تاعى دا جەڭىس! قازاق ەلىنىڭ مەرەيىن تاسىتقان, قارسىلاستاردىڭ جىگەرىن جاسىتقان تاعى ءبىر جارقىن جەڭىسكە قول جەتتى. بۇل جەڭىس جالعىز كەلگەن جوق. اۋىر سالماق بويىنشا الەم چەمپيونى التىن مەدالىمەن قاتار, ابسوليۋتتىك الەم چەمپيونى التىن مەدالىن دە قوسا الدى. ول – استانالىق سپورتشى قۋانىش قابىلدين.
ءساۋىر ايىنىڭ 17-ءسى مەن 22-ءسى ارالىعىندا ءباا استاناسى ابۋ-دابيدە دجيۋ-دجيتسۋدان الەم بىرىنشىلىگى ءوتىپتى. وندا جاتتىقتىرۋشى قانات ءالين باستاپ بارعان قازاقستاندىق سپورتشىلار كوماندالىق جارىستا ءۇشىنشى ورىندى جەڭىپ العان. «برازيليادان شىققان بۇل سپورت ءتۇرى قازىر بۇكىل الەمگە كەڭىنەن جايىلىپ بارادى. ناعىز ەرلەر شايقاساتىن الاڭ. اسىرەسە, ءباا-دە دجيۋ-دجيتسۋ قاتتى دامىپ كەلەدى دەسەك بولادى. بۇل سپورت تۇرىمەن ءبىزدىڭ ەلدىڭ ازاماتتارى كوپ تانىس بولماۋى مۇمكىن. سوندىقتان, قىسقا قايىرىپ تۇسىندىرگەندە, دجيۋ-دجيتسۋ جالپىعا ءمالىم دزيۋدوعا كوپ ۇقسايدى», دەدى چەمپيون.
اۋەجايداعى ابىر-سابىر دا دجيۋ-دجيتسۋ سپورتىنىڭ انىق-قانىعىنا ءبارىبىر قانىعا الماعان سوڭ ينتەرنەتكە جۇگىنگەنىمىز راس. وندا كورگەنىمىز بويىنشا, بۇل سپورت ءتۇرى دزيۋدوعا قاراعاندا الدەقايدا كۇردەلى ءارى قاۋىپتى ەكەنىن بايقادىق. سەبەبى, باسى كادىمگى شىعىس جەكپە-جەگى سياقتى باستالىپ, اياقپەن تەۋىپ, قولمەن ۇرۋدىڭ نەشە ءتۇرىن قولدانادى. ءساتى تۇسكەندە قويان-قولتىق بەلدەسە كەتىپ, قارسىلاسىن الىپ ۇرادى ەكەن دە, تۇرعىزباي تاستاۋعا ارەكەت ەتەدى. ال جەردە جاتىپ بولاتىن ايقاستا ءبىر-ءبىرىن بارىنشا تۇنشىقتىرىپ, قول-اياعىن بۇراپ جەڭىلگەنىن مويىنداتۋعا اياماي ماجبۇرلەيدى ەكەن.
ال ەندى بۇگىنگى باتىرعا قايتا ورالساق, ول اۋىر سالماقتا التى قارسىلاسىن الىپ ۇرىپ, تالاسسىز كۇش يەسى ەكەنىن مويىنداتىپ بارىپ جەڭىس تۇعىرىنا كوتەرىلگەن. ناتيجەسىندە ابسوليۋتتىك چەمپيوناتقا قاتىسۋعا ۇسىنىس تۇسكەن. ۇيىمداستىرۋشىلار مەن كورەرمەننىڭ قىزۋ قولداۋىنا يە بولعان قازاقستاندىق سپورتشى ءوز كەلىسىمىن بەرىپ, بۇل جارىستا 12 الىپپەن جەكپە-جەككە ءتۇسىپ, ءبارىن دە تىزە بۇكتىرەدى. ءسويتىپ, ءبىر جارىستا ەكى بىردەي التىن مەدالدى يەلەنىپ, ەل مەرەيىن تاسىتادى.
نۇرباي ەلمۇراتوۆ,
«ەگەمەن قازاقستان»