جۋالى اۋدانىندا 8 مىڭ گەكتاردان استام سۋارمالى جەر بار. بىلتىر «كوكساي» جاڭا كانالى ىسكە قوسىلعالى بەرى تاعى 3 مىڭ گەكتار جەردى سۋلاندىرۋعا مۇمكىندىك تۋدى. وسىدان كەيىن القاپتى تامشىلاتىپ سۋارۋ ءادىستەرى دە كەڭىنەن قولعا الىنۋدا. سودان بولار اۋداندا تامشىلاتىپ سۋارۋ الاڭى ەكى مىڭنان استام گەكتارعا دەيىن ۇلعايماق.
– اۋدان اگرارلى ايماق, سوندىقتان اۋىل شارۋاشىلىعىنا باسا نازار اۋدارىلادى, – دەيدى بۇل جونىندە جۋالى اۋدانىنىڭ اكىمى باتىربەك قۇلەكەەۆ ورتالىق كوممۋنيكاتسيا قىزمەتىنىڭ جامبىل وبلىسى ءوڭىرلىك فيليالىندا بەرگەن بريفينگىندە. – سوندىقتان, تامشىلاتىپ سۋارۋعا باسىم كۇش بەرىپ وتىرمىز. وتكەن جىلى شارۋالار 18,17 ملرد. تەڭگەنىڭ ءونىمىن وندىرگەن. سونداي-اق, اۋداندا كاسىپكەرلىك سالاسى دامىپ كەلەدى. جالپى, تىركەلگەن جەكە كاسىپكەرلىك سۋبەكتىلەرىنىڭ 98,5 پايىزى جۇمىس ىستەيدى. اۋدان كاسىپكەرلەرى 2015 جىلى 899,9 ملن. تەڭگە نەسيە الىپ, كاسىپتەرىن جۇرگىزۋدە.
قازىرگى تاڭدا «بيزنەستىڭ جول كارتاسى-2020» باعدارلاماسى اياسىندا «دامۋ» قورىنىڭ كەپىلدىگىمەن جەكە كاسىپكەر گۇلميرا اسەموۆا سىرت كيىمدەر تىگۋ تسەحىن اشۋ ءۇشىن 6,1 ملن. تەڭگە, «مەشەلوۆا ز.» جەكە كاسىپكەرلىگى ءسۇت ونىمدەرىن وڭدەۋ تسەحىن اشۋ ءۇشىن 39,0 ملن. تەڭگە, ينفراقۇرىلىم جۇرگىزۋگە 20,5 ملن. تەڭگە, كاسىپكەرلەر گ.سەرىكباەۆا قۇرىلىس ماتەريالدارىن شىعارۋ ءۇشىن 2,0 ملن. تەڭگە, ا. يبراگيموۆا كونديتەر تسەحىن اشۋ ءۇشىن 10,0 ملن. تەڭگە قارجىعا قول جەتكىزدى.
تالايدان بەرى «جىر» بولىپ, قۇرىلىسى تىم سوزىلىپ كەتكەن ەرتاي اۋىلىنداعى 120 وقۋشىعا ارنالعان ورتا مەكتەپ جاقىندا پايدالانۋعا بەرىلدى. ال جالپى سمەتالىق قۇنى 453 038,0 مىڭ تەڭگەنى قۇرايتىن قوشقاراتا اۋىلىنداعى 180 وقۋشىعا ارنالعان ورتا مەكتەپ قۇرىلىسى بويىنشا 2015 جىلعا بولىنگەن قارجى 280 464 مىڭ تەڭگە تولىعىمەن يگەرىلدى, اعىمداعى جىلى نىساننىڭ قۇرىلىسى اياقتالادى.
«اۆتوموبيل جولدارىنىڭ جۇمىس ىستەۋىن قامتاماسىز ەتۋ» باعدارلاماسى بويىنشا 2015 جىلعا اۋداندىق ماڭىزى بار جانە اۋىلىشىلىك اۆتوموبيل جولدارىن ورتا, اعىمداعى جوندەۋدەن وتكىزۋگە اۋداندىق بيۋدجەتتەن 217 732,0 مىڭ تەڭگە قاراستىرىلىپ, 15,2 شاقىرىم جول ورتا جوندەۋدەن وتكىزىلدى.
ورالحان ءداۋىت,
«ەگەمەن قازاقستان»
جامبىل وبلىسى