«سىر ەلى – جىر ەلى». ەجەلدەن قالىپتاسقان وسى ۇعىمنىڭ راستىعىن قىزىلوردالىق ونەرپازداردار ۇنەمى دالەلدەپ كەلەدى. وسى ورايدا بىرنەشە ونەر ۇجىمىن بىرىكتىرىپ وتىرعان وبلىستىق فيلارمونيانىڭ بي ۇجىمى دا ۇلت رۋحانياتىنا ەلەۋلى ەڭبەك ءسىڭىرىپ كەلەدى. توقمەيىلسۋگە بولماس, سوڭعى جىلدارى فيلارمونيا ۇجىمدارى گاسترولدىك ساپارلارىنىڭ شەكاراسى كەڭەيدى. بۇگىنگى تاڭدا ولار قازاق جۇرتىمەن شەكتەلىپ قالماي, تورتكىل الەمدى شارلاپ, قاسيەتتى ونەرىمىزدى پاش ەتىپ ءجۇر. ماسەلەن, «توميريس» بي ءانسامبلى جۋىردا امەريكانىڭ تالعامپاز جۇرتىن ءوز ونەرلەرىمەن ءتانتى ەتتى.
اتالعان ونەر ۇجىمى الدىمەن تۇركياعا بارىپ, ءارى قاراي امەريكا استى. «بۇل ءبىزدىڭ ءبيشى قىزدارىمىزدىڭ مۇحيتتىڭ ارعى جاعىنداعى مەملەكەتكە العاشقى ساپارى. ايتا كەتەيىك, «توميريس» بي ءانسامبلى 2001 جىلى قۇرىلعان. قازىرگى كۇنى ءانسامبلدىڭ قۇرامىندا 28 حورەوگروف-ءبيشىمىز بولسا, قورجىنىمىزدا 80-نەن استام بي قويىلىمدارى بار. ونىڭ باسىم بولىگى قازاق حالقىنىڭ بيلەرى», – دەيدى اتالعان بي توبىنىڭ جەتەكشىسى گۇلبانۋ مىرزابەكوۆا.
سىرداعى ونەر ۇجىمىنىڭ گاسترولدىك ساپارعا تۇركسوي ۇيىمىنىڭ شاقىرتۋىمەن بارعانىن, تۇركيا رەسپۋبليكاسىنىڭ پرەزيدەنتى حالىقارالىق تۇركى مادەنيەتىن دامىتۋ ۇيىمى دەلەگاتسياسىن بەستوبە سارايىندا قابىلداعانىن بىلەتىن ەدىك. «الدىمەن باۋىرلاس جۇرتتىڭ انكارا جانە بولۋ قالالارىندا قازاق حالقىنىڭ بي ونەرىن كورسەتتىك. ءارى قاراي اقش-قا بارىپ, نيۋ-يورك جانە ۆاشينگتون ساحنالارىندا ۇلتتىق ونەرىمىزدى تالعامپاز كورەرمەننىڭ نازارىنا ۇسىندىق»,– دەپ اعىنان جارىلعان گۇلبانۋ مىرزابەكوۆا قازاقتىڭ ۇلتتىق بي ونەرىن جاقسى قابىلداپ, ىستىق ىقىلاسىن بىلدىرگەنىن جەتكىزدى.
ايتۋىنشا, بيشىلەرىمىز «ادەمى-اي», «دالا قىزى», «بالبىراۋىن» سەكىلدى بيلەردى ۇسىنعان. كورەرمەندەر قۇرمەت-قوشەمەت كورسەتىپ, قازاق ەلىنىڭ سالت-داستۇرىنە, سونىڭ ىشىندە بي ونەرىنە قىزىققاندار سان الۋان سۇراقتار قويىپتى. وسىلايشا, قانداي ەلگە بارسا دا جۇرتتىڭ ەرەكشە ىقىلاسىنا بولەنىپ جۇرگەن «توميريس» بي انسامبلىنە تالعامى بيىك اقش جۇرتشىلىعى دا ءدان ريزا بولىپتى. ۇلتتىق قۇندىلىعىمىزدى بيمەن جەتكىزگەن ونەرلى قارىنداستارىمىزعا تىك تۇرىپ قوشەمەت كورسەتىپتى. ونەردە شەكارا جوق دەگەن وسى. ال بي امبەگە ورتاق ونەر. ول قاي ەلدىڭ ساحناسىندا ورىندالسا دا جۇرەككە جەتەدى, كوڭىلدى كوتەرىپ, ادام جانىن رۋحاني لاززاتقا بولەيدى.
ايتا كەتەيىك, قىزىلوردا فيلورمونياسىنىڭ ونەرپازدارى بۇعان دەيىن رەسەي, تاتارستان, وزبەكستان, تاجىكستان, گرۋزيا جانە تۇركيا ەلدەرىندە ونەر كورسەتتى. ەندى الداعى مامىر ايىندا كورشىلەس وزبەكستانعا گاسترولدىك ساپارعا شىققالى وتىر.
ەرجان بايتىلەس,
«ەگەمەن قازاقستان»
قىزىلوردا