قوستاناي. 1 مامىر. قوستاناي قالاسىندا بيىل 14-ءشى رەت وتكەن حالىقارالىق «التىن ميكروفون» بالالار ءان بايقاۋى مارەگە جەتتى. وعان بالالار قازاقستاننىڭ كوپتەگەن وبلىستارىنان, ليتۆادان, وزبەكستاننان, رەسەيدەن قاتىستى. بايگەنىڭ باس جۇلدەسى ليتۆاعا كەتتى. بۇل تۋرالى kstnews.kz سايتىنا سىلتەمە جاساعان egemen.kz ءتىلشىسى حابارلادى.
ءۇش كۇن بويى 74 جاس تالانت حالىقارالىق ءان بايقاۋىنىڭ باس جۇلدەسى ءۇشىن باسەكەگە ءتۇستى. جاس بويىنشا ءۇش كاتەگورياعا بولىنگەن جاس دارىنداردىڭ ەڭ كىشكەنتايى 4 جاستا بولدى. ءبۇلدىرشىن انشىلەردىڭ بارلىعى دا كورەرمەنىن تاڭقالدىردى, انمەن سۋسىنداتتى دەۋگە بولادى. بيىل قازىلار القاسى بالالاردىڭ انىمەن قاتار ولاردىڭ ساحنا كيىمىنە, ورىنداعان شىعارماسىنا وراي جاساعان وبرازىنا دا كوڭىل ءبولدى.
بايقاۋ قورىتىندىسى بويىنشا, ءۇشىنشى ورىندى قوستانايلىق جاس انشىلەر سوفيا كيم, كاميللا كامارگينا, الماتىلىق ارۋجان توقتاعان مەن راۋشان قالباەۆلار الدى. ەكىنشى ورىن قوستانايلىقتار دياس توقىشەۆ, نۇراي كۇدەربەكوۆا, مادينا داكيشەۆا جانە سانكت-پەتەربۋرگتەن كەلگەن ەكاتەرينا گيلمان يەلەندى. ءبىرىنشى ورىن ورال قالاسىنان كەلگەن مارات دۋمان مەن ليساكوۆ قالاسىنان قاتىسقان گاۋحار رۋستەمقىزىنا جانە بەلورۋستەن كەلگەن ۆالەريا ازارەنكوعا بۇيىردى. بايقاۋدىڭ گران-پري جۇلدەسىن بەلگىلى كومپوزيتور كەڭەس دۇيسەكەەۆ باستاعان قازىلار القاسى ليتۆادان كەلگەن كارولينا ليندوعا لايىق دەپ تاپتى.
بايقاۋدا كورەرمەندەردى دە, قازىلار القاسىن دا تاڭداي قاقتىرعاندار از بولمادى. قوستاناي وبلىسىنىڭ ليساكوۆ قالاسىنان كەلگەن گاۋحار رۇستەمقىزى فرانتسۋز تىلىندە Je suis malade ءانىن ورىنداعاندا بۇكىل زال تۇرىپ كەتتى جانە جاس تالانت ساحناعا قايتا شىعىپ, تاعزىم ەتتى. بۇكىل دۇنيەجۇزىلىك فەستيۆالدەر مەن ارتيستەر ۇيىمىنىڭ مۇشەسى سەرگەي ساۆەنكوۆ تالانتتى قىزدى سانكت-پەتربۋرگتە وتەتىن «پۋت ك زۆەزدام» ءان بايقاۋىنا شاقىردى جانە جول شىعىنىنىڭ بارلىعىن وزدەرى وتەيتىنىن دە ايتتى.
ءنازيرا جارىمبەتوۆا.
دەرەك, فوتو: kstnews.kz.