ەلباسى تۋرالى جاڭا فيلم
پرەزيدەنت نۇرسۇلتان نازارباەۆ «ەلباسى جولى: جۇلدىزدار توعىسقاندا» كينوەپوپەياسىنىڭ پرەمەرالىق كورسەتىلىمىنە باردى, دەپ حابارلادى پرەزيدەنتتىڭ ءباسپاسوز قىزمەتى. فيلم 1984 جىل مەن 1991 جىل ارالىعىنداعى كەزەڭدى قامتيدى. تۋىندى جاڭا تاۋەلسىز مەملەكەتتەردىڭ قۇرىلۋى, سونىڭ ىشىندە قازاقستان رەسپۋبليكاسى تۋرالى باياندايدى. بۇدان بولەك, كارتينا قازاقستاننىڭ تۇڭعىش پرەزيدەنتىنىڭ ەلدى رەفورمالاۋداعى ءرولى, سونداي-اق, ونىڭ بۇگىندە جاھاندىق اۋقىمداعى جوبالارعا اينالعان باستامالارى جونىندە اڭگىمەلەيدى. فيلم رەجيسسەرى – رەسەي فەدەراتسياسى مەملەكەتتىك سىيلىعىنىڭ لاۋرەاتى, رەسەيدىڭ حالىق ءارتىسى سەرگەي سنەجكين. كينولەنتا الماتىدا جانە الماتى وبلىسىندا, استانادا, قاراعاندىدا, ءماسكەۋ مەن سانكت-پەتەربۋرگتە تۇسىرىلگەن. كارتينانى سومداۋ جۇمىسىنا جالپى سانى 10 مىڭعا جۋىق ادام قاتىسقان. «جۇلدىزدار توعىسقاندا» كارتيناسى 2016 جىلعى 28 ساۋىردە جالپىۇلتتىق پروكاتقا شىعارىلادى.جۇلدىزى بيىك كەمەڭگەر
تۋرالى كوركەم تۋىندى كورەرمەنگە جول تارتتى
تاۋەلسىز ەلىمىزدىڭ تاعدىرى ءۇشىن تاۋەكەلگە بەل بايلاعان ەلباسىنىڭ ەرەن ەرلىگىن باياندايتىن تاعى ءبىر تۋىندى دۇنيەگە كەلدى. ەلباسى تۋرالى كينوەپوپەيانىڭ العاشقى ءتورت سەرياسىن قازاقستاندىق رەجيسسەر رۇستەم ءابدىراشەۆ ءتۇسىرگەنىن ەستەرىڭىزگە سالامىز. ولاردىڭ قاتارىندا, «بالالىق شاعىمنىڭ اسپانى», «وتتى وزەن», «تەمىرتاۋ», «تىعىرىقتان جول تاپقان» فيلمدەرى بار. وسىلاردىڭ بارلىعى ەلباسىنىڭ قالىپتاسۋ, ءوسۋ جولىن باياندايدى. «كينوەپوپەيانىڭ بەسىنشى ءبولىمىندە ءبىز كەڭەس وكىمەتىنىڭ قۇلاۋى مەن تاۋەلسىز قازاقستاننىڭ ومىرگە كەلۋىن كورسەتۋدى ماقسات ەتتىك», – دەدى فيلمگە قاتىستى ءباسپاسوز ءماسليحاتىندا مادەنيەت جانە سپورت ءمينيسترى ا.مۇحامەدي ۇلى. «ءبىز ءفيلمنىڭ قويۋشى-رەجيسسەرى كىم بولادى دەگەن سۇراققا كوپ ويلاندىق. ونىڭ شىعارماشىلىق تاجىريبەسىنە باسا نازار اۋداردىق. بۇل جاعىنان كەلگەندە سەرگەي سنەجكيننىڭ ەڭبەكتەرى, ونىڭ ءتۇسىرگەن فيلمدەرى ءبىزدى ءتانتى ەتتى. العاشقى كەزدەسۋدىڭ وزىندە ول بىزگە, ويدان شىعارىلعان ەمەس, شىنايى تۋىندى كورسەتۋگە ءسوز بەردى», – دەيدى مينيستر. مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن «جۇلدىزدار توعىسقاندا» كوركەم ءفيلمىنىڭ رەجيسسەرى – رەسەي فەدەراتسياسى مەملەكەتتىك سىيلىعىنىڭ لاۋرەاتى, رەسەيدىڭ حالىق ءارتىسى – سەرگەي سنەجكين. ول جۇرتشىلىققا «بەلايا گۆارديا», «برەجنەۆ», «تسۆەتى كالەندۋلى», «جەنسكي رومان» سياقتى تۋىندىلارىمەن تانىمال. ماڭىزدى ءفيلمنىڭ مازمۇنى كەڭەس وداعىنىڭ قۇلاۋى, جاڭا تاۋەلسىز مەملەكەتتەردىڭ پايدا بولۋى, ونىڭ ىشىندە قازاقستان رەسپۋبليكاسى تۋرالى باياندايدى. فيلم 1984-1991 جىلدار ارالىعىن قامتيدى. اتالمىش كوركەم فيلم ەل تاريحىنداعى ەلەۋلى وقيعالارعا زەر سالىپ, قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ قوعام ءومىرىنىڭ بار سالاسىندا اتقارعان ءرولىن, سونداي-اق, مەملەكەت باسشىسىنىڭ دۇنيەجۇزىلىك اۋقىمدا ىنتىماقتاستىقتى ارتتىرۋداعى ايرىقشا قىزمەتىن سارالايدى. كينوتۋىندىنىڭ سارىنىنا ءمان بەرەتىن بولساق, اعىلشىن جازۋشىسى دجەرەمي ۆيلسون قازاقستان پرەزيدەنتى نۇرسۇلتان نازارباەۆتىڭ ءومىربايانىن جازۋ ءۇشىن ونىمەن كەزدەسۋگە قول جەتكىزەدى. الايدا, جۋرناليست پەن ەلباسىنىڭ بەلگىلەنگەن سۇحباتى بۇكىل ەلدى ارالاۋمەن تاريحقا كوز جۇگىرتكەن ساليقالى ساياحاتقا ۇشتاسادى. سۇحبات بارىسىندا پرەزيدەنت پەن ۆيلسون كەڭ-بايتاق دالادان قار باسقان تاۋعا, كوپقاباتتى ءزاۋلىم عيماراتتان كيىز ۇيگە, 2015 جىلدان 1950 جىلعا, 1986 جىلعا, 1989 جىلعا, 1991 جىلدار ارالىعىنداعى تاريحي وقيعالارعا اۋىسىپ وتىرادى. ەل كارتاسىنداعى ءاربىر نىسان – پرەزيدەنت ءومىربايانىنىڭ ايعاعى. قازاقستان استاناسىنداعى بيىك عيماراتتاردىڭ ۇستىنەن تىكۇشاقپەن ۇشىپ ءوتۋ, الەمدەگى ەڭ ۇلكەن كومىر رازرەزىندە سەرۋەندەۋ ارقىلى ۆيلسون ءوزى ءۇشىن ءبىر جاڭالىق اشقانداي بولادى. كەلەسى كۇنى پرەزيدەنتتىڭ الماتىعا ءىسساپارى جانە سۇحباتى اياقتالادى. نۇرسۇلتان نازارباەۆتىڭ انت قابىلداپ, قازاقستان تاۋەلسىزدىگى ءۇشىن موينىنا جاۋاپكەرشىلىك العان زالىندا ۆيلسون مەن پرەزيدەنت قوشتاسادى. «جۇلدىزدار توعىسقاندا» كينوكارتيناسىنىڭ ستسەناريىن رەجيسسەر سەرگەي سنەجكين نۇرسۇلتان نازارباەۆتىڭ ءوز شىعارمالارىن نەگىزگە الا وتىرىپ جازىپ شىققان ەكەن. تۋىندىنى ايشىقتاۋ بارىسىندا ەلباسىنىڭ جەكە ەستەلىكتەرى دە مولىنان پايدالانىلعانى بايقالىپ تۇردى. ءتۇسىرىلىمنىڭ نەگىزگى بولىگى الماتى جانە الماتى وبلىسىندا وتسە, ال, قالعانى استانا, قاراعاندى, ماسكەۋ جانە سانكت-پەتەربۋرگ قالالارىندا جۇرگىزىلگەن. تۇسىرىلىمگە بارلىعى 70-تەن استام نىسان پايدالانىلىپتى. ونىڭ ىشىندە ماسكەۋدەگى كرەمل, «ناتسيونال» قوناق ءۇيى, قاراعاندىداعى كەنشىلەر مادەنيەت سارايى (1989 جىلعى شاحتەرلەر ەرەۋىلى), سونداي-اق, كەڭەس وداعى كوممۋنيستىك پارتياسى ورتالىق كوميتەتىنىڭ باس حاتشىسى ميحايل گورباچەۆتىڭ 1985 جىلى تسەلينوگراد وبلىسىنا كەلگەن ءىسساپارى كەزىندە استراحان اۋدانىنىڭ استىق القابىندا دا ءبىراز وقيعا جەلىسى ورىلە تۇسكەن. ال تاۋەلسىزدىككە ۇمتىلعان قازاق جاستارىنىڭ كۇرەسى – 1986 جىلعى جەلتوقسان كوتەرىلىسى سانكت-پەتەربۋرگ قالاسىنداعى «RWS» كينوستۋدياسىنىڭ اۋماعىندا سومدالعان. ءفيلمدى جاساۋدا قازاقستان مەن رەسەي كينەماتوگرافيستەرىنەن قۇرالعان تاجىريبەلى حالىقارالىق توپ جۇمىلدىرىلعان. تۋىندىنىڭ باس پروديۋسەرى قازاقستاننىڭ ەڭبەك سىڭىرگەن قايراتكەرى تاسبولات مەرەكەنوۆ. قويۋشى سۋرەتشى – دميتري تاتارنيكوۆ, قويۋشى وپەراتورى – سەرگەي ماچيلسكي. «جۇلدىزدار توعىسقاندا» فيلمىنىڭ كومپوزيتورى رەسەي كينەماتوگرافيا ونەرى جانە عىلىمى ۇلتتىق اكادەمياسى تاعايىنداعان «التىن قىران» سىيلىعىنىڭ ءۇش مارتە يەگەرى يۋري پوتەنكو. باستى ءرولدى قازاقستاندىق تانىمال اكتەر بەرىك ايتجانوۆ سومدادى. سونداي-اق, فيلمگە التىناي نوگەربەك, الدابەك شالباەۆ, ازامات ساتىبالدى, عاني قۇلجانوۆ, ەركەبۇلان دايىروۆ, جانەل ماقاجانوۆا, دينارا باقتىباەۆا, قارلىعاش مۇحامەدجانوۆا ءتۇسىپ, جوعارى دەڭگەيدە ويناپ شىقتى دەۋگە بولادى. ايتا كەتەتىن تاعى ءبىر جايت, فيلمدەگى تانىمال تاريحي تۇلعالاردى, كسرو پرەزيدەنتى ميحايل گورباچەۆ, رەسەي پرەزيدەنتى بوريس ەلتسين, اقش پرەزيدەنتتەرى – دجوردج بۋش جانە بيلل كلينتون, ساۋد ارابياسىنىڭ كورولى فاحد ءال-ساۋد جانە پالەستينا اۆتونومياسىنىڭ باسشىسى ياسير ارافات سىندى الەمگە ايگىلى مەملەكەت قايراتكەرلەرىنىڭ بەينەلەرىن يگور ۋگولنيكوۆ, سەرگەي گارماش, داريا موروز, الەكسەي گۋسكوۆ, حيۋ فرەيزەر, ريچارد كوردەري, ستيۆەن پەيسي سياقتى رەسەيلىك جانە شەتەلدىك اكتەرلەر سومداعان. كارتينانى جاساپ ومىرگە كەلتىرۋ جولىندا 10 000-عا جۋىق ادام اتسالىسقان تۋىندىنىڭ قازاق ەلى ءۇشىن ءمانى مەن ماڭىزى جوعارى تۇرارى داۋسىز. كەشەگى تۋىندىنىڭ تۇساۋكەسەرىنە ەلباسى نۇرسۇلتان نازارباەۆتىڭ ءوزى كەلىپ, ءفيلمدى باسىنان اياعىنا دەيىن وتىرىپ تاماشالاۋى جوبا اۆتورلارى مەن ءتۇسىرىلىم توبىنا ۇلكەن جاۋاپكەرشىلىك جۇكتەدى دەسەك, ارتىق ايتقاندىق بولماس, ءسىرا. ەل تاريحىنا تىكەلەي بايلانىستى بولعاندىقتان بۇل تۋىندىنىڭ باسقالاردان ءباسى جوعارى. بوداندىقتان بوساعان ەلدىڭ باقىتى مەن قۋانىشى قاپىسىز كورىنىس تاپقان بۇل ءفيلمدى ءاربىر قازاقستاندىق كورۋگە ءتيىس دەپ ويلايمىن. بۇل تۋىندىداعى ەرەكشە ەستە ساقتالار ءبىر ءسات – ەلباسىنىڭ قاجىلىق جاساۋى دەر ەدىم. ول كىسىنىڭ قاعباعا كىرىپ, ودان شىققان كەزىندە تولاسسىز جاڭبىردىڭ جاۋعانى ءجاي نارسە ەمەس. وندا ءبىر ۇلكەن ءمان جاتقانى ءسوزسىز. كوركەم تۋىندىدا اسەرلى تۇستار كوپ كەزدەسەدى. كورىپ وتىرعان كورەرمەننىڭ كوڭىلىنە قانشالىقتى دارەجەدە اسەر ەتىپ وتىرعانىن ولاردىڭ دۇركىن-دۇركىن قول شاپالاقتاۋىنان دا بايقاۋعا بولار ەدى. تۋىندىعا دەگەن ريزاشىلىقتان تۋعان بۇل جاعداي ءفيلمنىڭ ەموتسيانى ويناتۋى وتە جوعارى دەڭگەيدە ەكەنىن كورسەتسە كەرەك. تۋىندىنىڭ تۇساۋكەسەر كەشىنە بيلىكتىڭ ءبيىگىندە وتىرعان بىرقاتار ازاماتتار دا اتباسىن بۇردى. ەلباسىنىڭ ءومىر جولىنداعى باسىپ وتكەن باسپالداقتارىن سۋرەتتەيتىن تۋىندىلار جەتەرلىك. قانشاما كىتاپتار مەن ماقالالار وقىرمان قاۋىمعا جول تارتتى. سان ءتۇرلى دەرەكتى فيلمدەر دە دۇنيەگە كەلدى. مۇنى دا سولاردىڭ جالعاسى دەپ قابىلداۋ كەرەك. بۇل شىعارمانىڭ شىنايىلىعى – ەلباسىنىڭ تاۋەلسىزدىكتىڭ قارساڭىمەن العاشقى جىلدارىنداعى قيىن-قىستاۋ كۇندەردەگى سوقتىقپالىسوقپاقتى جولىن ءدال بەرۋىندە دەۋگە بولادى. ءتاي-ءتاي باسقان تاۋەلسىز قازاقستاننىڭ ابىرويىن, مۇددەسىن الشاڭ باسقان الپاۋىت ەلدەردىڭ الدىندا قورعاپ سويلەگەنى باسشىنىڭ پاراساتتىلىعى دەسەك بولماي ما؟! ەلىم دەپ ەڭبەك ەتكەن ەلباسىنىڭ جانىندا ءجۇرىپ, قيىندىق قۇرساۋىنا تۇسكەندە سىناققا توتەپ بەرمەي جالت بۇرىلعان زامانداستارى بولعانىن دا وسى فيلم ارقىلى تانىپ بىلدىك. «جىرتىعىمىزعا جىرتىڭداپ كۇلگەن» مەملەكەتتەردىڭ مىسىن ەكى اۋىز سوزبەن باسقانى, مويىنداعىسى كەلمەگەندەردىڭ موينىن بۇرعىزعانى, وسىنىڭ بارلىعى كوركەم شىعارمادا نۇرسۇلتان نازارباەۆ سىندى ەل باعىنا تۋعان باسشىمىزدىڭ كەمەڭگەرلىگىن كورسەتىپ, كوڭىلىمىزگە قۋانىش سىيلاپ تۇردى. كەڭەس وكىمەتى كەڭىردەگىمىزدەن ۇستاپ, كەۋدەمىزدەن باسسا دا نامىسىمىزدى جىعا المادى. اتالمىش تۋىندى ارقىلى الداعى جارىق ساۋلە مەن جاقسىلىقتان ەشقاشان ءۇمىتتى ۇزبەۋ كەرەك دەگەن قاعيدانى تانىعاندايمىز. تىنىمسىز تىرشىلىكتىڭ تاعى ءبىر تاڭى اتتى. بىرەۋگە كۇدىكپەن, بىرەۋگە ۇمىتپەن كەلەتىن ءاربىر كۇننىڭ اسەرى استە بولەك. ارقايسىنىڭ وزىنە ءتان جاڭالىعى دا, دارالىعى دا بار. كوكجيەكتەن كوتەرىلگەن ءاربىر كۇن ادامزات بالاسىنا بەرىلگەن مۇمكىندىك. ونى يا جاقسىلىققا, يا جاماندىققا پايدالانۋ پەندەنىڭ ءوز ەركىندە. اتىڭ وزىپ, العا شىعۋدى ارماندايسىڭ با, وندا ايانباي ەڭبەك ەت, تالماي تالاپتان, تىنباي قىزمەت قىل. تۋىندىنى تاماشالاۋ بارىسىندا ەلباسىنىڭ ەڭبەكقورلىعىنا, تاباندىلىعىنا ءتانتى بولاسىز. وسىنداي پرەزيدەنتىمىزدىڭ بارىنا سۇيسىندىك. بوستاندىق دەگەن ۇعىمنىڭ قانشالىقتى قادىرلى ەكەنىن ۇعىندىق. كۇدىك, كۇمان, تولقۋ. كەڭەس وداعى ىدىراپ, ەگەمەندىگىن جاريالاعان تاۋەسىزدىك العان قازاق جۇرتى ءۇشىن العاشقى جىلدارى تار جول, تايعاق كەشۋمەن پارا-پار بولعانى بەلگىلى. زاۋىتتاردىڭ بارلىعى دەرلىك قاڭىراپ بوس قالعانىن, جاستاردىڭ جۇمىسسىز, حالىقتىڭ ءحالى سول تۇستا بارىنشا تومەندەگەنىن تاريحتان تانىدىق. ەل تۇتقاسىن قولعا العان مەملەكەت باسشىسى نۇرسۇلتان نازارباەۆ ەلدىڭ ەڭسەسىن تىكتەۋگە بارىن سالدى. ماڭداي تەر, ماشاقاتپەن كەلگەن ەركىندىكتىڭ ەڭسەسى ءپاس تارتپاي, سول ءۇشىن دە تۇعىردا تۇرۋى ءتيىس. ءۇزىلىسسىز ءۇش ساعاتقا سوزىلعان تۋىندىنى تاماشالاپ, ساياساتقا ساياحات جاساپ, ەلباسى عۇمىربايانىنىڭ, ورەلى ەڭبەگىنىڭ بۇرىن بىلمەگەن تۇستارىن تانىپ, ەل ءۇشىن ەتكەن قىزمەتتەرىنە قىزىعىپ, ءبىر ءتۇرلى شاتتانىپ, شالقىپ شىقتىق. تالايدان تاپتىرماي جۇرگەن قىمبات, ساعىنىشتى ساتپەن قاۋىشقان سياقتى سەزىلدى وزىمە. مىناجاتپەن باستالعان فيلمدە تاۋەلسىزدىگىمىزگە تاۋبە ەتۋگە ءۇندەيتىن سارىن بار. بارىمىزدى باعالاۋعا, قولداعىنىڭ قادىرىن بىلۋگە, جارقىن بولاشاققا سەنۋگە ۇندەيتىن تۋىندى ءوز كورەرمەنىن تاباتىنى تالاسسىز. جولباسشىسى كورەگەن ەلدىڭ كوشى دە كورىكتى بولارىنا «جۇلدىزدار توعىسقاندا» ءفيلمى كوزىمىزدى تاعى ءبىر كامىل جەتكىزگەندەي سەرگەك تە, ورگەك سەزىمگە بولەندىك. راۋان قايدار, «ەگەمەن قازاقستان»*كورەرمەندەر لەبىزى
جەكسەنباي دۇيسەباەۆ, قر پارلامەنتى ءماجىلىسىنىڭ دەپۋتاتى: ءۇش ساعاتتىق ءفيلمدى تەرەڭ تەبىرەنىسپەن تاماشالادىق. بۇل دەگەنىڭىز, تۋىندىنىڭ جوعارى دەڭگەيدە جاسالعانىن بايقاتسا كەرەك. كورىپ وتىرعان كورەرمەننىڭ ءبارى ءفيلمنىڭ باستى رولىندەگى كەيىپكەرگە الاڭداپ, ەلدىڭ تاعدىرىنا ەلەڭدەپ وتىردى دەسەم ارتىق ايتقاندىق بولماس, ءسىرا. بۇل رەتتە, قازاقستان مەن رەسەي كينەماتوگرافيستەرىنىڭ ەڭبەكتەرىن اتاپ ءوتۋ كەرەك. مەنىڭ ويىمشا فيلم جاقسى شىققان. اسىرەسە, كەلەشەك ۇرپاق ءۇشىن بەرەرى مول. ەلباسىنىڭ ءومىر جولىمەن تانىسۋ ارقىلى ولار وتانعا دەگەن ادالدىقتى ۇيرەنەدى. اسىلى وسمان, قر ەڭبەك سىڭىرگەن قايراتكەرى: فيلم ۇناپ قانا قويعان جوق, ول – عاجاپ تۋىندى دەر ەدىم. ونى تاماشالاۋ بارىسىندا ءبىز قازاقستاننىڭ وتكەن تاريحىنا ۇڭىلدىك. سول تۇستا ءبىزدىڭ مەملەكەتتىڭ الدىندا قايدا بارامىز دەگەن ماڭىزدى سۇراق تۇردى. ءبىز كورگەنىمىزدەي, ەلدىڭ ەرتەڭى ب ۇلىڭعىر بولماس ءۇشىن, ەلباسقارۋشى تۇلعانىڭ ساياسي ساۋاتى تەرەڭ, دۇرىس تاڭداۋ جاساي ءبىلۋى ماڭىزدى مىندەت. سوندا عانا ول ەلدى كەز كەلگەن قيىندىقتان الىپ شىعا الادى. اتالمىش تۋىندى كەشەگى تاريحىمىزدان سىر شەرتىپ قانا قويماي, بۇگىنگى ۇرپاقتىڭ دا تاربيەسىنە تىكەلەي اسەر ەتەدى. مەن جاستارعا وسى ءفيلمدى كورۋگە كەڭەس بەرەمىن. ونداعى كەيىپكەرلەردىڭ ءىس-ارەكەتىنە, شەشىم شىعارۋ شەبەرلىگىنە ءمان بەرسە ەكەن دەيمىن.* كينوگەرلەر لەبىزى
حيۋ فرەيزەر, بەلگىلى امەريكالىق اكتەر, فيلمدە اعىلشىن ءتىلشىسى دجەرەمي ۆيلسوننىڭ ءرولىن سومداعان: – ءتۇسىرىلىم جۇمىستارى وتە جوعارى دەڭگەيدە ءوتتى. مىقتى كوماندامەن جۇمىس ىستەدىم. بەرىك ايتجانوۆ پرەزيدەنت نۇرسۇلتان نازارباەۆتىڭ ءرولىن وتە جوعارى دەڭگەيدە سومداپ شىقتى. كەزىندە ءبىرقاتار ساياساتكەردىڭ رولدەرىن ويناعاننان كەيىن ماعان ءتىلشى ءرولىن الىپ شىعۋ قيىنعا سوققان جوق. ستسەناري ۇناعاندىقتان, بىردەن كەلىستىم. استانا كوشەلەرىنىڭ كورىنىسى وتە تاماشا. حالقى قوناقجاي. قازاق فيلمىندە ويناۋ – مەن ءۇشىن ۇلكەن مارتەبە. سەرگەي سنەجكين, فيلم رەجيسسەرى: – مەنىڭ جاسىم 62-دە. جانە بۇل فيلمدە بولىپ جاتقان وقيعالاردىڭ بارلىعى مەنىڭ باسىمنان ءوتكەن. بۇل – مەنىڭ دە تاعدىرىم. سوندىقتان, مەن كورگەن زاماننىڭ سوقپاعى مەن قيىندىعى وسى فيلمدە كورسەتىلىپ وتىر. نۇرسۇلتان نازارباەۆ سياقتى باسشىسى بار قازاقستان باقىتتى دەپ سانايمىن. «ەپيزودتاردىڭ بىرىندە جۋرناليست ەلباسىنا, ءسىز قالاي پرەزيدەنت بولدىڭىز دەپ سۇراق قويادى. ول, ازداعان ۇزىلىستەن سوڭ, «جۇلدىزدار توعىسقاندا» دەپ جاۋاپ بەرەدى. شىنىندا دا, ول تاۋەلسىز قازاقستاننىڭ پرەزيدەنتى بولسىن دەگەن ەشقانداي فيلوسوفيالىق تۇجىرىم نەمەسە ماتەماتيكالىق فورمۋلا جوق. قازاقستان كومپارتياسىنىڭ حVI سەزىندە ونىڭ تاعدىرى قىل ۇستىندە تۇردى. سەبەبى, ولاردىڭ بيلىگى وزىندىك ويى بار كەز كەلگەن ادامنىڭ باسىن الۋعا جەتەتىن ەدى. ال نۇرسۇلتان نازارباەۆ ولاردان تايسالماي باتىل بايانداما جاساي ءبىلدى. مەنىڭ ويىمشا, «جۇلدىزدار توعىسادى» دەگەن وسى. الداعى ۋاقىتتا دا بىرنەشە جاڭا جوبانى بىرلەسە جاساۋعا دايىنمىن. التىناي نوگەربەك, اكتريسا: – مەن بۇل فيلمدە سارا الپىسقىزىنىڭ ءرولىندە وينادىم. ءارينە, ءبىرىنشى حانىم بولۋ قوشەمەت, قۇرمەت, ەل الدىندا ءجۇرۋ ول ءبىر بولەك. بىراق ءار نارسەنىڭ ەكىنشى جاعى بار عوي. ونىڭ استارىندا قانداي قيىندىقتار جاتىر؟ كۇيەۋى ءۇشىن ۇنەمى الاڭدايدى. جۇبايى ۇنەمى جولدا, ەل الدىندا. سوندىقتان, ءبىز سول جاعىنان بارۋعا تىرىستىق. ايەلدىڭ ەرى ءۇشىن الاڭداعان بەينەسىن كورسەتۋگە تالپىندىق.