قورعانىس ءمينيسترى يمانعالي تاسماعامبەتوۆ سارىشاعان پوليگونىندا ءوتىپ جاتقان «جاردەم-2016» ارنايى وقۋ-جاتتىعۋىنا قاتىستى. قورعانىس ۆەدومستۆوسىنىڭ باسشىسى اسكەري قىزمەتشىلەردىڭ ءىس-قيمىلدارىن باقىلاپ, جەكە قۇرامنىڭ كاسىبي دايارلىعىن باعالادى.
اتالعان وقۋ-جاتتىعۋ وزگە وقۋ-جاتتىعۋلاردان ماڭىزى جاعىنان تۇبەگەيلى ەرەكشەلەنەدى ءجانە ايرىقشا باعىتقا يە. ونىڭ شەڭبەرىندە اسكەري قىزمەتشىلەر توتەنشە جاعدايلار كەزىندەگى اپات سالدارىن جويۋ جۇمىستارىن جۇرگىزەدى. سەبەبى, سارىشاعان پوليگونىنىڭ اۋدانى مەن وسى پوليگوننىڭ اكىمشىلىك ورتالىعى – پريوزەرسك جابىق قالاسىندا ۇزاق ۋاقىت بويى پايدالانىلماعان عيماراتتار مەن قۇرىلىستار ورنالاسقان. ولار قيراعان, جوندەۋگە جانە ءارى قاراي پايدالانۋعا كەلمەيدى. وقۋ-جاتتىعۋدىڭ ازىرلەمەسىنە سايكەس بەلگىلەنگەن اۋماقتا ورنالاسقان بىرقاتار عيماراتتار مەن قۇرىلىستار مينالاپ تاستالدى. ودان كەيىن ەرەجەلەرگە سايكەس ماماندار قۇرىلىستاردى جاردى. ال اسكەري بولىمشەلەر عيماراتتاردى بولشەكتەۋدى, سونداي-اق, اۋماقتى تازارتىپ, پايدالانۋعا بەرۋ ءمۇمكىندىگىن جۇرگىزەدى.
وسىلايشا, پراكتيكالىق ساباقتار بولىمشەلەردىڭ جەكە قۇرامىنىڭ, ونىڭ ىشىندە اسكەري ينجەنەرلەردىڭ داعدىسى مەن ماشىعىن جەتىلدىرۋگە مۇمكىندىك بەردى.
جالپى العاندا, «جاردەم-2016» وقۋ-جاتتىعۋىنا قاتىسۋعا 100-دەن اسا اسكەري قىزمەتشى, سونداي-اق, 10-نان استام اسكەري قوپارۋشى مامان تارتىلدى. وقۋ-جاتتىعۋعا شامامەن 100 بىرلىك ارنايى تەحنيكا, ياعني بۋلدوزەرلەر, تيەگىشتەر جانە ەكسكاۆاتورلار تارتىلدى.
دەرەكتەرگە سۇيەنسەك, وقۋ-جاتتىعۋ ۇستىمىزدەگى جىلدىڭ ءشىلدەسىنە دەيىن جالعاسادى. جالپى, ەكى جارىم اي ىشىندە اسكەري قىزمەتشىلەر 60-تان اسا عيمارات پەن قۇرىلىستى جارۋدى جوسپارلاۋدا.
«ەگەمەن-اقپارات»