سالىق كودەكسىنە تۇزەتۋلەر: قارجى سەكتورىنا قاتىستى بىرقاتار ۇسىنىس قولداۋ تاپتى

بۇعان دەيىن, اقپان ايىنداعى وتىرىستا قارجى سەكتورىندا جاڭا سالىق نورمالارىن ەنگىزۋگە بايلانىستى 38 ماسەلە تالقىلانعان ەكەن. ونىڭ ىشىندە مەملەكەتتىك بيۋدجەت كىرىستەرى مەن سالىقتىق اكىمشىلەندىرۋگە اسەرىن ناقتىلاۋ ءۇشىن 7 ماسەلە قوسىمشا پىسىقتاۋعا جىبەرىلگەن. ناتيجەسىندە, 3 نەگىزگى ماسەلە وسى جولعى وتىرىسقا شىعارىلىپ, تۇپكىلىكتى قارالدى.

العاشقى ماسەلە ساقتاندىرۋ ۇيىمدارىنىڭ 17-ءشى قارجىلىق ەسەپتىلىكتىڭ حالىقارالىق ستاندارتىنا (قەحس) كوشۋىنە بايلانىستى تۋىنداعان. جاڭا تالاپقا سايكەس, 2026 جىلعى سالىق كەزەڭىندە 4-قەحس-تەن 17-قەحس-كە ءوتۋ كەزىندە پايدا بولعان ايىرما كىرىس نەمەسە شەگەرىم رەتىندە ەسەپكە الىنادى. بۇل – بىرجولعى سيپاتتاعى كورسەتكىش, ول 2026 جىلعى ناتيجەنى ەمەس, 2023-2025 جىلدار ارالىعىنداعى جيناقتالعان قارجىلىق اسەردى قامتيدى.

اتالعان ايىرمانى سالىق بازاسىنا ەنگىزۋ كورپوراتيۆتىك تابىس سالىعىنىڭ (كتس) ەداۋىر وسۋىنە اكەلۋى مۇمكىن. وسىعان بايلانىستى قارجى نارىعىن رەتتەۋ جانە دامىتۋ اگەنتتىگى سالىق جۇكتەمەسىن 2026-2028 جىلدار ارالىعىندا تەڭ ۇلەسپەن تولەۋ تەتىگىن ەنگىزۋدى ۇسىندى. بۇل قادام ساقتاندىرۋ سەكتورىنا جاڭا تالاپتارعا بىرتىندەپ بەيىمدەلۋگە مۇمكىندىك بەرەدى. سونىمەن قاتار, اۆانستىق تولەمدەردى ەسەپتەۋ كەزىندە بىرجولعى اسەردىڭ ىقپالى كەيىنگى كەزەڭدەرگە تارالمايدى.

دەپۋتات ايتۋار قوشمامبەتوۆ جالاقىعا تۇسەتىن سالىق جۇكتەمەسىن ازايتۋدى ۇسىندى

ۇكىمەتتىڭ ءباسپاسوز قىزمەتىنىڭ مالىمدەۋىنشە, ەكىنشى ماسەلە فاكتورينگتىك وپەراتسيالارعا قاتىستى بولدى. قازاقستاننىڭ قارجىگەرلەر قاۋىمداستىعى كوتەرگەن باستاماعا سايكەس, فاكتورينگتى قوسىلعان قۇن سالىعىنان (ققس) بوساتۋ ۇسىنىلدى. بۇعان دەيىن سالىق كودەكسىنىڭ الدىڭعى رەداكتسياسىندا مۇنداي وپەراتسيالار ققس-تان بوساتىلعان ەدى. الايدا قولدانىستاعى نورمالاردا فاكتورينگ قارىز رەتىندە تانىلمايدى, سوندىقتان وعان كرەديتتىك وپەراتسيالارداعى جەڭىلدىكتەر قولدانىلماي وتىر.

ناتيجەسىندە, فاكتورينگتىك وپەراتسيالارعا ققس سالىنۋى قارجىلاندىرۋ قۇنىن 16%-عا ارتتىرىپ, بۇل قۇرالدىڭ تارتىمدىلىعىن تومەندەتكەن. قارجى نارىعىن رەتتەۋ جانە دامىتۋ اگەنتتىگىنىڭ مالىمەتىنشە, ەكىنشى دەڭگەيدەگى 23 بانكتىڭ تەك 4-ەۋى عانا فاكتورينگپەن اينالىسادى. اگەنتتىك توراعاسىنىڭ ورىنباسارى ولجاس قيزاتوۆ بۇل باعىتتى دامىتۋ قاجەتتىگىن اتاپ ءوتتى.

«اگەنتتىك فاكتورينگتى بيزنەستى قارجىلاندىرۋ قۇرالى رەتىندە دامىتۋدى ماقۇلدايدى جانە بۇل وپەراتسيالاردى ققس-تان بوساتۋدى ۇسىنادى», دەدى ولجاس قيزاتوۆ.

ءۇشىنشى ماسەلە – رەزيدەنت ەمەستەردىڭ باعالى قاعازدار وپەراتسيالارىنان تۇسەتىن تابىسىنا سالىق سالۋ. قازىرگى نورما بويىنشا, قازاقستان قور بيرجاسىندا باعالى قاعازداردى ساتۋ كەزىندە رەزيدەنت ەمەس جەكە تۇلعالاردىڭ تابىسى سالىقتان بوساتىلادى. بۇرىن مۇنداي جەڭىلدىك زاڭدى تۇلعالارعا دا بەرىلگەن.

جاڭا ۇسىنىسقا سايكەس, ينۆەستورلاردىڭ بارلىق ساناتى ءۇشىن تەڭ سالىق شارتتارىن قالپىنا كەلتىرۋ كوزدەلىپ وتىر. بۇل قادام نارىققا قاتىسۋشىلار سانىن ارتتىرىپ, ساۋدا-ساتتىقتىڭ وتىمدىلىگىن كۇشەيتۋگە ىقپال ەتەدى.

وتىرىس قورىتىندىسىندا اتالعان ۇسىنىستار تولىق قولداۋ تاپتى.

بلوگەرلەرگە 600 ملن تەڭگە سالىق تولەۋ مىندەتتەلدى

سونىمەن قاتار سالىق كودەكسىنىڭ 56-بابى 6-تارماعىنا ەنگىزىلەتىن تەحنيكالىق تۇزەتۋلەر قارالدى. قولدانىستاعى نورماعا سايكەس, بىرقاتار كوممۋنالدىق جانە قىزمەت كورسەتۋ ۇيىمدارى كورسەتىلگەن قىزمەتتەر تۋرالى مالىمەتتى ەسەپتى توقساننان كەيىنگى ايدىڭ 10-ىنان كەشىكتىرمەي تاپسىرۋعا مىندەتتى. الايدا بۇل تالاپ جەكە كاسىپكەرلەرگە قولدانىلماعان.

تالقىلاۋ ناتيجەسىندە اتالعان تالاپ بارلىق سالىق تولەۋشىلەرگە, سونىڭ ىشىندە جەكە كاسىپكەرلەرگە دە بىردەي قولدانىلاتىن بولادى. سونىمەن قاتار, مىندەتتى مالىمەتتەر تىزىمىنەن بىرقاتار كوممۋنالدىق قىزمەتتەر الىنىپ تاستالدى, سەبەبى بۇل دەرەكتەر مەملەكەتتىك ورگانداردىڭ اقپاراتتىق جۇيەلەرىندە بار.

مەرزىم دە وزگەرتىلدى – ەندى ەسەپ تاپسىرۋدىڭ سوڭعى كۇنى ەسەپتى توقساننان كەيىنگى ايدىڭ اقىرعى كۇنى بولىپ بەلگىلەندى. بۇل شەشىم دەرەكتەردىڭ ناقتىلىعىن ارتتىرۋعا جانە باستاپقى قۇجاتتار نەگىزىندە ساپالى ەسەپ جۇرگىزۋگە مۇمكىندىك بەرەدى.

ەلىمىزدە سالىق تۇسىمدەرى 7 تريلليون تەڭگەگە جاقىندادى