جاپونيانىڭ سولتۇستىك جانە سولتۇستىك-شىعىس ايماقتارىندا 7,7 ماگنيتۋدالى كۇشتى جەر سىلكىنىسى تىركەلدى. وسىعان بايلانىستى ەلدىڭ مەتەورولوگيالىق اگەنتتىگى تسۋنامي قاۋپى تۋرالى ەسكەرتۋ جاريالاپ, الداعى ءبىر اپتا ىشىندە تاعى دا كۇشتى دۇمپۋلەر بولۋى مۇمكىن ەكەنىن حابارلادى, دەپ جازادى Egemen.kz.
تسۋنامي تۋرالى ەسكەرتۋ حوككايدو, اوموري جانە يۆاتە پرەفەكتۋرالارىنىڭ تىنىق مۇحيتى جاعالاۋىنا جاريالانعان. ماماندار تولقىن بيىكتىگى 3 مەترگە دەيىن جەتۋى مۇمكىن ەكەنىن بولجادى. كەيىنىرەك بۇل ەسكەرتۋ قاۋىپ دەڭگەيى تومەندەتىلىپ, كەڭەس سيپاتىنداعى حابارلاماعا اۋىستىرىلدى.
يۆاتە پرەفەكتۋراسىنداعى كۋدزي پورتىندا 80 سانتيمەترلىك تسۋنامي تولقىنى تىركەلگەن.
قاۋىپتىڭ ارتۋىنا بايلانىستى بيلىك حوككايدودان باستاپ تيباعا دەيىنگى جەتى پرەفەكتۋراداعى 182 ەلدى مەكەنگە ءبىر اپتالىق ارنايى ەسكەرتۋ ەنگىزدى. بۇل جۇيە 2022 جىلدىڭ جەلتوقسانىندا ىسكە قوسىلعالى بەرى ەكىنشى رەت قولدانىلىپ وتىر.
قىتاي اۋماعىندا جەر سىلكىنىسى تىركەلدى
جەر سىلكىنىسى دۇيسەنبى كۇنى ساعات 16:52-دە تىركەلگەن. ونىڭ وشاعى 19 شاقىرىم تەرەڭدىكتە ورنالاسقان. ءدۇمپۋ كۇشى جاپوندىق 7 بالدىق شكالا بويىنشا «5+» دەڭگەيىنە جەتىپ, توكيونىڭ كەيبىر اۋداندارىندا دا سەزىلگەن.
بۇل دەڭگەيدە ادامدارعا تىرەك ۇستاماي ءجۇرۋ قيىنعا سوعادى. اوموري پرەفەكتۋراسىندا 60 جاستاعى ەر ادام باسپالداقتان قۇلاپ, اۋرۋحاناعا جەتكىزىلگەن, قازىرگى جاعدايى تۇراقتى.
اتوم ەلەكتر ستانتسيالارىندا اقاۋلار تىركەلمەگەنى حابارلاندى. اتاپ ايتقاندا, اوموري, مياگي جانە فۋكۋسيما ايماقتارىنداعى نىساندار قالىپتى رەجيمدە جۇمىس ىستەپ تۇر.
جاپونيا پرەمەر-ءمينيسترى ساناە تاكايتي تۇرعىنداردى قاۋىپسىزدىك شارالارىن ساقتاۋعا جانە بيىك جەرلەرگە ەۆاكۋاتسيالانۋعا شاقىردى.
سوڭعى مالىمەتتەر بويىنشا, حوككايدو, اوموري, يۆاتە, مياگي جانە فۋكۋسيما پرەفەكتۋرالارىنان 156 مىڭنان استام ادام ەۆاكۋاتسيالانعان.
سونىمەن قاتار توكيو مەن سين-اوموري اراسىنداعى «توحوكۋ سينكانسەن» جۇردەك پويىزىنىڭ قوزعالىسى ۋاقىتشا توقتاتىلدى.
كاسپي تەڭىزىندە ءبىر تۇندە ءۇش جەر سىلكىنىسى تىركەلدى
ايتا كەتەيىك, باستاپقىدا جەر سىلكىنىسىنىڭ ماگنيتۋداسى 7,4 دەپ باعالانعانىمەن, كەيىن ول 7,7-گە دەيىن ناقتىلاندى.