ادەتتە, قوڭىر الا كيىممەن ءجۇرىپ, مەرەكەلىك شارا كەزدەرىندە يۋبكاسى مەن كوستيۋمى, باسىنا شەكەلەي قونعان پيلوتكاسى قاراتورى جۇزىنە جاراسىپ, بەلىن تاعالى بەلدىكپەن نىقتاپ, سىمداي تارتىلا قالعان قىزدار اسكەرىمىزدىڭ ءسانى. تەك ءسانى عانا ەمەس, ايبارى دا ەكەن. «وتانىم ءۇشىن نە نارسەگە دە دايىنمىن!» دەپ جىگەرلى ءتىل قاتقان اميناعا قاراپ وسىلاي وي ءتۇيدىم.
ءامينا كوشكىمباەۆا – قازاقستان رەسپۋبليكاسى اسكەري-تەڭىز كۇشتەرىنىڭ ساربازى. اقتاۋداعى اسكەري-تەڭىز بازاسىنىڭ قۇپيا بولىمىندە ءىس جۇرگىزۋشى بولىپ قىزمەت ەتەتىن ول, تياناقتىلىعىمەن, تىندىرىمدىلىعىمەن جانە وجەتتىگىمەن سىيلى. ماڭعىستاۋ وبلىسىنىڭ مۇنايلى جاڭاوزەن قالاسىندا 1987 جىلى ومىرگە كەلىپ, ءوندىرىستى ءوڭىردىڭ ورەنى بولعان قىزدىڭ اڭسارى مۇلدەم باسقا سالاعا اۋدى. قيالى ءوز بولاشاعىن ادەمى اسكەري فورمامەن ساپ تۇزەپ بارا جاتقان ساربازدار اراسىنان ىزدەتتىردى. قاتار-قۇربىلارىنىڭ كوبى مۇناي سالاسىنا جۇمىسقا تۇرۋعا قۇلشىنىپ جاتقاندا, ءامينانى كىشكەنتاي كەزىنەن فورماعا دەگەن قىزىعۋشىلىعى اسكەري سالاعا قاراي تارتا جونەلدى.
وتباسى, بالا تاربيەسىمەن ءبىراز اينالىسقان سوڭ ول اقىرى ءوز ارمانىنا قاراي قول سوزىپ, 2009 جىلى اسكەر قاتارىنا قابىلداندى. قازىر اقتاۋ قالاسىنداعى اسكەري تەڭىز-بازاسىندا 1-دارەجەلى ستارشينا لاۋازىمىندا جۇرگەن ول بازادا قىز قۇربىلارىنىڭ قاتارى كوبەيىپ كەلە جاتقاندىعىن ايتادى. – العاشىندا قىزدار از ەدى, قازىر 20-عا تارتا قىزدار بارمىز. «قىزدارعا اسكەري ءومىر قيىن ەمەس پە؟» دەپ جاتادى, ءوز قىزمەتىڭە دەگەن ماحاببات جانە وتانىڭا دەگەن پاتريوتتىق سەزىم قيىندىقتىڭ ءبارىن ەڭسەرەدى, ءتوزىمدى بولۋعا, جىگەرلى بولۋعا شىڭدايدى. اسكەري كيىممەن ءجۇرۋ, قارۋ اسىنۋ, ولاردى شاشىپ-قۇراستىرۋ, پوليگونعا بارىپ اسكەري سىناق تاپسىرۋ, دابىلعا تۇرۋ جانە اسكەري سالانىڭ تەمىردەي ءتارتىبى قيىن بولعانمەن, اسەرلى. ءوزىڭنىڭ تاۋەلسىز قازاقستاننىڭ قورعاۋشىسى ەكەنىڭدى سەزىنە ءجۇرىپ ەڭبەك ەتسەڭ – قيىن جۇمىستىڭ وزىنەن راحات الاتىن بولاسىڭ, – دەيدى ءامينا تولەگەنقىزى.
سويتسەك, قايسار مىنەزدى جاۋىنگەر قىز جانى نازىك ونەرپاز بولىپ شىقتى. ماڭعىستاۋ وبلىسىنداعى مۇرات وسكىنباەۆ اتىنداعى فيلارمونيا ساحناسىندا ءان شىرقاعان ارۋ اسكەري سالادا دا ءوز ونەرىن وگەيسىتپەپتى. 2012 جىلى وتار قالاسىندا وتكەن «جاس ۇلان» سارباز اندەرى بايقاۋىندا ەكىنشى ورىن السا, 2013 جىلى تاراز قالاسىندا وتكەن اتالمىش بايقاۋدا لاۋرەات اتانعان. 29011 اسكەري ءبولىمىنىڭ كۇندەلىكتى تىنىس-تىرشىلىگىنە بەلسەندى قاتىساتىن ءا.كوشكىنباەۆا ءتۇرلى بايقاۋلار مەن فەستيۆالدەرگە, پاتريوتتىق اكتسيالارعا قاتىسىپ, ءوز تالانتىمەن, شىعارماشىلىق قابىلەتىمەن اسكەري ءبولىمنىڭ نامىسىن قورعاپ ءجۇر. جۇمىستاعى جاۋاپتىلىعىنا, تاباندىلىعىنا جانە تالانتىنا وراي قازاقستان رەسپۋبليكاسى قارۋلى كۇشتەرىنە 20 جىل, قازاقستان رەسپۋبليكاسى قارۋلى كۇشتەرى اسكەري-تەڭىز كۇشتەرىنە 20 جىل مەرەكەلىك مەدالدارىمەن ماراپاتتالعان. ء«اليا مەن مانشۇكتىڭ, حيۋازدىڭ سىڭلىلەرىنىڭ جاسىق بولۋعا حاقى جوق», دەيدى ءامينا. ىشكى ىستەر سالاسىندا قىزمەت ەتەتىن جولداسى ەكەۋى وتباسىندا ۇل بالا تاربيەلەپ وتىر. قازىر 3-سىنىپتا وقيتىن ۇلىن ءامينا بولاشاقتا اسكەري سالادان كورگىسى كەلەدى.
سول سەبەپتى ونى باۋىرجان مومىش ۇلى اتىنداعى اسكەري مەكتەپتە وقىتقىسى كەلەتىندىگىن ايتتى. – الدىمدا ارمان-جوسپارلارىم كوپ. الدىمەن, ءوزىمنىڭ سۇيىكتى قىزمەتىم مەن ونەرىمدى ۇشتاستىرىپ, اسكەري مۋزىكانت بولعىم كەلەدى. وسى ماقساتىما جەتۋ ءۇشىن ءبىلىم الۋدى ويلاپ ءجۇرمىن. ەكىنشىدەن, قازاق سانىن كوبەيتۋگە ءوز ۇلەسىمدى قوسۋدى دا انىلىق پارىز سانايمىن. قۇدايعا شۇكىر, ەلىمىز امان, جەرىمىز تىنىش. بەيبىت زامان. اسكەريلەردىڭ بارلىق جاعدايى جاسالىنعان. جالاقى مەرزىمىندە بەرىلىپ تۇرادى. بىزگە وقۋعا دا, جۇمىس جاساۋعا دا مۇمكىندىك مول. اللا ەلىمىزدى وسى تىنىشتىعىنان ايىرماسىن, – دەيدى ول سابىرلى قالىپتا. دۇرىس-اق. وتاندى قورعاۋمەن بىرگە ونىڭ بولاشاق بۋىنىن كوبەيتۋ, تاربيەلەۋ دە – نەگىزگى مىندەتتەردىڭ ءبىرى. ءامينا بۇل تۋرالى دا ويلانادى ەكەن. 1-دارەجەلى ستارشينا ءا.كوشكىمباەۆا بىزبەن قازاقستانداعى بارشا ارىپتەستەرىنە ساتتىلىك تىلەپ قوشتاستى. ءجۇزى جىلى بولعانمەن, مىنەزى تالاپشىل, جۇرەگى «وتانىم» دەپ سوققان قايسار قىزعا ءبىز دە ساتتىلىك تىلەدىك.
گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى