قازاقستاننىڭ حالىق جازۋشىسى, كورنەكتى اقىن ءارى قوعام قايراتكەرى مۇحتار شاحانوۆ 84 جاسىندا ومىردەن ءوتتى. قارالى حاباردان كەيىن ەل ىشىندە اقىننىڭ سوڭعى اماناتىنا قاتىستى ءتۇرلى پىكىر ايتىلىپ, ونىڭ قايدا جەرلەنەتىنى قوعام نازارىن اۋداردى, دەپ حابارلايدى Egemen.kz.
19 ءساۋىر كۇنى ومىردەن وزعان قالامگەردىڭ جارى حانشايىم شاحانوۆانىڭ الەۋمەتتىك جەلىدە تاراعان حاتىنا سايكەس, اقىننىڭ سوڭعى تىلەگى – ءوزىن ارىستان باب كەسەنەسىنىڭ ماڭىنا جەرلەۋ بولعان. الايدا كەيىن بەلگىلى بولعانداي, مۇحتار شاحانوۆ 21 ءساۋىر كۇنى الماتى قالاسىنداعى كەڭساي زيراتىنا جەرلەنەدى.
مەملەكەت باسشىسى مۇحتار شاحانوۆتىڭ وتباسىنا كوڭىل ايتۋ جەدەلحاتىن جولدادى
بۇل ماسەلەگە قاتىستى قوعامدا ءارتۇرلى كوزقاراس قالىپتاسىپ, بىرقاتار بەلسەندىلەر ءوز پىكىرىن ءبىلدىردى. وسىعان بايلانىستى مادەنيەت جانە اقپارات ءمينيسترى ايدا بالاەۆا رەسمي تۇسىنىكتەمە بەردى.
مۇحتار شاحانوۆتىڭ سوڭعى اماناتى جاريالاندى
ءمينيستردىڭ ايتۋىنشا, ارىستان باب كەسەنەسى – بۇگىندە تەك زيارات ورنى عانا ەمەس, مەملەكەت قورعاۋىنداعى تاريحي-مادەني مۇرا جانە تۋريستىك نىسان. سوندىقتان ونىڭ اۋماعىندا جاڭا زيراتتار قازۋ ورىنسىز.
«بۇگىندە ارىستان باب كەسەنەسى دە, ونى قورشاعان ەسكى قورىم دا مەملەكەتتىڭ قورعاۋىنداعى نىساندار. ءيا, بۇرىن زيارات ەتەتىن جەر بولسا, قازىر بۇل – تاريحي مۇرامىز. ارىستان باب پانتەون-زيراتى ەمەس, ول ەڭ الدىمەن ۇلكەن مادەني-رۋحاني ورتالىق, تۋريستىك باعىتقا ەنگەن تاريحي-مادەني نىسان. سوندىقتان ول جەرگە جاڭا زيراتتار قازۋ ادامي تۇرعىدان دا, ءدىني تۇرعىدان دا دۇرىس ەمەس دەپ سانايمىز», دەدى ايدا بالاەۆا azattyq-ruhy.kz سايتىنا بەرگەن پىكىرىندە.
سونىمەن قاتار مينيستر مۇحتار شاحانوۆتىڭ تۇلعا رەتىندە قالىپتاسۋىنا الماتى قالاسىنىڭ ەرەكشە ىقپال ەتكەنىن اتاپ ءوتتى. ونىڭ سوزىنشە, اقىننىڭ شىعارماشىلىق ورتاسى مەن زيالى قاۋىم شوعىرلانعان قالا – الماتى, ال كەڭساي زيراتى – كوپتەگەن كورنەكتى تۇلعالار ماڭگىلىك تىنىس تاپقان ورىن.
«اقىننىڭ ارتىنان ىزدەپ, دۇعا جاسايتىن جاماعات ۇلىلارىن كەڭسايدان تابادى. تۋىستارى دا بۇل شەشىمگە تۇسىنىستىكپەن قارايدى دەپ سەنەمىز», دەدى ۆەدومستۆو باسشىسى.
وسىلايشا, قوعامدا تالقىلانعان ماسەلەگە نۇكتە قويىلىپ, اقىننىڭ جەرلەۋ ءراسىمى بەلگىلەنگەن ءتارتىپ پەن زاڭ شەڭبەرىندە جۇزەگە اساتىنى ناقتىلاندى.
حالىق جازۋشىسى مۇحتار شاحانوۆ دۇنيەدەن ءوتتى