اقتوبە. 28 ءساۋىر. اقتوبە وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ باسشىلىعىمەن وبلىستىق تاريحي-ولكەتانۋ مۋزەيى جانە «ايتەكە بي» اتىنداعى وبلىستىق مەيىرىمدىلىك قورى 1916 جىلعى ۇلت-ازاتتىق كوتەرىلىستىڭ 100 جىلدىعىنا ارنالعان «1916 جىلعى ۇلت-ازاتتىق كوتەرىلىس: سەبەپتەرى, بارىسى, تاريحي ماڭىزى» اتتى وبلىستىق عىلىمي-تاجىريبەلىك كونفەرەنتسيا وتكىزدى. بۇل تۋرالى egemen.kz ءتىلشىسى حابارلادى.
كونفەرەنتسياعا وبلىس زيالىلارى, تاريحشى-عالىمدار, ولكەتانۋشىلار, ىرعىز اۋدانىنداعى كوتەرىلىستىڭ باسشىسى تايشىم ورىس ۇلىنىڭ ۇرپاقتارى, قالا مەكتەپتەرى مەن كوللەدج مۇعالىمدەرى, ستۋدەنتتەر قاتىستى.
جيىندا تاريح عىلىمدارىنىڭ دوكتورى, پروفەسسور نۇرتازا ابدوللاەۆ 1916 جىلعى ۇلت-ازاتتىق كوتەرىلىستىڭ سەبەپتەرى جونىندە, تاريح عىلىمدارىنىڭ كانديداتى, دوتسەنت سامات ەسقاليەۆ حح عاسىردىڭ باسىنداعى قازاق ينتەلليگەنتسياسى مەن ازاتتىق كوتەرىلىسى, ال ق.جۇبانوۆ اتىنداعى اقتوبە وڭىرلىك مەملەكەتتىاك ۋنيۆەرسيتەتىنىڭ اعا وقىتۋشىسى ايشۋاق باقىت ازاتتىق كوتەرىلىستىڭ تاريح ساحناسىنداعى ورنى مەن تاريحي ءرولى تۋرالى باياندادى. فيلولوگيا عىلىمدارىنىڭ دوكتورى, پروفەسسور الپىسباي مۇساەۆ ۇلت-ازاتتىق كوتەرىلىستىڭ قازاق ادەبيەتىندەگى پروزا مەن پوەزيا جانرلارىنداعى كورىنىستەرى ءجايلى اڭگىمەلەدى.
قازاقستان رەسپۋبليكاسىنىڭ مادەنيەت قايراتكەرى, قۇرمەتتى پروفەسسور ەركىن قۇرمانبەك پەن وبلىستىق تاريحي-ولكەتانۋ مۋزەيىنىڭ ءبولىم مەڭگەرۋشىسى ايبەك ەرتەميروۆ ىرعىز ۋەزىندەگى ۇلت-ازاتتىق كوتەرىلىستىڭ بارىسى مەن ونىڭ باسشىلارى تۋرالى زەرتتەۋ جۇمىستارىن جۇرگىزگەن تاريحشى-عالىم بەركىن قۇرمانبەكوۆتىڭ زەرتتەۋلەرىنەن دەرەكتەر كەلتىردى. تاريح ماگيسترى, وبلىستىق تاريحي-ولكەتانۋ مۋزەيى ديرەكتورىنىڭ عىلىمي جۇمىستار جونىندەگى ورىنباسارى ارمان ەرجانوۆ ۇلت-ازاتتىق كوتەرىلىس كەزىندەگى قازاق كوشىنىڭ قالىپتاسۋ تاريحىن باياندادى.
سونىمەن قاتار كونفەرەنتسيا بارىسىندا تورعاي كوتەرىلىسى مەن ونىڭ باسشىلارى تۋرالى دا كەڭىنەن ءسوز بولدى.
مۋزەيدىڭ عىلىمي كىتاپحاناسى قورىنان حح عاسىر باسىنداعى قازاقستاننىڭ ساياسي-الەۋمەتتىك جاعدايىن سيپاتتايتىن عىلىمي جانە ادەبي كىتاپتاردان كورمە جاساقتالدى.
ساتىبالدى ءساۋىرباي.
دەرەك, فوتو: egemen.kz