جۇمىس جۇيەلى جۇرگىزىلۋدە
ماڭعىستاۋ وبلىستىق كوممۋنيكاتسيالار قىزمەتى الاڭىندا وبلىس اكىمى اليك ايدارباەۆ وڭىردە «100 ناقتى قادام» ۇلت جوسپارىن ىسكە اسىرۋدىڭ ارالىق قورىتىندىلارى تۋرالى بايانداما جاسادى. – اتالمىش ۇلت جوسپارى اياسىندا مەملەكەت باسشىسى بەس رەفورمانى بەكىتتى. بۇل 5 رەفورما جاھاندىق جانە ىشكى تالاپتارعا ءبىزدىڭ ۋاقىتىلى جاۋابىمىز. قويىلعان مىندەتتەردى تابىستى ورىنداۋ – قازاقستاننىڭ الەمنىڭ ەڭ قارقىندى دامىعان مەملەكەتتەرىنىڭ قاتارىنا كىرۋىنە مۇمكىندىك بەرەدى. شىن مانىندە, ۇلت جوسپارىن ءىس جۇزىندە جۇزەگە اسىرۋ الداعى 10-15 جىلعا ارنالعان اسا ماڭىزدى مىندەت بولىپ تابىلادى. وسىعان وراي, ۇلت جوسپارىنىڭ ناقتى, سىندارلى, ستراتەگيالىق ءارى تاكتيكالىق جوسپار بولۋى ءۇشىن ەلدە زاڭنامالىق جانە فۋنكتسيالىق فورماتتاعى ەڭ ۇزدىك شارالار قابىلداندى, دەپ ءسوزىن باستاعان ا.ايدارباەۆ ودان ءارى جوسپاردى ىسكە اسىرۋ بارىسىندا ماڭعىستاۋ وبلىسىندا قانداي شارالار اتقارىلعاندىعىنا توقتالدى. ايتۋىنشا, الدىمەن «كاسىبي مەملەكەتتىك اپپاراتتى قالىپتاستىرۋ» رەفورماسى اياسىنداعى 15 قادامدى قامتيتىن ءىس-شارالار «مەملەكەتتىك قىزمەت تۋرالى» جاڭا زاڭعا سايكەس جۇرگىزىلۋدە. جاڭا جىلدان باستاپ, مەملەكەتتىك قىزمەتكە ءبىرىنشى رەت ورنالاسقان ازاماتتار ءوز ەڭبەك جولىن تومەنگى لاۋازىمداردان باستايدى. اكىمدىكتەر مەن بارلىق دەڭگەيدەگى باسقارمالارداعى مەملەكەتتىك قىزمەتكەرلەردىڭ كاسىبي جانە جەكە بىلىكتىلىگىن ارتتىرۋ ماقساتىندا, «مەملەكەتتىك قىزمەتتەگى مەنەدجمەنت» اتتى ماگيسترلىك ءبىلىم بەرۋ باعدارلاماسى ىسكە قوسىلعان. 2015 جىلى 37 ادام وقۋدان وتسە, اعىمداعى جىلى وبلىستىڭ بارلىق اۋداندارى مەن قالالارىنان جۇزگە جۋىق قىزمەتشى وقىپ جاتىر. سىبايلاس جەمقورلىقتىڭ الدىن الۋ جانە ونى بولدىرماۋدى باسىم باعىتى ەتكەن جاڭا «سىبايلاس جەمقورلىققا قارسى ءىس-قيمىل تۋرالى» زاڭنىڭ قولدانىسقا ەنگىزىلۋىنە بايلانىستى, جەردى پايدالانۋدى جانە قورعاۋدى باقىلايتىن جەر قاتىناستارى باسقارماسىنىڭ قىزمەتىنە, جولاۋشىلار كولىگى جانە اۆتوموبيل جولدارىنا, «جەر رەسۋرستارىنىڭ عىلىمي-وندىرىستىك ورتالىعى» رەسپۋبليكالىق مەكەمەسىنىڭ فيليالىنا وبلىستىق مەملەكەتتىك قىزمەت ىستەرى جونىندەگى جانە جەمقورلىققا قارسى ءىس-قيمىل دەپارتامەنتى جەمقورلىق قاۋپىنە سىرتقى سارالاۋ جۇرگىزگەن. باياندامادا «100 ناقتى قادامنىڭ» «زاڭنىڭ ۇستەمدىگىن قامتاماسىز ەتۋ» باعىتىنداعى 17-قادامىنا قاتىستى قولعا الىنعان شارالار تۋرالى ايتىلدى. نەگىزگى مىندەتى سوتتاردىڭ ەسەپ بەرۋىن كۇشەيتۋ بولىپ تابىلاتىن باعىتتا ءوڭىر سوتتارى ءۇش دەڭگەيلى سوت جۇيەسىنە ءوتۋدىڭ دايىندىقتارىن جانە جاڭا كاسىبي بىلىكتىلىك تالاپتارىنا سايكەس كەلەتىن سوت قىزمەتىنە كانديداتتاردى قاراپ, ىرىكتەۋ جۇمىستارىن وتكىزۋدە. ماڭعىستاۋ وبلىسىندا ينۆەستيتسيالىق تارتىمدىلىقتى جانە ينۆەستيتسيا تارتۋداعى زاڭدىلىقتاردى قورعاۋعا, كاسىپكەرلىككە تارتىمدى سيپات بەرىپ, داۋلى ماسەلەلەر تۋىنداي قالعان جاعدايدا ينۆەستورلاردىڭ قازاقستاندىق سوت جۇيەسىنە دەگەن سەنىمىن ارتتىرۋ ءۇشىن جەكە سوت ءجۇرگىزۋ ورتالىعى قۇرىلماق. سونداي-اق, بيىل وبلىستىڭ بارلىق اۋدان, قالالارىندا قۇقىقبۇزۋشىلىقتىڭ الدىن الۋ, قوعامدىق ءتارتىپتى قاداعالاۋ جانە جول قاۋىپسىزدىگىن قامتاماسىز ەتۋ قىزمەتتەرىن نەگىزگى مىندەتى ەتكەن جەرگىلىكتى پوليتسيا قىزمەتى قۇرىلدى. بۇل ساپتا قازىرگى تاڭدا 1000-نان استام قىزمەتكەر ەڭبەك ەتۋدە. ا.ايدارباەۆ 35-84-ءشى قادامداردى قامتيتىن «يندۋستريالاندىرۋ جانە ەكونوميكالىق ءوسىم» اتتى ءۇشىنشى رەفورما اياسىندا اتقارىلىپ جاتقان جۇمىستاردى تانىستىردى. وڭىردە اۋىلشارۋاشىلىق جەرلەرىن جەكەمەنشىككە بەرۋ ءۇشىن دايىندىق جۇمىستارى ءجۇرگىزىلىپ, پايدالانىلماي جاتقان اۋىلشارۋاشىلىق جەرلەرىنە تۇگەندەۋ جۇرگىزىلگەن. قۇرىلىس سالاسىنا كوڭىل ءبولىنىپ, ارحيتەكتۋرالىق-جوسپارلاۋ جانە ەسكيزدىك جوبالاۋ مەرزىمدەرى قىسقارتىلماق. وڭىردە م ۇلىكتى جاريالاۋ جۇمىستارى قارقىندى ءجۇرۋدە. 2016 جىلدىڭ 1 ساۋىرىنە دەيىن ماڭعىستاۋ وبلىسىنىڭ تۇرعىندارىنان 635 ءوتىنىش تۇسكەن. ماڭعىستاۋ وبلىسىنىڭ ينۆەستيتسيالىق كليماتىن جاقسارتۋ ءۇشىن جۋىردا «كاسىپكەرلەرگە قىزمەت كورسەتۋ ورتالىعى» جشس قۇرىلىپ, ينۆەستورلاردى قولداۋدىڭ بىرىڭعاي ورتالىعى اشىلدى. بۇگىنگى تاڭدا وبلىستا شەتەلدىك ينۆەستورلاردىڭ, مىسالى, قىتايلىق CPTDC كومپانياسىنىڭ قاتىسۋىمەن «مۇناي-گاز جابدىقتارىن دايىنداۋ وندىرىستىك بازاسىنىڭ قۇرىلىسى», يتاليالىق «ENI» كومپانياسىنىڭ قاتىسۋىمەن قۇرىقتا «كەمە قۇرىلىسى جانە كەمە جوندەۋ زاۋىتى قۇرىلىسى» سالىنۋدا. ماڭعىستاۋ وبلىسىن قازاقستاننىڭ وڭتۇستىك-باتىسىنداعى ايماقتىق حابقا اينالدىرۋ ماقساتىندا «نۇرلى جول» باعدارلاماسى اياسىندا ينفراقۇرىلىمدىق جوبالار قاتارى جۇزەگە اسىرىلۋدا. بۇلاردىڭ قاتارىندا قۇرىق پورتىنداعى پاروم كەشەنى قۇرىلىسى, «شەتپە-بەينەۋ» جانە «شەتپە-جەتىباي-اقتاۋ» اۆتوكولىك جولدارىنىڭ قۇرىلىستارىن ايتۋعا بولادى. مۋلتيمودالدى كولىك ءدالىزىن قۇرۋ اياسىندا «اقتاۋ تەڭىز پورتى» ارنايى ەكونوميكالىق ايماعىنان 40 گا جەرگە كولىك-لوگيستيكالىق ورتالىق قۇرىلىسىن سالۋ جوسپارلانعان. قازىرگى تاڭدا الەۋەتتى شەتەلدىك جانە وتاندىق ينۆەستورلارمەن ايماققا قاجەتتى جوبالارعا قاتىسۋ ءۇشىن كەلىسسوزدەر جۇرگىزىلۋدە. بۇل باعىتتا قازىردىڭ وزىندە «اقتاۋ تەڭىز پورتىن سولتۇستىك باعىتتا كەڭەيتۋ» جانە «ازەرسۋن ءوندىرىس جانە لوگيستيكالىق ورتالىعى» ءارتۇرلى جۇكتەردى ساقتاۋ تەرمينالى» جوبالارى جۇزەگە اسىرىلدى, دەدى ول. يندۋستريالاندىرۋدىڭ ەكىنشى بەسجىلدىعى اياسىندا بيىل وبلىستا جالپى ينۆەستيتسيالىق قۇنى 73 ملرد. تەڭگەنى قۇراپ, 1,5 مىڭ ادامدى جۇمىسپەن قامتيتىن 10 جوبانى ىسكە اسىرۋ كوزدەلگەن. ىشكى ءتۋريزمدى دامىتۋ ءۇشىن جەڭىلدەتىلگەن نەسيەلەندىرۋ جۇمىستارى جۇرۋدە, «دامۋ» قورىمەن بىرلەسىپ اتقارىلاتىن جۇمىستا تۋريزم نىساندارىن, مارشرۋتتارىن دامىتۋ ءۇشىن قازاقستاندىق كاسىپكەرلەرگە 900 ملن. تەڭگە قاراجات بولىنبەك. سونداي-اق, ا.ايدارباەۆ دامۋدىڭ انىقتالعان باسىم باعىتتارى ارقىلى ايماقتىڭ تۇراقتى الەۋمەتتىك-ەكونوميكالىق دامۋىن قامتاماسىز ەتۋمەن اينالىساتىن جانە ءوڭىردىڭ كەشەندى ستراتەگيالىق جوبالارىنا قولداۋ كورسەتەتىن ماڭعىستاۋ وبلىستىق ەكونوميكالىق كەڭەسىنىڭ قۇرىلعانىن ايرىقشا اتاپ ءوتتى. كەڭەس اياسىندا باعىتتار بويىنشا وبلىس اكىمىنىڭ ورىنباسارلارى جەتەكشىلىك ەتەتىن 5 ارنايى جۇمىس توبى قۇرىلىپ, ءوز قىزمەتتەرىنە كىرىسكەن. الەۋمەتتىك جاڭعىرتۋ بويىنشا 12 جىلدىق ءبىلىم بەرۋگە ءوتۋ, نازارباەۆ ينتەللەكتۋالدىق مەكتەبى ءىس-تاجىريبەسىن وبلىس مەكتەپتەرىنە مۇعالىمدەردىڭ بىلىكتىلىگىن كوتەرۋ ارقىلى تاراتۋ, ەلىمىزدىڭ ايماقتارى بويىنشا سەرىكتەس كوللەدجدەر بازاسىندا ىسكە اسىرىلاتىن باعدارلاماعا قاتىسۋ جايلى ايتقان وبلىس اكىمى جۇمىسپەن قامتۋ, الەۋمەتتىك كومەك الاتىندار جاعدايلارىنا توقتالدى. ءساۋىر ايىنىڭ العاشقى كۇندەرىندە اتاۋلى الەۋمەتتىك كومەك كورسەتۋدىڭ جاڭا جۇيەسى اياسىندا 987 ادام تۇراتىن 182 وتباسىعا كومەك كورسەتىلگەن. «100 ناقتى قادام» ۇلت جوسپارىنداعى 4-ءشى رەفورما – «بىرتەكتىلىك پەن بىرلىك» باعىتى بويىنشا «ماڭگىلىك ەل» پاتريوتتىق شاراسى اياسىنداعى جۇمىستار بەلسەندى جۇرۋدە. «ءۇلكەن ەل – ۇلكەن وتباسى» جالپىۇلتتىق ءىس-شارالار جوسپارى مەن 2025 جىلعا دەيىنگى قازاقستان حالقى اسسامبلەياسىن دامىتۋ تۇجىرىمداماسىن وبلىستاعى بارلىق ۇلتتىق-مادەني ورتالىقتار مەن جاڭا عيماراتقا ورنالاسقان دوستىق ءۇيى جاراسىمدى جۇرگىزىپ كەلەدى. وبلىستا ەتنوستار كۇنى, دوستىق فەستيۆالدەرى, 125 عىلىمي-پراكتيكالىق كونفەرەنتسيالار مەن دوڭگەلەك ۇستەلدەر, جالپى ءبىلىم بەرەتىن مەكەمەلەردە اشىق ساباقتار وتكىزىلگەن. ماڭعىستاۋ وبلىسى اۋماعىندا 27 قوعامدىق كەلىسىم كەڭەسى, قۇرامى ەڭبەك ارداگەرلەرى, قوعامدىق پىكىر كوشباسشىلارى مەن ءماسليحاتتىڭ, جاستار مەن ازاماتتىق سەكتوردىڭ وكىلدەرىنەن قۇرالعان 227 مۇشەسى بار وتباسىنداعى توزىمدىلىك ماسەلەسىمەن شۇعىلداناتىن انالار كەڭەسى قۇرىلعان. ماڭعىستاۋ وبلىسى بويىنشا قازاقستان حالقى اسسامبلەياسى فيليالى جانىنان عىلىمي-ساراپتامالىق توپ جانە ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتى بازاسىندا «قازاقستان حالقى اسسامبلەياسى» كافەدراسى جۇمىس جاساۋدا. «ەسەپ بەرەتىن مەملەكەتتى قالىپتاستىرۋ» اتتى بەسىنشى رەفورمانىڭ دا ءوڭىر ءۇشىن ماڭىزى زور. اۋداندار مەن قالالاردىڭ اكىمدەرى ءۇشىن وڭىرلىك ەكونوميكانىڭ ءوسىمىن قامتاماسىز ەتۋ, جاڭا جۇمىس ورىندارىن قۇرۋ, ينۆەستيتسيا تارتۋ, حالىقتىڭ ءومىر ءسۇرۋ ۇزاقتىعى مەن قاۋىپسىزدىك دەڭگەيىن ارتتىرۋ بويىنشا نەگىزگى كورسەتكىشتەر مەن كريتەريلەر انىقتالدى. بارلىق كورسەتكىشتەرگە جەتۋ ءۇشىن ماڭعىستاۋ وبلىسى اكىمىنىڭ 2016 جىلعا ارنالعان مەموراندۋمى جاسالدى. جاڭا فورماتتى ەسەپكە الا وتىرىپ, ماڭعىستاۋ وبلىسى دامۋىنىڭ 2016-2020 جىلدارعا ارنالعان باعدارلاماسى بەكىتىلدى. «مەملەكەتتىك اۋديت جانە قارجىلىق باقىلاۋ تۋرالى» زاڭعا سايكەس وبلىس اكىمى اپپاراتىنىڭ جانىنان ىشكى اۋديت قىزمەتى قۇرىلدى. بارلىق دەڭگەيدەگى مەملەكەتتىك باسقارۋدا ازاماتتىق قوعامداستىق پەن مەملەكەتتىك قۇرىلىمدار وكىلدەرىنىڭ قاتارىنان قۇرىلعان قوعامدىق كەڭەستەر اشىلدى. كەڭەستەر جانىنان الەۋمەتتىك جانە ەكونوميكالىق ماسەلەلەر بويىنشا ەكى جۇمىس كوميسسياسى قۇرىلدى. بۇل – اتقارۋشى بيلىك ورگاندارىنىڭ اشىقتىعى مەن قوعام الدىندا ەسەپ بەرۋى جولىنداعى ۇلكەن قادام. ءماسليحاتتار مەن اكىمدىكتەردىڭ جەرگىلىكتى پروبلەمالاردى شەشۋدەگى الەۋەتىن ارتتىرۋ, جەرگىلىكتى ءوزىن-ءوزى باسقارۋدى دامىتۋ تۇجىرىمداماسىنا سايكەس, ازاماتتاردىڭ بەلسەندىلىگىن ارتتىرۋ ماسەلەلەرى بويىنشا جۇمىستار ءجۇرگىزىلۋدە. وسى جۇمىسقا ازاماتتىق قوعام بەلسەندى ارالاستى. وتكەن جىلدان باستاپ بارلىق دەڭگەيدەگى اكىمدەر مەن مەملەكەتتىك ورگاندار باسشىلارىنىڭ وڭىرلىك ورتالىق كوممۋنيكاتسيالار قىزمەتىنىڭ الاڭىندا كوپشىلىك الدىندا تۇراقتى ەسەپ بەرۋى قولعا الىندى. بارلىق بۇقارالىق اقپارات قۇرالدارىندا, ينتەرنەت كەڭىستىكتە 5 ينستيتۋتتىق رەفورمانى, سونداي-اق, قازاقستاندىق بىرتۇتاستىق يدەياسىن ىسكە اسىرۋ بارىسىنا اقپاراتتىق قولداۋ كورسەتىلدى. ءوڭىر تۇرعىندارىنىڭ اراسىندا اۋقىمدى اقپاراتتىق-ءتۇسىندىرۋ جۇمىستارى جۇرگىزىلۋدە, دەگەن ا.ايدارباەۆ ءسوزىن ۇلت جوسپارىنىڭ ماڭىزى زور, مۇندا ءبىزدىڭ ورتا جانە ۇزاق مەرزىمدى كەزەڭگە ارنالعان دامۋىمىزدىڭ نەگىزى سالىنعان. شىن مانىندە, بارلىعىمىز ءۇشىن ۇلت جوسپارى – الەمدىك ەكونوميكالىق داعدارىستىڭ تولقىندى تەڭىزىندەگى باعدار-باعىتىمىز. جوسپاردى ىسكە اسىرۋ – بۇل جالپى ءبىرىنشى كەزەكتەگى مىندەت قانا ەمەس, ول – كوماندالىق رۋح پەن قوعامنىڭ بارلىق ۇيىمدارىنىڭ بىرلىگىن كورسەتۋ. قازاقستان سىندى الىپ كەمەنىڭ ءوز جولى, سول جولدا اداستىرماي جەتكىزەتىن ەلباسى بار. «كەمەدەگىنىڭ جانى ءبىر» دەمەكشى, ورتاق مىندەتىمىز – بەرىلگەن باعدار مەن قارقىننان تايماي, بار كۇش-جىگەرىمىزدى بىرىكتىرىپ, كەمەمىزدىڭ تۇراقتىلىعى مەن جىلدامدىعىن ارتتىرۋ», دەپ قورىتتى.«جاڭا سەرپىن» – جاستار جوباسى
ماڭعىستاۋ وبلىسىندا ەكى جىل بۇرىن جۇمىسسىز جاستارعا قولداۋ كورسەتۋ, ەڭبەك رىنوگىنداعى شيەلەنىستى تومەندەتۋ جانە حالىقتىڭ جۇمىسپەن قامتىلۋىنا ىقپال ەتۋ ماقساتىندا 2014-2020 جىلدارعا ارنالعان ءىس-شارالار جوسپارى اياسىندا «جاڭا سەرپىن» باعدارلاماسى جاساقتالدى. باعدارلامانى جۇزەگە اسىرۋشى ورىن رەتىندە «جاڭا سەرپىن» ورتالىعى» كوممۋنالدىق مەملەكەتتىك مەكەمەسى قۇرىلدى. جۇمىسسىز ازاماتتاردى, وقۋشى جاستاردى كاسىبي باعدارلاۋ, كاسىبي دياگنوستيكادان وتكىزۋ, جۇمىسسىزدار ءۇشىن كەڭەس بەرۋ قىزمەتتەرىنىڭ اقپارات الاڭدارىن قالىپتاستىرۋ, ازاماتتاردى جۇمىسپەن قامتۋ جونىندەگى مەملەكەتتىك باعدارلامالارعا قاتىسۋ ماسەلەسى جونىندە حاباردار ەتۋ, جۇمىسسىز حالىق ءۇشىن كاسىبي دايارلىقتى, قايتا دايارلاۋدى جانە بىلىكتىلىگىن ارتتىرۋدى ۇيىمداستىرۋ, جۇمىسپەن قامتۋعا جاردەمدەسۋ جونىندەگى مەملەكەتتىك باعدارلامالاردى ىسكە اسىرۋ تەتىكتەرى مەن قۇرالدارى تۋرالى جۇمىس بەرۋشىلەرگە كەڭەس بەرۋ, جۇمىس ورىندارىن قۇرۋعا بولجام جاساۋ, بوس جۇمىس ورىندارىنا مونيتورينگ جۇرگىزۋ, جۇمىس كۇشى شامادان تىس ەلدى مەكەندەردەن ەڭبەك رەسۋرستارىنىڭ ۇتقىرلىعىن ارتتىرۋعا جاردەمدەسۋ شارالارىن ىسكە اسىرۋ, وقىتۋ باعدارلامالارىمەن قامتىلعان جانە وبلىستىڭ ەڭبەك كۇشى شامادان تىس ەلدى مەكەندەرىنەن جۇمىسقا ورنالاستىرىلعان جۇمىسسىزداردى جاتاقحانالارعا ۋاقىتشا ورنالاستىرۋ جانە جۇمىسسىزدارعا قىزمەت كورسەتۋ ۇتقىر ورتالىعى قىزمەتتەرىن كورسەتۋ سىندى ءبىرنەشە مىندەتتەردى موينىنا العان مەكەمە وتكەن جىلى تولىقتاي قۇرىلۋ, قالىپتاسۋ, وزدەرىنىڭ ىشكى-سىرتقى ءمىندەتتەرىن وزگەلەرگە تانىتۋ باعىتىندا جۇمىستاندى. قازىرگى تاڭدا تانىستىرۋدىڭ ناتيجەسىندە «اقتاۋتەڭىزپورتى» ارنايى ەكونوميكالىق ايماعىندا ورنالاسقان بىرقاتار كاسىپورىنداردان ورتالىققا كادرلار دايىنداۋعا سۇرانىستار كەلىپ تۇسۋدە ەكەن. «جاڭا سەرپىن» ورتالىعى باسشىلىعىنىڭ ايتۋىنشا, «اقتاۋتەڭىزپورتى» ارنايى ەكونوميكالىق ايماعىندا ورنالاسقان 14 كاسىپورىنمەن جەرگىلىكتى حالىقتى جۇمىسپەن قامتۋ جانە بىلىكتى كادرلار دايىنداۋ جونىندەگى ءۇش جاقتى ءوزارا ىنتىماقتاستىق مەموراندۋمى جاسالعان. اتالمىش مەموراندۋم اياسىندا 2016 جىلدىڭ العاشقى ايلارىنان باستاپ ارنايى ەكونوميكالىق ايماقتاعى 6 كاسىپورىننان 80 مامان دايىنداپ بەرۋگە سۇرانىس تۇسكەن. مىسالى, «ازەرسۋن» ءوندىرىس جانە لوگيستيكالىق ورتالىعى – 5, اسفالت-بيتۋم ءوندىرۋشى «كاسپيتاسجولى» جشس – 5, پلاستيك قۇبىرلار ءوندىرۋشى «كاسپيوپلاست» جشس – 9, قۇرىلىس ماتەريالدارىن ءوندىرۋمەن اينالىساتىن «اقتاۋكەرامزيت» – 10, «اقتاۋتەڭىزسولتۇستىكتەرمينالى» كاسىپورنى – 20, «قازازوت» جشس 20 مامانعا سۇرانىس بەرسە, وزگە دە قۇرىلىس كومپانيالارى وزدەرىنە قاجەتتى 11 مامانعا ورتالىق ارقىلى قول جەتكىزۋگە ۇسىنىس ءبىلدىرىپتى. كومپانيالاردىڭ باسىم كوپشىلىگى ءوز ىسىنە جەتىك, جۇمىسىنا تياناقتى, كاسىبي جۇمىسشى ماماندارىن دايىنداۋعا سۇرانىس بەرسە, ەندى بىرەۋلەرى جوعارى بىلىكتى ينجەنەرلەر مەن ورتا دەڭگەيدەگى ءتۇرلى سالانىڭ وپەراتورلارىنا تاپسىرىس تۇسىرەدى ەكەن. جەرگىلىكتى جەردە كومپانيالاردى مامانمەن قامتاماسىز ەتىپ, جۇمىسسىز جاستاردىڭ «ەكى قولعا – ءبىر كۇرەك» تابۋىنا ىقپال ەتىپ وتىرعان «جاڭا سەرپىن» باعدارلاماسىنىڭ تاعى ءبىر ەرەكشەلىگى – جەرگىلىكتى جۇمىسشى مامانداردى جوعارى كاسىبي دەڭگەيدە دايىنداۋ ءۇشىن شەتەلدىڭ وزىق وقىتۋ ورتالىقتارىندا قىسقا مەرزىمدە ءبىلىم الۋعا جاعداي تۋعىزۋ جانە وقۋ شىعىنى مەن الەۋمەتتىك پاكەتپەن 100 پايىز قامتاماسىز ەتۋ. بۇل باعىتتا ەۋروپانىڭ وقۋ ورتالىقتارىمەن كەلىسسوزدەر جۇرگىزىلىپ جاتىر. قازىردىڭ وزىندە 9 ازامات رەسەيدىڭ سانكت-پەتەربۋرگ قالاسىنداعى زاۋىت جانىنان قۇرىلعان وقۋ ورتالىعىنىڭ ماماندارىن شاقىرتۋ ارقىلى اقتاۋ قالاسىندا وقۋدى باستاپ كەتكەن. جاقسى ءىستى جالعاستىرىپ, مامىر ايىندا 20 ادامدى رەسەيدىڭ سانكت-پەتەربۋرگ قالاسىندا, 9 ادامدى تۇمەن قالاسىنداعى زاۋىتتا جانە 20 ادامدى اتىراۋ قالاسىنداعى «ارەس-پەتروتەحنيك» كوللەدجىندە وقىتۋ كوزدەلگەن. وقۋلارىن اياقتاعان 5 مامان «ازەرسۋن» كومپانياسىنا, 3 مامان «كاسپيتاسجولى» جشس-عا جۇمىسقا ورنالاسىپ ۇلگەرگەن. باعدارلاما اياسىندا جۇمىسقا ورنالاسىپ, وقۋعا جىبەرىلەتىن نەگىزىنەن اۋىل تۇرعىندارى ەكەن. سول سەبەپتى «جاڭا سەرپىن» ورتالىعىندا جۇمىسپەن جانە كاسىپتىك وقۋمەن قامتىلعان جۇمىسسىز ازاماتتارعا ارنالعان 120 ورىندىق جاتاقحانا دا بار. كەلەشەكتە جاتاقحانانىڭ ءبىرىنشى قاباتىندا مۇمكىندىگى شەكتەۋلى ازاماتتارعا ارناپ ەڭبەككە باۋلۋ, ولاردى قوعامدىق ومىرگە ارالاستىرۋ, بەيىمدەۋ جوبالارىن جۇزەگە اسىرۋ جوسپارلانعان. ماماندار دايىنداۋدى جۇمىس بەرۋشىنىڭ سۇرانىسى نەگىزىندە جۇزەگە اسىراتىن ورتالىقتا وقۋ مەرزىمى 1 ايدان 1 جىل ارالىعىندا ءجۇرگىزىلەدى, ياعني بىلىكتىلىكتى ارتتىرۋ ءۇشىن 3 ايدان جوعارى ەمەس ۋاقىت وتكىزسە, قايتا دايارلاۋ ءۇشىن 6 ايدان جوعارى ەمەس, ال كاسىبي وقىتۋ 1 جىلدان جوعارى ەمەس مەرزىمگە بەلگىلەنگەن. جىل باسىنان كەلىپ تۇسكەن سۇرانىستارعا وراي باعدارلاما ارقىلى تۇگەلگە جۋىعى اۋىل تۇرعىندارىنان تۇراتىن 105 ادام تۇراقتى جۇمىسقا ورنالاسقان. مەملەكەت باسشىسى ۇسىنعان «100 ناقتى قادام» ۇلت جوسپارىندا «يندۋستريالاندىرۋ جانە ەكونوميكالىق ءوسىم» رەفورماسى نەگىزگى باسىمدىقتاردىڭ ءبىرى دەسەك, «جاڭا سەرپىن» جوباسى اتالعان باعىتتى جۇزەگە اسىرۋعا ءوز ۇلەسىن قوسىپ كەلەدى. بەتتى دايىنداعان «ەگەمەن قازاقستان» گازەتىنىڭ ماڭعىستاۋ وبلىسىنداعى مەنشىكتى ءتىلشىسى گۇلايىم شىنتەمىرقىزى