ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە قازاقستاننىڭ ەڭبەك سىڭىرگەن قايراتكەرى, قازاقستان پەداگوگيكالىق عىلىمدار اكادەمياسىنىڭ اكادەميگى, پەداگوگيكا عىلىمدارىنىڭ دوكتورى, پروفەسسور بولات ابدىكارىم ۇلى اتىنداعى اۋديتوريانىڭ اشىلۋ سالتاناتى ءوتتى.
اكادەميك بولات ابدىكارىم ۇلى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە پەداگوگيكا كافەدراسىنىڭ مەڭگەرۋشىسى بولىپ 2 جىل قىزمەت اتقارعان بولاتىن. جيىنعا كەلگەن قوناقتار ابزال ازامات, كورنەكتى عالىم, ۇلاعاتتى ۇستاز بولات ابدىكارىم ۇلىنىڭ ءبىلىم بەرۋ سالاسىنداعى, سونىڭ ىشىندە جاستاردى تاربيەلەۋدەگى ەرەن ەڭبەگى, ادامي تۇلعاسى, بەكزات بولمىسى مەن بيىك پاراساتى تۋرالى ەستەلىكتەرىن ايتا كەلىپ, شارانىڭ ۇيىمداستىرىلۋىنا مۇرىندىق بولعان ازاماتتارعا, اتالعان ءبىلىم ورداسىنىڭ باسشىلىعىنا جۇرەكجاردى العىستارىن ءبىلدىردى. سونىمەن قوسا, ۇلاعاتتى ۇستاز ءومىرىنىڭ ءجۇرىپ وتكەن جولىنان سىر شەرتەتىن ارنايى فيلم كورسەتىلدى.
ۋنيۆەرسيتەت رەكتورى ەرلان سىدىقوۆتىڭ كىرىسپە سوزىنەن كەيىن ايتىسكەر اقىن سەرىكزات دۇيسەنعازى ارناۋ ايتىپ, كوپشىلىك كوڭىلىن ءبىر سەرپىلتىپ تاستادى. اتالعان شارانى ەۇۋ الەۋمەتتىك-مادەني دامۋ جونىندەگى پرورەكتورى ديحان قامزابەك ۇلى جۇرگىزىپ وتىردى. سونىمەن قوسا, عالىم تۋرالى ءسوزدى العاشقىلاردىڭ ءبىرى بولىپ مەملەكەت جانە قوعام قايراتكەرى راۆيل شىرداباەۆ, تاعى باسقا زيالى قاۋىم وكىلدەرى ەرەكشە تولعانىسپەن ەسكە الدى. ءىس-شارا سوڭى «ۇلگىلى ءومىر: تۇلعا, ۇستاز, عالىم» اتتى عىلىمي-ادىستەمەلىك سەمينارعا ۇلاستى.
سەميناردا ل.ن.گۋميلەۆ اتىنداعى ەۇۋ الەۋمەتتىك عىلىمدار فاكۋلتەتىنىڭ دەكانى بايجۇمان قاشقىنباي «پەداگوگ تۇلعانى تانىتۋ», الەۋمەتتىك پەداگوگيكا جانە ءوزىن-ءوزى تانۋ كافەدراسىنىڭ مەڭگەرۋشىسى, پروفەسسور قاديشا شالعىنباەۆا «بولات ءابدىكارىم ۇلىنىڭ عىلىمي مەكتەبى», پەداگوگيكا عىلىمدارىنىڭ دوكتورى, پروفەسسور عاليابانۋ كەرتاەۆا «بولات ابدىكارىم ۇلى – كاسىپتىك ءبىلىم بەرۋ مايتالمانى», دوتسەنت گۇلدەن ايقىنباەۆا «ب.ابدىكارىم ۇلى – كاسىپتىك-تەحنيكالىق ءبىلىم بەرۋدىڭ نەگىزىن قالاۋشى» اتتى تاقىرىپتا باياندامالار جاساپ, باسقا دا سويلەۋشىلەر ونەگەلى ءومىر تۋرالى كەڭىنەن تولعادى.
اتالمىش شاراعا ءبىلىم جانە عىلىم مينيسترلىگىنىڭ وكىلدەرى, پارلامەنت دەپۋتاتتارى, بەلگىلى قوعام قايراتكەرلەرى, ءبىلىم بەرۋ مەكەمەلەرىنىڭ باسشىلارى, عالىمدار, بەلگىلى قوعام جانە مەملەكەت قايراتكەرى ورالباي ابدىكارىم ۇلى, بولات ابدىكارىم ۇلىنىڭ زايىبى, پەداگوگيكا عىلىمدارىنىڭ دوكتورى, پروفەسسور تازاگۇل مۇقاشقىزى, بالالارى جانە شاكىرتتەرى قاتىسىپ, ارداقتى تۇلعا جايلى جىلى لەبىزدەرىن ءبىلدىردى.
راۋشان تاۋىرحانقىزى,
«ەگەمەن قازاقستان»