الدىڭعى كۇنى ۇشاقتان تۇسكەن بەتتە «اقتوبە-اقپارات» ورتالىعىندا وبلىستاعى بۇقارالىق اقپارات قۇرالدارى وكىلدەرىمەن كەزدەسۋ وتكىزىپ, ارىپتەستەرىمەن وي بولىسكەن پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ كەشە, جۇمىس ساپارىنىڭ ەكىنشى كۇنىندە حرومتاۋ اۋدانىندا بولىپ, سونداعى ءدوڭ تاۋ-كەن كومبيناتىنىڭ سپورت كەشەنىنىڭ, تاۋ-كەن كوللەدجىنىڭ, «حرومتاۋ كىرپىش زاۋىتى» جشس-نىڭ جۇمىسىمەن تانىستى.
ءماجىلىس دەپۋتاتى كەنشىلەر مادەنيەت ۇيىندە قالا تۇرعىندارىمەن, كاسىپورىندار مەن قوعامدىق ۇيىمدار وكىلدەرىمەن كەزدەستى. وبلىس اكىمى بەردىبەك ساپارباەۆ ءوز سوزىندە وڭىردەگى ەكونوميكالىق-الەۋمەتتىك جاعداي تۇراقتى ەكەنىن, الەۋمەتتىك مىندەتتەمەلەردىڭ ورىندالعانىن اتاپ ءوتتى. ازىق -ت ۇلىك باعالارىن ارزانداتۋ باعىتىندا بىرقاتار جۇمىس جۇرگىزىلىپ جاتقانىن تىلگە تيەك ەتتى.
س.ابدراحمانوۆ «ماڭگىلىك ەل» پاتريوتتىق اكتىسىنىڭ ءمان-ماڭىزىن ءتۇسىندىرىپ, ناسيحاتتاۋ اقتوبە جەرىنە كەلگەن دەپۋتاتتاردىڭ نەگىزگى ماقساتى ەكەنىن ايتا كەلىپ, بۇل يدەيانىڭ وزەگى تاۋەلسىزدىك پەن جالپىعا ورتاق ەڭبەك قوعامى ەكەنىن بايان ەتتى. «ماڭگىلىك ەل» پاتريوتتىق اكتىسى وسى جىلى ءساۋىر ايىندا وتكەن قازاقستان حالقى اسسامبلەياسىنىڭ ءححىV سەسسياسىندا قابىلدانعانىن, قۇجاتتا ءماڭگىلىك ەلدىڭ جەتى ۇستىنى – تاۋەلسىزدىك جانە استانا, جالپىۇلتتىق بىرلىك, بەيبىتشىلىك جانە كەلىسىم, زايىرلى مەملەكەت جانە جوعارى رۋحانيات, يننوۆاتسيا نەگىزىندەگى تۇراقتى ەكونوميكالىق ءوسىم, جالپىعا ورتاق ەڭبەك قوعامى, تاريح, مادەنيەت جانە ءتىل تۇتاستىعى, ۇلتتىق قاۋىپسىزدىك پەن جالپى الەمدىك جانە وڭىرلىك ماسەلەلەردى شەشۋگە قازاقستاننىڭ اتسالىسۋى نەگىزدەلگەنىن تارقاتا اڭگىمەلەدى.
ب.ساپارباەۆ پەن س.ابدراحمانوۆ كەشە تۇستەن كەيىن تاحاۋي احتانوۆ اتىنداعى وبلىستىق قازاق دراما تەاترىندا قالا جۇرتشىلىعى, ۇكىمەتتىك ەمەس ۇيىمدار, شاعىن جانە ورتا بيزنەس, ەتنومادەني بىرلەستىكتەر وكىلدەرىمەن جۇزدەستى. دەپۋتات «ءماڭگىلىك ەل» پاتريوتتىق اكتىسىنىڭ ءمان-ماعىناسى تۋرالى تاراتا باياندادى, سونىمەن قاتار, جەر ماسەلەسى تاقىرىبىنداعى اڭگىمە توڭىرەگىندە ورىن العان تۇسىنبەۋشىلىكتىڭ بەلگىلى ءبىر دارەجەدە اتقارۋشى بيلىك تاراپىنان ءتۇسىندىرۋ جۇمىستارىنىڭ كەمشىن بولعاندىعىنىڭ سالدارى دەپ سانايتىنىن دا اشىق ايتتى.
كەزدەسۋدە جۇمىس ورىندارىن اشۋ, مامان كادرلار دايارلاۋ, ورالماندار, تۇرعىن ءۇي سالۋعا جەر ءبولۋ جانە باسقا ماسەلەلەر اڭگىمە وزەگىنە اينالدى. «ماڭگىلىك ەل» ۇلتتىق يدەياسىن ءتۇسىندىرۋ ماقساتىندا اقتوبە جەرىنە كەلگەن پارلامەنت ءماجىلىسىنىڭ دەپۋتاتتارى سەرگەي سيمونوۆ, دانيا ەسپاەۆا, مۇحتار ەرمان, اسىلبەك سماعۇلوۆ, قۇرالاي قاراكەن مارتوك, مۇعالجار, تەمىر, شالقار جانە قوبدا اۋداندارىندا بولىپ, سايلاۋشىلارمەن كەزدەستى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى