اۋىر اتلەتيكا. تاشكەنت قالاسىندا اۋىر اتلەتيكادان ازيا چەمپيوناتى اياقتالدى. چەمپيوناتقا قازاقستاننان ەكى سپورتشى قاتىسىپ, ەكەۋى دە التىن مەدالدى جەڭىپ الدى. 85 كيلوعا دەيىنگى سالماقتا دەنيس ۋلانوۆ پەن 94 كيلوعا دەيىنگى سالماقتا كۇش سىناسقان ۆلاديمير سەدوۆ ازيا چەمپيونى اتاندى.
دزيۋدو. گەرمانيانىڭ بەرلين قالاسىندا ەۋروپا كۋبوگى ءۇشىن جارىس ءوتتى. بۇل سىندا دامير بولاتبەكوۆ 50 كيلو سالماقتا كۇمىس مەدالدى يەلەندى.
قول كۇرەسى. تاشكەنت قالاسىندا ارمرەستلينگتەن جاسوسپىرىمدەر, جاستار جانە ەرەسەكتەر اراسىندا ازيا چەمپيوناتى بولىپ ءوتتى. وعان 21 مەملەكەتتەن 770 سپورتشى قاتىستى. قازاقستان قۇراماسى 20 التىن مەدال جەڭىپ الىپ, كوماندالىق ەسەپتە ءبىرىنشى ورىندى يەلەندى.
بوكس. پاۆلوداردا جاستار اراسىندا ازيا چەمپيوناتى باستالدى. وعان 18 ەلدىڭ سپورتشىلارى قاتىسۋدا. چەمپيونات حالىقارالىق بوكس قاۋىمداستىعىنىڭ (AIBA) ەرەجەسىنە سايكەس 10 سالماق دارەجەسى بويىنشا وتەدى. جارىسقا 15 ادام تورەلىك جاسايدى.
قازاق كۇرەسى. وسى كۇندەرى ەلىمىزدىڭ ءار ايماعىندا «قازاقستان بارىسى» تۋرنيرىنە ىرىكتەۋ جارىستارى ءوتىپ جاتىر. الماتىدا ۆيكتور دەميانەنكو «الماتى بارىسى» اتانسا, قىزىلوردادا ەلامان ەرعاليەۆ «سىر بارىسى» تۋرنيرىن جەڭىپ الدى. ماڭعىستاۋ وبلىسىندا ەربول يگىلىك «اقتاۋ بارىسى» اتاعىن يەلەندى. ەندى ولار «قازاقستان بارىسى» تۋرنيرىنە قاتىسادى.
ۆەلوسپورت. قىزىلوردادا جاسوسپىرىمدەر اراسىندا ۆەلوسپورتتان قازاقتان شىققان تۇڭعىش الەم چەمپيونى, كسرو-عا ەڭبەگى سىڭگەن سپورت شەبەرى مارات ساتىبالديەۆتىڭ جۇلدەسىنە ارنالعان رەسپۋبليكالىق ۆەلوجارىس اياقتالدى. بيىل جەتىنشى رەت وتكەن جارىسقا ەلىمىزدىڭ 10 وبلىسىنان 17 كوماندا, 150-گە جۋىق سپورتشى قاتىستى. 57 شاقىرىمدىق توپتىق جارىستا گلەب برۋسەنسكي (تالدىقورعان قالاسى) جەڭىمپاز اتاندى. قىزدار اراسىندا 24 شاقىرىمدىق توپتىق جارىستا اقتولقىن ءابدىجاپپار (قىزىلوردا وبلىسى) باس جۇلدەنى جەڭىپ الدى.
فۋتبول. قازاقستان پرەمەر-ليگاسىنىڭ 8-تۋرى ءوتتى. وسى تۋردىڭ باستى ويىنى «استانا» مەن «قايرات» كوماندالارىنىڭ اراسىندا بولدى. بۇل ماتچتا الاڭ يەلەرى 1:0 ەسەبىمەن جەڭىسكە جەتتى. باسقا كەزدەسۋلەر مىناداي ەسەپپەن اياقتالدى: «ورداباسى» (شىمكەنت) – «اقجايىق» (ورال) 1:0, «توبىل» (قوستاناي) – «تاراز» (تاراز) 1:0, «جەتىسۋ» (تالدىقورعان) – «ەرتىس» (پاۆلودار) 0:3, «شاحتەر» (قاراعاندى) – «اتىراۋ» (اتىراۋ) 0:0, «اقتوبە» (اقتوبە) – «وقجەتپەس» (كوكشەتاۋ) 1:0.
«ەگەمەن-اقپارات»