«30-جىلدارداعى قازاقستانداعى اشارشىلىق قۇرباندارى» رەسپۋبليكالىق دەرەكتەر بازاسىنىڭ جانە www.asharshylyq.kz سايتىنىڭ تۇساۋكەسەرى ءوتتى.
قازاقستان رەسپۋبليكاسى پرەزيدەنتىنىڭ ءارحيۆى ەلىمىزدەگى ۇلتتىق مۇراعات قورىنىڭ قۇجاتتارىن دارىپتەۋ جۇمىستارىن بەلسەندى اتقارۋدا. بۇگىندە وسى ماقساتقا قول جەتكىزۋ ءۇشىن زاماناۋي ادىستەر مەن شەشىمدەر پايدالانىلۋدا, ولاردىڭ ىشىندە ەڭ ءتيىمدىسى – مۇراعات قۇجاتتارىن عالامتور ارقىلى ناسيحاتتاۋ.
قازاقستان رەسپۋبليكاسى پرەزيدەنتى ءارحيۆىنىڭ www.archive.president.kz دومەنىمەن تىركەلگەن جەكە رەسمي سايتى بار. بۇل سايت وتە تانىمال. جىل سايىن سايتقا 500 مىڭنان استام ادام كىرەدى. مۇراعاتتىڭ وتە ءىرى جوبالارىن كوپشىلىككە قولجەتىمدى ەتۋدىڭ ارقاسىندا وسىنداي ۇلكەن كورسەتكىشكە يە بولىپ وتىرمىز.
2015 جىلدىڭ مامىر ايىندا ءبىز «ەكىنشى دۇنيەجۇزىلىك سوعىس كەزىندەگى قازاقستاندىق اسكەري تۇتقىندار» رەسپۋبليكالىق بازالار دەرەكتەرىمەن www.tutkyn.kz سايتىن اشتىق. دەرەكتەر بازاسىن تولتىرۋعا بارلىق ايماقتىق مۇراعاتتار, ۆەدومستۆولىق مۇراعاتتار (قر ءىىم جانە قر قم), شەتەلدىك مۇراعاتتار, قازاقستاننىڭ گەرمانياداعى ەلشىلىگى جانە زەرتتەۋشىلەر قاتىستى. اتالعان سايت ىسكە قوسىلعان ءبىر جىلدىڭ ىشىندە ءبىز 34 مىڭ قازاقستاندىق اسكەري تۇتقىنداردىڭ اتى-ءجونىن جيناپ, ءبىر جۇيەگە ەنگىزدىك. جوبا كوپشىلىك پەن بۇقارالىق اقپارات قۇرالدارى اراسىندا ۇلكەن رەزونانس تۋعىزدى. سودان بەرى «كەرى بايلانىس» ايدارى ارقىلى ءبىز قازاقستاندىقتاردان كوپتەگەن حاتتار الىپ تۇرامىز.
بۇگىندە ءبىز وسىنداي جوبالاردى ىسكە اسىرۋ بويىنشا ۇلكەن ءتاجىريبەگە يەمىز دەپ سەنىمدى تۇردە ايتا الامىز.
ءارحيۆتىڭ 2016 جىلعى جوسپارىندا «كەڭەستىك قازاقستاننىڭ نومەنكلاتۋرالىق كادرلارى» اتتى ەلەكتروندى انىقتاماسىنىڭ ءبىرىنشى ءبولىمىن اشۋ تۇر, ونىڭ ىشىندە 1919-1936 جىلدارداعى ەلىمىزدەگى نومەنكلاتۋرالىق قىزمەتكەرلەردىڭ 2700 ادامنان تۇراتىن ومىرباياندىق انىقتاماسى بولادى.
بۇگىندە «30-جىلدارداعى قازاقستانداعى اشارشىلىق» جوباسىنىڭ اياسىندا قازاقستان رەسپۋبليكاسى پرەزيدەنتىنىڭ ءارحيۆى سايكەس دەرەكتەر بازاسى بار www.asharshylyq.kz جاڭا سايتىن ىسكە قوستى.
بۇل بازانىڭ باستى ماقساتى قازاق حالقىنىڭ تاريحي مۇراسىن جاڭارتۋ بولىپ تابىلادى. بازا كوپشىلىككە ارنالىپ جاسالعان, سول سەبەپتى ونى تولتىرۋعا اشارشىلىق جىلدارى قازاقستان اۋماعىندا ناۋبەتكە ۇشىراعان ادامدار تۋرالى قانداي دا ءبىر مالىمەتى بار كامەلەت جاسىنا تولعان كەز كەلگەن ازامات قاتىسا الادى.
www.asharshylyq.kz سايتىنىڭ «اشارشىلىق قۇرباندارى» دەرەكتەر بازاسىندا اقپاراتتى بازالار دەرەكتەمەسىنە مالىمەتتەردى ەنگىزۋ ءۇشىن سايتتا كورسەتىلگەن نىسان بويىنشا تولتىرۋعا بولادى.
بازادا جەكە باسى, ونىڭ ۇلتى, قاي رۋدان شىققانى, تۋعان كۇنى مەن قايتىس بولعان كۇنى, تۋعان جەرى, اشارشىلىق سالدارى جانە ونىڭ اۋىرلىق دەڭگەيى جازىلادى. ەگەر اشارشىلىق سالدارىنان قونىس اۋدارسا, وندا بازادا كوشىپ جۇرگەن جىلدارى مەن جەرلەرى قوسىمشا كورسەتىلەدى. سونىمەن بىرگە, بازادا بەرىلگەن اقپارات كوزى كورسەتىلەدى.
اقپارات كوزى رەتىندە جەكە تۇلعالاردان باسقا مەملەكەتتىك مۇراعاتتار, ۆەدومستۆولىق مۇراعاتتار, سونىمەن قاتار كىتاپتار مەن جيناقتار دا بولا الادى.
بۇگىنگى كۇنى بازا سول ءناۋبەت جىلدارىنداعى جاپپاي اشارشىلىق قۇرباندارىنىڭ جاقىندارى مەن تۋىستارىن تولعاندىرعان وقيعالار تۋرالى وتباسىلىق تاريح نەگىزىندە مۇراعات قىزمەتكەرلەرىمەن تولتىرىلعان مالىمەتتەرگە يە.
جاسالىپ وتىرعان دەرەكتەر بازاسى – 30-جىلدارداعى اشارشىلىق قۇرباندارىنا دەگەن قۇرمەت.
سايتتى تولتىرۋعا قاتىسقان ارقايسىمىز ۇلتتىق ەستەلىكتەرىمىزدى جاڭارتۋ بويىنشا ورتاق ىسكە ءوز ۇلەسىمىزدى قوسامىز. دەرەكتەردىڭ بىرەگەي بانكى قازاقستاننىڭ جاڭا تاريحىنىڭ تراگەديالىق بەتتەرىن اشۋ كەزىندە مامانداردىڭ كەلەشەكتەگى زەرتتەۋلەرىنە مىقتى دەرەكتەمەتانۋ بازاسى بولارى ءسوزسىز. سول سەبەپتى ءبىز كوپشىلىكتى, مۇراعاتتىق مەكەمەلەردى, زەرتتەۋ ورتالىقتارىن, سونىمەن بىرگە تاريحشىلار مەن ەلىمىزدىڭ عىلىمدارىن وسى جالپى جۇمىسقا قاتىسۋعا شاقىرامىز.
باحىتحان شايلازىموۆ,
قازاقستان رەسپۋبليكاسى پرەزيدەنتى ءارحيۆىنىڭ
مۇراعاتتىق تەحنولوگيالار باسقارماسىنىڭ باسشىسى
استانا