قوستاناي وبلىسىنىڭ قاراسۋ اۋدانىندا كىتاپقا دەگەن سۇيىسپەنشىلىكتى ومىرلىك مۇراتقا اينالدىرعان اۋلەت بار. بۇل وتباسى بىرنەشە بۋىن بويى وقۋ مادەنيەتىن ناسيحاتتاپ, اعارتۋشىلىق جولدى ۇزدىكسىز جالعاستىرىپ كەلەدى, دەپي جازادى Egemen.kz.
اتالعان ءداستۇردىڭ نەگىزىن قالاعان – زويا ياكوۆلەۆنا ميحالينا. ول تۋعان اۋىلىندا 30 جىلدان استام ۋاقىت كىتاپحاناشى بولىپ ەڭبەك ەتىپ, كىتاپ قورىن ساقتاۋمەن قاتار, مادەنيەت پەن رۋحانياتتىڭ دامۋىنا زور ۇلەس قوستى. زامانداستارى ونى ءسوز ونەرىنىڭ جاناشىرى, وقىرمان تاربيەسىنە جان-تانىمەن بەرىلگەن مامان رەتىندە بىلەدى.
بۇل يگى جولدى ونىڭ قىزى گالينا ۆاسيلەۆنا ناگورنىح جالعاستىردى. ول دا 40 جىلدان استام ۋاقىتىن كىتاپحانا ىسىنە ارناپ, وقىرمانمەن جۇمىس ىستەۋدىڭ ۇزدىك ۇلگىسىن كورسەتتى. وسىلايشا, اۋلەت ىشىندە قالىپتاسقان ءداستۇر ۇزىلمەي, جاڭا بۋىنعا جەتتى.
قازاقستاندا كىتاپ اپتالىعى باستالدى: 1 500-دەن استام ءىس-شارا وتەدى
وقۋ-اعارتۋ مينيسترلىگىنىڭ مالىمەتىنشە, بۇگىندە بۇل ساباقتاستىقتى وكتيابر مەكتەبىنىڭ باستاۋىش سىنىپ مۇعالىمى ەلەنا الەكساندروۆنا ششەكوتوۆا جالعاستىرىپ وتىر. پەداگوگ ەرەكشە ءبىلىم بەرۋدى قاجەت ەتەتىن بالالارمەن جۇمىس ىستەپ, ولاردىڭ كىتاپقا قىزىعۋشىلىعىن ارتتىرۋعا كۇش سالادى. ول بالا كەزىنەن كىتاپحاناشىلار ورتاسىندا ءوسىپ, كوپ وقىعان. 11 جاسىنان باستاپ ولەڭ جازۋعا دەن قويعانى – ونىڭ شىعارماشىلىققا جاقىندىعىن ايعاقتايدى.
وتباسىلىق ءداستۇر جاس بۋىن اراسىندا دا ءوز جالعاسىن تاۋىپ وتىر. مۇعالىمنىڭ قىزى سوفيا كىتاپحانانىڭ بەلسەندى وقىرمانى عانا ەمەس, عىلىمي ىزدەنىسكە دە بەيىم. ول «جاساندى ينتەللەكت كوزىمەن ادەبي شىعارماشىلىق. الگوريتمنەن عاجايىپ تۋى مۇمكىن بە؟» اتتى عىلىمي-تاجىريبەلىك كونفەرەنتسيادا جەڭىمپاز اتانعان.
وسىلايشا, قاراسۋ وڭىرىندەگى بۇل اۋلەت كىتاپ وقۋ مادەنيەتىن ۇلىقتاپ, رۋحاني قۇندىلىقتاردى ۇرپاق ساناسىنا ءسىڭىرۋدىڭ جارقىن ۇلگىسىن كورسەتىپ وتىر.
استانادا حالىقارالىق كىتاپ جارمەڭكەسى وتەدى