تۇراقتىلىق تۇعىرى

«الەم. ءححى عاسىر» مانيفەسى.

ورتالىق كوممۋنيكاتسيا­لار قىزمەتىندە ەلباسىنىڭ «الەم. ءححى عاسىر» مانيفەسىنە ارنالعان بريفينگ ءوتتى. وعان پارلامەنت ءماجىلىسىنىڭ دەپۋتاتى احمەت مۋرادوۆ پەن ەنەرگەتيكا مينيسترلىگى اتوم جانە ەنەرگەتيكالىق قاداعالاۋ مەن باقىلاۋ كوميتەتى توراعاسىنىڭ ورىنباسارى تيمۋر جانتيكين قاتىسىپ, مانيفەستىڭ ماڭىزدىلىعى جايىندا ايتىپ بەردى. ا.مۋرادوۆتىڭ ايتۋىنشا, مەملەكەت باسشىسىنىڭ مانيفەسى ارقىلى الەمدىك قوعامداستىق كەزەكتى رەت قازاقستاننىڭ بەيبىتسۇيگىش ەل ەكەنىنە كوز جەتكىزدى. «قازىرگى تاڭدا يادرولىق قارۋعا يە بولۋ الەمدىك تۇراقتىلىققا تىكەلەي قاۋىپ توندىرۋمەن بىردەي. سوندىقتان قارۋسىزدانۋدىڭ ماڭىزى زور. وسىنى ەسكەرگەن نۇرسۇلتان نازارباەۆ ءوزى­نىڭ مانيفەسى ارقىلى الەمدى بەيبىتشىلىك­كە شاقىردى. مۇنداي باستاما كوتەرۋگە ءبىزدىڭ ەل­باسىنىڭ تولىق مورالدىق قۇقى بار. سەبەبى, پرەزيدەنتىمىز يادرولىق قارۋدان باس تارتىپ, سىناق الاڭىن جابۋ ارقىلى قارۋ­سىزدانۋدىڭ ەڭ جارقىن ۇلگىسىن كورسەتىپ بەردى. سونداي-اق, قازاق دالاسىندا بوي كوتەرگەن «سەمەي-نەۆادا» انتيادرولىق قوزعالىسى الەمدىك دەڭگەيدە قولداۋ تاۋىپ, سونىڭ ناتيجەسىندە 5 يادرولىق پوليگون جابىلدى», – دەگەن ءماجىلىس دەپۋتاتى مانيفەستىڭ بۇل جولى دا اۋىر جۇك ارقا­لاعانىن اتاپ ءوتتى. سونىمەن قاتار, ا.مۋرادوۆ ەلباسىنىڭ الەمدىك ارەناداعى ابىروي-بەدەلىنىڭ ارقاسىندا قازاقستان كەلىسىم مەن تۇراقتىلىقتىڭ سيمۆولى جانە ءارتۇرلى جاھاندىق ماڭىزى بار باسقوسۋلار وتەتىن ءتيىمدى الاڭ رەتىندە تانىلىپ ۇلگەرگەنىن تىلگە تيەك ەتتى. بۇل جونىندە ول: «ەلباسى ءوز مانيفەسىندە جاھان ەلدەرىن قاۋىپسىزدىك جونىندە كەڭەسۋ ءۇشىن قازاقستانعا شاقىرىپ, الەمگە قاۋىپ ءتوندىرىپ تۇرعان كيبەرتەرروريزم ماسەلەسىندە تالقىلايتىن تۇستاردىڭ كوپ ەكەنىنە ەرەكشە نازار اۋداردى. بۇگىندە بۇل ۇسىنىس الەمدىك قوعامداستىق تاراپىنان لايىقتى قولداۋ تاۋىپ, وڭ پىكىرلەر ايتىلۋدا. بۇنىڭ ءبارى بەيبىتشىلىكتىڭ جارشىسى بولعان قازاقستاننىڭ وسىعان دەيىنگى يگى ىستەرىنىڭ ناتيجەسى»,– دەدى. ودان بولەك, ءماجىلىس دەپۋتاتى اتالعان مانيفەستىڭ بۇۇ-نىڭ رەسمي قۇجاتى بولىپ بەكىتىلگەنىنە نازار اۋدارىپ, بۇل قادام بارشا قازاقستاندىق ءۇشىن كەزەكتى جەڭىس بولىپ سانالاتىنىن ايتتى. ءوز كەزەگىندە ت.جانتيكين ماني­فەستىڭ باستى ماقساتى جەر بەتىندە بەيبىتشىلىكتى ساقتاپ, بولاشاق ۇرپاققا تۇراقتى, گۇل­دەنگەن, وركەنيەتتى الەمدى امانات ەتۋ ەكەنىن جەتكىزدى. «قازىر جاھاندىق گەوساياسي احۋالدىڭ تۇراقسىزدانۋىنا ءوز ماسەلەلەرىن كۇش قولدانۋ ارقىلى شەشىپ ۇيرەنىپ قالعان بەلگىلى ءبىر توپتاردىڭ ارەكەتتەرى سەبەپ بولۋى مۇمكىن. بۇل جەردە ءبىرىنشى كەزەكتە يادرولىق قارۋى بار مەملەكەتتەر مەن كوز­دەگەن ماقساتىنا جەتۋ ءۇشىن كەز كەلگەن قادامعا بارۋعا دايىن تەرروريستىك توپتار ەسكە تۇسەدى. مىنە, ەلباسى الەمنىڭ نازارىن وسى ماسەلەگە اۋدارۋ ارقىلى, بۇل تۇيتكىلدىڭ قان­شالىقتى وزەكتى ەكەنىن, ونى ەشقاشان كۇن تارتىبىنەن تىس قالدىرۋعا بولمايتىنىن ايتتى», – دەدى كوميتەت توراعاسىنىڭ ورىنباسارى. ودان بولەك, بريفينگ بارىسىندا تومەن بايىتىل­عان ۋران بانكىنىڭ قازاقستاندا قۇرىلۋ جايى ءسوز بول­دى. ت.جانتيكيننىڭ سوزىنە قاراعاندا, بۇل جوبا نەگىزىنەن يادرولىق قارۋدان تونەتىن قاۋىپ­تىڭ الدىن الۋعا باعىتتالعان. ال ونى جۇزەگە اسى­رۋ ءۇشىن قازاقستاننىڭ تاڭدالۋىندا مەملەكەتتىڭ ءوز ءوتىنىشى ەسكەرىلگەن. سەبەبى, ءبىزدىڭ بۇل سالاداعى مول تاجىريبەمىز جەمىستى جۇمىس ىستەۋگە مۇمكىندىك بەرەدى. ەلامان قوڭىر, «ەگەمەن قازاقستان»