قازاقستاندا زەينەتاقى جيناقتارىنىڭ جەتكىلىكتى شەكتەرىن ارتتىرۋ تۋرالى شەشىم الداعى مامىر ايىندا قابىلدانۋى مۇمكىن. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆ مالىمدەدى, دەپ حابارلايدى Egemen.kz.
ءمينيستردىڭ ايتۋىنشا, ءتيىستى وزگەرىستەر جاقىن ۋاقىتتا بەكىتىلۋى ىقتيمال.
ء«بىز بۇل وزگەرىستەردى تاياۋ ۋاقىتتا قابىلدايمىز. مۇمكىن, كەلەسى ايدا-اق وزگەرىستەر بەلگىلى بولادى», دەدى ول.
زەينەتاقى جيناعىن الۋ ءتارتىبى وزگەرەدى
ۆەدومستۆو باسشىسى اتاپ وتكەندەي, زەينەتاقى جيناقتارىنداعى جەتكىلىكتى شەكتەردىڭ ناقتى قالاي وزگەرەتىنى ءالى بەلگىسىز. بۇل ماسەلە مەملەكەتتىك ورگاندارمەن بىرلەسىپ تالقىلانىپ جاتىر.
ءمينيستردىڭ مالىمەتىنشە, ءتيىستى قاۋلى جوباسى ەكى رەت ۇسىنىلعان. العاشقى نۇسقادا شەكتەردى بولجامدى ينفلياتسيا دەڭگەيىنە سايكەس ارتتىرۋ كوزدەلسە, مەملەكەتتىك ورگاندار تاراپىنان ساناتتار بويىنشا ەسەپتەۋ ۇسىنىلعان.
ء«بىز قاۋلى جوباسىن جولدادىق, قازىر ۇسىنىستاردى كۇتىپ وتىرمىز. كەيىن ءبىر فورمۋلانى تاڭداپ, ونى جوباعا ەنگىزىپ, سوڭعى كەلىسۋگە جىبەرەمىز», دەدى اسقاربەك ەرتاەۆ.
زەينەتاقى جيناعى ارتىپ كەلەدى
ەسكە سالايىق, ۇكىمەت زەينەتاقى جيناقتارىنىڭ جەتكىلىكتى شەكتەرىن ارتتىرۋ ارقىلى ازاماتتاردىڭ جيناقتارىن ساقتاۋ جانە بولاشاقتا جوعارى زەينەتاقى قامتاماسىز ەتۋدى كوزدەپ وتىر. 2025 جىلدىڭ 1 قاڭتارىنان باستاپ بۇل شەكتەر ورتا ەسەپپەن 10 پايىزعا وسكەن. بۇعان دەيىن 2023-2025 جىلدار ارالىعىندا كورسەتكىشتەر وزگەرمەگەن ەدى.