ءبىزدىڭ ۇلان-بايتاق جەرىمىزدە جايىلىم دا, شابىندىق تا, سۋارمالى القاپ تا جەتىپ-ارتىلاتىنى بارشاعا ءمالىم. بۇل جەردىڭ بارلىعىن اۋىلدىقتار عانا يگەرىپ ەگىن ەگىپ, ءتۇرلى داقىلدار سەۋىپ, تىڭايتىپ, ءونىم الىپ وتباسىلارىن اسىرايتىنى انىق ەمەس. قول كۇشى جانە تاعى باسقا قاجەتتىلىكتەردى كەز كەلگەن تۇرعىن تاۋىپ, قامتي الا ما؟ سوندىقتان دا بولار فەرمەرلىك جانە شارۋا قوجالىعى جۇمىستارىن جۇرگىزەتىن جەردىڭ باسىم بولىگى بوس جاتىر, ءتىپتى تۇرعىن ءۇي قۇرىلىسىن جۇرگىزۋگە وتكىزىلىپ كەتكەنى دە جاسىرىن ەمەس. جەردى ءوز ماقساتىندا پايدالانۋ پروبلەماسى باياعىدا ءپىسىپ-جەتىلدى. ەگەر مەملەكەت وسى ماسەلەگە نازار اۋدارماسا اۋىل شارۋاشىلىعى سالاسى دامۋىن توقتاتا ما دەپ تە كۇدىكتەنەمىن. مۇنىڭ ارتى شەتەلدىك ازىق-ت ۇلىك ونىمدەرىنە بازارلارىمىز بەن دۇكەندەرىمىز تولىپ, مەملەكەتتىڭ ازىق-ت ۇلىكپەن قامتاماسىز ەتۋ قاۋىپسىزدىگىنە تىرەيتىن بە ەدى.
جەر – ءبىزدىڭ اتا-بابالارىمىزدان مۇرا بولىپ قالدى. جەر – ءبىزدىڭ بايلىعىمىز, اسىراۋشىمىز. سوندىقتان اۋىل شارۋاشىلىعى قاجەتتىلىگىنە پايدالانۋ ءۇشىن جەردى رىنوكتىق اينالىمعا ءتۇسىرۋ جونىندە قارالاتىن زاڭنامانى وتاندىق اۋىلشارۋاشىلىق قۇرىلىمدارى قولدار دەپ ويلايمىن. الاڭدايتىن ەشنارسە جوق. زاڭعا سايكەس, جەردى تەك قازاقستاندىقتار عانا جەكەمەنشىگىنە الىپ, پايدالانادى. جەر كودەكسىنە ەنگىزىلەتىن وزگەرتۋلەر اۋىلدىقتاردىڭ عانا ەمەس, اۋىل شارۋاشىلىعى سالاسىن دامىتۋعا نيەت ەتكەن قالالىقتاردىڭ دا بيزنەسىن وركەندەتەتىنىنە سەنەمىن. سەمەي زووتەحنيكالىق-ۆەتەرينارلىق ينستيتۋتىنىڭ 1995 جىلعى تۇلەگى رەتىندە ءوزىمدى مىسالعا السام, سپورتتاعى جەتىستىكتەرگە جەتكەن سوڭ جاتتىقتىرۋشىلىق جۇمىستى دا توقتاتىپ اۋىل شارۋاشىلىعى سالاسىن دامىتۋ ماقساتىمەن الماتى وبلىسى, بالقاش اۋدانىنا كەلدىم. العاشىندا شاعىن عانا جەردە شارۋا قوجالىعىن اشىپ, ونى كەڭەيتىپ, قوسىمشا جەر تەلىمدەرىن ساتىپ الا ءجۇرىپ 2000 جىلى مەنىڭ مەنشىگىمدە 5 مىڭ گەكتار جەر بولدى. 2007 جىلى جامبىل اۋدانى, مىڭباەۆ اۋىلىنا اۋىستىم. سول كەزدە اۋىل تولىقتاي قۇلدىراپ, جولى توزىپ, دۇرىس ينفراقۇرىلىمى دا بولماعان ەدى. ءوز ەسەبىمنەن ەلەكتر جەلىسىن, گاز قۇبىرىن تارتىپ, استىق ساقتاۋ قويماسىن قالپىنا كەلتىردىم. مال قورالارىن سالىپ, اۋىل تۇرعىندارىن تۇراقتى جۇمىس ورنىمەن قامتاماسىز ەتتىم. 2010 جىلى 500 باس قازاقتىڭ اسىل تۇقىمدى اق باس سيىرىن جانە 500 باس اۋليەكول اسىل تۇقىمدى بۇزاۋىن اكەلدىم. بۇگىندە ءبىزدىڭ شارۋا قوجالىعىمىزدا 4500 باس ءىرى قارا, 1500 باس جىلقى بار. مۇنىڭ سىرتىندا ءبىز جاسوسپىرىمدەر سپورت مەكتەبىن سالدىق. بۇگىندە اۋىل بالالارىنىڭ سۇيىكتى ورنىنا اينالعان بۇل مەكتەپتە سامبو, دزيۋ-دو, بوكسپەن 300-گە جۋىق بالا جاتتىعادى. بىلتىرعى جىلى ۋاقىت تالابىنا ساي بالاباقشا جانە وتباسىلىق جاتاقحانا سالىپ, پايدالانۋعا بەردىك. مىنە, بۇل اۋىل بيزنەسىنىڭ ءبىر جەمىسى.
جاقسىلىق ۇشكەمپىروۆ,
ماسكەۋ وليمپياداسىنىڭ
چەمپيونى, «جاقسىلىق» شارۋا قوجالىعىنىڭ توراعاسى
الماتى وبلىسى