قوستاناي. 13 مامىر. قوستانايلىق ءورت سوندىرۋشىلەر وتان قورعاۋشىلار كۇنى مەرەكەسى قارساڭىندا قازاقستان پرەزيدەنتىنىڭ قولىنان مەملەكەتتىك ناگرادالار العان بولاتىن. وبلىس ورتالىعىنداعى «ميراس» مادەنيەت ۇيىندە ولارعا قۇرمەت كورسەتىلدى. بۇل تۋرالى ng.kz سايتىنا سىلتەمە جاساعان egemen.kz ءتىلشىسى حابارلادى.
قوستاناي قالاسىنداعى №3 ءورت بولىمشەسىنىڭ كومانديرى دانيار قاليەۆ پەن ارقالىق قالاسىنداعى №2 مامانداندىرىلعان وتريادتىڭ ورتتەن قورعاۋشىسى بولاتبەك حامزە وتان قورعاۋشىلار كۇنى مەركەسى قارساڭىندا قازاقستان پرەزيدەنتىنىڭ قولىنان «ەرلىگى ءۇشىن» مەدالىن العان بولاتىن. الاپات ءورت كەزىندە ەرلىكپەن قازا تاپقان جىتىقارا قالاسىنداعى ءورت ءبولىمى كۇزەتىنىڭ باستىعى ماقسۇت يمانباەۆ 2-ءشى دارەجەلى «ايبىن» وردەنىمەن ماراپاتتالدى.
سەرجانت دانيار قاليەۆ بيىل اقپان ايىندا كوپ قاباتتى ۇيدە شىققان ورتتەن ەكى ەرەسەك ادام مەن ءۇش بالانى امان قۇتقارىپ قالدى. جوعارى قاباتتان تاعى دا 24 ادامدى امان ەسەن دالاعا شىعارىپ ۇلگەردى. سونىمەن قاتار اقپاننىڭ اياق كەزىندە وندىرىستىك نىسانداعى گاز تولتىرىلعان تسيستەرنانىڭ جارىلۋىنا جول بەرمەدى.
اعا سەرجانت بولاتبەك حامزا وتكەن جىلى ورتەنىپ جاتقان پاتەردەن ەر ادامدى الىپ شىعىپ, وعان العاشقى مەديتسينالىق كومەك كورسەتتى. 2015 جىلى جەلتوقساندا ارقالىق قالاسىنداعى جاتاقحانادا شىققان ءورتتى سوندىرۋگە قاتىستى. ول ءۇشىنشى قاباتقا شىعىپ, وندا كىشكەنتاي ەكى ءسابيدى تاۋىپ الىپ, ولاردى كورپەگە وراپ , تازا اۋاعا شىعاردى.
ال ءورت كەزىندە ەرلىكپەن قازا تاپقان ماقسۇت يمانباەۆقا تيەسىلى 2-ءشى دارەجەلى «ايبىن» وردەنى جىتىقارا قالاسىنداعى ونىڭ تۋىستارىنا تاپسىرىلاتىن بولادى. ماقسۇت وتكەن جىلى قاراشادا گاز بالونى جارىلعاندا جولداستارىن دەنەسىمەن جاۋىپ, ءوزى وت تولقىنىنىڭ سوققىسىنان قازا تاپقان بولاتىن.
ءنازيرا جارىمبەتوۆا.
دەرەك, فوتو: ng.kz.