇل ءانشى بيبىگۇل ءتو­لەگەنوۆا ساحناعا شىعىپ, قا­زاقتىڭ الەمدىك دارەجەگە كوتە­رىلگەن اقيىق اقىنىن, ايماڭداي ازاماتىن مەرەيتويىمەن قۇتتىق­تاپ, وتكەن كۇننەن ەستەلىك ايتتى. كۇمىس كومەي ءانشى روزا رىمباەۆا, «جەتىگەن» تريوسى مەن باسقا دا ونەر جۇلدىزدارىنىڭ ونەرىن تاما­شالاعان كەش قوناقتارى ولجاس اقىننىڭ پوەزياسىنان سۋسىنداپ, رۋح الىپ قايتتى. وسى مەرەيتوي اياسىندا قازاق­ستان رەسپۋبليكاسى ۇلتتىق كى­تاپحاناسىندا دا سالتاناتتى شا­را بولىپ ءوتتى. مەملەكەت جانە قو­عام قايراتكەرى مۇرات اۋەزوۆ جۇرگىزگەن القالى جيىندا بەلگىلى اقىن, «جۇلدىز» جۋرنالىنىڭ رەداك­تورى ۇلىقبەك ەسداۋلەت ولەڭ وقىپ, اقىن اعاسىنىڭ شىعار­ماشىلىعىنا توقتالسا, قازاقستان جازۋشىلار وداعى باسقارماسى توراعاسىنىڭ ورىنباسارى, اقىن مارالتاي رايىم­بەك ۇلى ولەڭ ارنادى. كەزدەسۋ اياسىندا اقىننىڭ ءار جىلدارى جازعان سۇبەلى تۋىندىلارىنان قۇراستىرىلعان كولەمدى جيناق – «ولجاس سۇلەيمەنوۆ» دەپ اتالاتىن عىلىمي-كومەكشى رەتروسپەكتيۆتىك بيبليوگرافيالىق كورسەتكىشتىڭ تۇساۋىن قازاقستان­نىڭ حالىق ءارتىسى ءاسانالى ءاشىموۆ پەن قازاق كسر-ءىنىڭ ەڭبەك سىڭىرگەن ساۋلەتشىسى شوت-امان ءۋاليحان كەسىپ, اتالمىش جيناقتىڭ ۇلت قۇن­دىلىعىن اسقاقتاتۋ جولىندا اسا قاجەتتى كورنەكى قۇرال ءارى قۇ­جات­تىق ەڭبەك ەكەندىگىن اتاپ ءوتتى. شى­عارمالار جيناعىنا اقىننىڭ قازاق جانە ورىس تىلىندەگى ۇزدىك شىعار­ما­لارىمەن قاتار, تاريحي حرو­نولو­گيالىق سۋرەتتەر دە ەنگىزىلگەن. ىرگەلى بيبليوگرافيالىق جۇ­مىس قازاقستان رەسپۋبليكاسى ۇلتتىق كىتاپحاناسىنىڭ بىرەگەي قورىنىڭ نەگىزىندە جاسالىپ, تۇڭعىش دە­رەك­كوز ولجاس سۇلەي­مەنوۆتىڭ «لي­تە­راتۋرنايا گازەتادا» لەونيد مار­تى­نوۆتىڭ ءسات ساپارى رەتىندەگى العىسوزىمەن 1959 جىلى جارىق كور­گەن «موي نارود», «ۆودا», «ۆ ستەپي» ولەڭدەرىنەن باستاۋ العان. حرونولوگيالىق دەرەككوزدەر ءتىزىمى بۇگىندە اقىننىڭ 4000-عا جۋىق جەكەلەگەن شىعارمالارى جانە ول تۋرالى ادەبيەتتەر, ءومىرى مەن شىعارماشىلىعى تۋرالى ماتەريالدار توپتاستىرىلعان بۇل سۇبەلى جيناقتا اندرەي ۆوزنەسەنسكي, روبەرت روجدەستۆەنسكي, ريمما كازاكوۆا سەكىلدى تۇلعالاردىڭ تۋىندىلارى الەم ادەبيەتىنە ەنگەن كوركەمسوز الىپتارى مەن قوعام قايراتكەرلەرىنىڭ ولجاس اقىنعا ارناعان پوەمالارى مەن ولەڭدەرى, جىلى لەبىزدەرى بار. عىلىمي-بيبليوگرافيالىق كور­­سەتكىش قازاق, ورىس جانە الەم­­نىڭ الۋان حالىقتارىنىڭ ءتى­­لىندە جازىلعان ەڭبەكتەردەن تۇ­رادى. اعىلشىن, فرانتسۋز, نەمىس, اراب, بولگار, بەنگال, ياكۋت, شۆەد جانە باسقا دا تىلدە جان-جاقتى سيپاتتالعان ەڭبەكتى قۇراستىرۋشى بەلگىلى شىعىستانۋشى-عالىم, پروفەسسور سافار ابدۋللو بۇل حرونولوگيالىق كورسەتكىشتىڭ فيلولوگتار, عىلىمي قىزمەتكەرلەر مەن زەرتتەۋشىلەر, كىتاپحاناشىلار مەن ىزدەنۋشى قالىڭ وقىرمان ءۇشىن باعا جەتپەس قازىنا ەكەندىگىن جەتكىزدى. تۇساۋكەسەر اياسىندا قازاق­ستان رەسپۋبليكاسى ۇلتتىق كىتاپ­حاناسى قورىنان اسەم بەزەن­دىرىلگەن «ولجاس الەمى» اتتى اكا­­دەميالىق كىتاپ كورمەسى ۇيىم­داستىرىلىپ, مەرەيتوي يەسى­نىڭ شىعارماشىلىعى مەن ءومى­رىن قام­تىعان بەينەماتەريال كورسەتىلدى. قانات ەسكەندىر, «ەگەمەن قازاقستان» الماتى سۋرەتتى تۇسىرگەندەر يۋري بەككەر, ايتجان مىرزانوۆ