رەسەيگە ەكسپورتقا شىعارىلادى
قازاقستان كاسىپكەرلەرى شىلدە ايىنان باستاپ رەسەيدىڭ ومبى قالاسىندا ازىق-ت ۇلىك جارمەڭكەسىن وتكىزىپ تۇراتىن بولدى. بۇل ماسەلە قازاقستان كاسىپكەرلەرى دەلەگاتسياسىنىڭ وسى وبلىسقا جاساعان ىسكەرلىك ساپارى بارىسىندا شەشىلدى.
رەسپۋبليكا اۋىل شارۋاشىلىعى ءمينيسترىنىڭ ورىنباسارى ەرلان نىسانباەۆ ساپار بارىسىندا وبلىس گۋبەرناتورى ۆيكتور نازاروۆقا ءبىرلەسىپ وتكىزەتىن ءبولشەك ساۋدا جارمەڭكەسىنىڭ كەستەسىن جاساۋدى ءوتىندى. وندا ومبى وبلىسىنىڭ ۇكىمەتىنە قازاقستان ونىمدەرىنە ارنالعان جارمەڭكەنى شىلدەنىڭ سوڭىندا وتكىزۋ ۇسىنىلدى. كاسىپكەرلەر بيزنەس-ميسسيا بارىسىندا سونداي-اق قازاقستانعا ومبىدان رەستوران جانە كونديتەر جابدىقتارىن, ال قازاقستاننان ومبى وبلىسى مەن رەسەيدىڭ باسقا دا ايماقتارىنا قىمىز جەتكىزۋ جونىندەگى ەكى كەلىسىمشارتقا قول قويدى. ىسكەرلىك ساپارى بارىسىندا قازاقستاننىڭ اۋىل شارۋاشىلىعى, تاماق, قۇرىلىس, حيميا جانە قاتتامالى زاتتار كەشەنى سالاسىنداعى 20 ءوندىرىسشىسى وزدەرىنىڭ وندىرىستىك مۇمكىندىكتەرىن كورسەتۋ مۇمكىندىگىنە يە بولدى.
كەزدەسۋ كەزىندە نىسانباەۆ ەكى جاقتىڭ دا ءوزارا ساۋدا-ەكونوميكالىق قارىم-قاتىناستى تەرەڭدەتىپ, بيزنەستى دامىتۋعا, سونىڭ ىشىندە اۋىل شارۋاشىلىعىنا باسىڭقىلىق بەرۋگە ءمۇددەلى بولىپ وتىرعاندارىن اتاپ ءوتتى.
«قازاقستان ءىرى اگرارلى ەل بولىپ تابىلادى. مۇندا سالا تولىق نارىقتىق باسقارۋ مودەلىنە كوشىرىلگەن, وسىنىڭ ارقاسىندا ينۆەستورلار ءۇشىن وتە تارتىمدى دا ءتيىمدى بولىپ وتىر. ەگەر جاقسى باستامالار بولىپ جاتسا, ءبىز ونى ەۋرازيالىق ەكونوميكالىق وداق شەڭبەرىندەگى ينتەگراتسيا پروتسەسى اياسىندا جەدەلدەتۋگە ءتيىسپىز. سوندىقتان, وسىنداي ءارتۇرلى ءپىشىمدەگى كەزدەسۋلەر, ۇنقاتىسۋ الاڭدارى قاجەت», – دەدى قازاقستان دەلەگاتسياسىنىڭ باسشىسى.
ساپار بارىسىندا ءوزارا ىنتىماقتاستىقتىڭ باسىڭقى باعىتى رەتىندە جارمەڭكەلەر الماسىپ تۇرۋ ەكەنى ايتىلدى. ءوز كەزەگىندە نازاروۆ جاڭا بىرلەسكەن كاسىپورىندار اشىپ, ساۋدا قارىم-قاتىناستارىن دامىتۋعا مۇددەلى ەكەندىكتەرىن اتاپ ءوتتى.
«ءبىزدىڭ وبلىسىمىز ەكى ەلدىڭ ءىرى كولىك دالىزىندە ورنالاسقان. سول سەبەپتى دە ءوزارا ساۋدا ۇيىمداستىرۋ ءۇشىن شەكارا ايماعىندا ءبىرتۇتاس لوگيستيكالىق ورتالىق اشۋ جونىندەگى جوبا بىزگە ماڭىزدى دا بولاشاعى زور باعىت بولىپ كورىنەدى. ومبى وبلىسىنىڭ ترانزيتتىك الەۋەتىن جۇزەگە اسىرۋ – ءبىزدىڭ باسىڭقى باعىتتارىمىزدىڭ ءبىرى», – دەدى وبلىس گۋبەرناتورى.
قازاقستان دەلەگاتسياسى بۇدان باسقا ومبى وبلىسىنىڭ بىرقاتار كاسىپورىندارىن ارالاپ كوردى. ول سونداي-اق قازاق ءتىلى مەن مادەنيەتى ورتالىعىنىڭ جۇمىسىمەن تانىسىپ, قازاقستاننىڭ ومبىداعى كونسۋلدىگىندە قازاق قاۋىمىمەن كەزدەستى.
رۋسلان يگىلىك