ديقانعا بەرىلەتىن سۋبسيديانىڭ تيىمدىلىگى ەسكەرىلەدى

كوكتەمگى دالا جۇمىستارىنا اتتانىس الدىندا قوستانايدا اۋىل شارۋاشىلىعى ءمينيسترى اسىلجان مامىتبەكوۆ پەن وبلىس اكىمى ارحيمەد مۇحامبەتوۆتىڭ قاتىسۋىمەن «اگروبيزنەس-2020» باعدارلاماسى شەڭبەرىندە اگرو­ونەركاسىپ كەشەنىن مەملەكەت تاراپىنان قولداۋ ماسەلەلەرى بو­يىنشا كەڭەس ءوتتى. كەڭەس باستالماس بۇرىن اۋىل شارۋاشىلىعى ءمينيسترى قوستاناي وڭىرىندەگى اۋىلشارۋاشىلىق ونىمدەرىن وڭدەۋ كاسىپورىندارى ۇيىم­داستىرعان شاعىن كورمەنى ارالاپ كوردى. يندۋستريالاندىرۋ جىلدارىنان بەرى وبلىستىڭ اۋىل شارۋاشىلىعى سالاسىنداعى جۇزەگە اسقان ينۆەستيتسيالىق جوبالاردىڭ ارقاسىندا وڭدەۋ كاسىپورىندارى ءبىرشاما دامىدى. كورمەدە نان, شۇجىق, ءسۇت, كونديتەر ونىمدەرى كورسەتىلدى. ال بۇگىنگە دەيىن وبلىستىڭ اگروونەركاسىپ سالاسىندا قۇنى 67 ميلليارد تەڭگە بولاتىن 162 ينۆەستيتسيالىق جوبا ومىرگە جولداما الىپ, 3 مىڭ جۇمىس ورنى اشىلدى. سالانىڭ ەكسپورتتىق الەۋەتى دە ارتىپ كەلەدى. وسىنىڭ بارلىعى مەملەكەت تارپىنان جاسالعان قولداۋدىڭ ارقاسىندا بولىپ وتىر. ءمينيستردىڭ وبلىسقا ساپارى كوكتەمگى دالا جۇمىستارى باستالار شاقتىڭ قارساڭىندا بولعاندىقتان كەڭەستە بۇل ماسەلە الدىمەن ءسوز بولدى. بيىل وبلىستا جالپى ەگىس كولەمى 4,700 ميلليون گەكتاردى قۇرايدى. ونىڭ ىشىندە 3,7 ميلليون گەكتاردى بيداي القابى الادى. مايلى داقىلدار 315 مىڭ گەكتارعا ەگىلەدى, 250 مىڭ گەكتار مالازىعىندىق شوپتەرگە تيەسىلى. قوستاناي وڭىرىندەگى بيىلعى ديقان كوكتەمىنىڭ جىل­داعىدان جاڭالىعى دا بار. ول الدىمەن مەملەكەت تاراپىنان بەرىلەتىن سۋبسيدياعا بايلانىستى. بيىلعى سۋبسيديانىڭ ءتۇرى وزگەر­گەنمەن, ول قارجى ەش جاق­­قا كەت­پەيدى, ءبارىبىر سول اۋىل­­شا­رۋاشىلىق تاۋار ءوندىرۋ­شىلەرى­نە قايتا بەرىلەدى. بۇرىن سۋبسي­ديا ءداندى داقىلدار ءۇشىن گەكتارىنا بەرىلەتىن. ەندى ول وزگەرىپ, ينۆەستيتسيالىق سيپات الدى, ساتىپ الاتىن تەحنيكا ءۇشىن تولەنەتىن بولادى. ەگەر ديقان ءبىر تەحنيكا ساتىپ السا, ونىڭ قۇنىنىڭ 25 پايىزى سۋبسيديالانادى. مۇنىڭ بارلىعى كوكتەمگى دالا جۇمىستارى مەن كۇزگى جيىن-تەرىندى از ۋاقىتتىڭ ىشىندە اتقارۋ ماقساتىنان تۋىنداپ وتىر. مۇنىڭ تيىمدىلىگى ارتىعىراق بولادى دەپ كۇتەمىز. مۇنىڭ سىرتىندا تىڭايتقىشقا, گەربيتسيدكە بولىنەتىن سۋبسيديالاردىڭ دا كولەمى ۇلعايدى, دەدى اۋىل شارۋاشىلىعى ءمينيسترى اسىلجان مامىتبەكوۆ. سونىمەن قاتار, ەلىمىز ديقاندارىنا كوكتەمگى دالا جۇمىستارىن اتقارۋعا جەڭىل­­دەتىلگەن باعامەن جانار-جاعار­ماي جانە جەڭىل­دەتىلگەن ۇستەمەمەن 60 ميلليارد تەڭگە نەسيە بەرىلدى. كەڭەستە ەگىنمەن قاتار مال شا­رۋاشىلىعى, ۆەتەرينارلىق قىز­مەت­تىڭ جاقسارتىلۋى, ەت ءون­دىرۋ, وڭدەۋ ماسەلەلەرى تالقى­لاندى.  نازيرا جارىمبەتوۆا, «ەگەمەن قازاقستان» قوستاناي