ەلباسىمىزدىڭ ءۇش تۇعىرلى ءتىل تۋرالى ايتقان تۇجىرىمى ەلدىڭ كوڭىلىنەن شىعىپ, زور قولداۋعا يە بولۋدا. ارينە, ەل بولعان سوڭ تەلى مەن تەنتەگى, دۇرىس باعدارلاما ەكەندىگىن ءبىلىپ تۇرىپ باسى جەرگە جەتكەنشە ورشەلەنىپ قارسى تۇراتىن, ونبەس داۋدى قۋاتىن داۋكەس, ەلدى ادەيى اداستىرماق نيەتتەگى ادامدار دا بولادى.
ولاردىڭ دالەلى نەگىزسىز دەپ سانايمىن.
مەنىڭ ۇعىمىمدا, اعىلشىن ءتىلىن ءبىلۋ الەمنىڭ ءتىلىن ءبىلۋ دەپ تۇسىنەمىن. ءبىز سپورتشىمىز. ەلباسىمىز ۇلكەن سپورت تۋرالى تەرەڭ ماعىنالى ءسوز ايتادى. «شەتەلدە قازاقستان تۋى ەكى جاعدايدا, مەملەكەت باسشىسىنىڭ جانە حالىقارالىق سىندا جەڭىسكە جەتكەن سپورتشىنىڭ قۇرمەتى ءۇشىن كوتەرىلەدى», دەيدى.
بۇل ءبىزدىڭ جاۋاپكەرشىلىگىمىزدى ارتتىرادى, شەبەرلىگىمىزدى ۇشتايدى, جەڭىسكە جەتۋگە دەگەن قۇشتارلىعىمىزدى جىگەرلەندىرەدى. بيىل وڭتۇستىك قازاقستان وبلىسىنىڭ ريو دە جانەيرودا وتەتىن وليمپيادا جولداماسىنان قورجىنى توق. التىن جۇلدەگە تالاساتىن ۇكىلى ۇمىتتەرىمىز دە بار. سپورت ساڭلاقتارىن جىگەرلەندىرۋ, قيىن جاعدايدا سەپتەسۋ ءۇشىن حالىقارالىق جارىستارعا كوبىرەك جولىمىز ءتۇسىپ ءجۇر.
سوندا ءوز انا تىلىڭنەن بولەك, ورىس جانە اعىلشىن ءتىلى مىندەتتى تۇردە كەرەكتىگى بايقالادى.
كەشەگى وداقتاس ون بەس مەملەكەت, تاۋەلسىز مەملەكەتتەر دوستاستىعى ەلدەرىنىڭ ءبىر-بىرىمەن ۇعىنىساتىن ءتىلى – ورىس ءتىلى. تاتار ءتۇبى ءبىر تۇركى جۇرتى دەگەنىڭمەن, قاپ تاۋىنىڭ ازاماتتارىمەن, چەشەن, اۆار, قاراشاي-شەركەس نەمەسە ساحا, تىۆا تىلىندە سويلەسە المايسىڭ. سەنى ولارمەن جاقىنداستىراتىن سپورتتاعى ءتىل – ورىس ءتىلى. ورىس ءتىلىن ءبىلۋىڭنىڭ ارقاسىندا ءتۇسىنىسىپ, كوبىمەن توننىڭ ىشكى باۋىنداي جاقىنداسىپ كەتەسىڭ.
ال, اعىلشىن ءتىلىن بىلمەسەڭ, قاپقا سالعان بالىقتايسىڭ. قازىر الەمدە موڭعول سپورتشىلارىنىڭ ءباسى بولەك. ەكونوميكاسى, الەۋەتى بىزدەن تومەن دەپ ىشتەي تەڭ كورمەيتىن شىعارمىز, قىزىعى سول, سول موڭعول سپورتشىلارى اعىلشىن تىلىندە بۇلبۇلداي سايرايدى. ومىرلىك قاجەتتىلىك ەكەندىگىن مەملەكەت باسشىلارى ءبىلىپ, ول ءتىلدى بالاباقشا, مەكتەپ باعدارلاماسىنا قوسقان.
بۇكىل وركەنيەتتىڭ كىلتى اعىلشىن تىلىندەگى وقۋلىقتاردا دەسەك, بۇل ءتىلدى قازاق حالقى ءۇشىن دە جاقسى ءبىلۋدىڭ ماڭىزى زور. مەملەكەت باسشىسى نۇرسۇلتان ءابىش ۇلى نازارباەۆتىڭ قازاقتىڭ بالاسى وركەنيەت يگىلىگىنە قول سوزسىن, ءبىلىمدى جۇرتتىڭ قاتارىندا بولسىن دەگەن نيەتىن ءبارىمىز ءبىلىپ, ورىندالۋىنا اتسالىسۋىمىز كەرەك.
قازاقستانداعى بىلىكتى ۇستاز, عالىم, پسيحولوگتار حالىقارالىق اعىلشىن, ورىس تىلدەرىن بالاباقشادان باستاپ وقىتۋدىڭ ءتيىمدى ەكەندىگىن ايتادى. سەبەبى, اقىل-ويى تۇنىق, ايتقاندى لەزدە قاعىپ الاتىن بۇلدىرشىندەر ءتىلدى تەز يگەرىپ كەتەدى ەكەن.
بۇگىنگى جاستار – قابىلەتتى, الداعى بولاشاعىنا الاڭدايتىندىعىمەن ەرەكشەلەنەدى. ولار مەكتەپ, جوعارى وقۋ ورىندارىنان بولەك, اعىلشىن ءتىلىن ارنايى كۋرستاردا وقىپ, بولاشاعىنىڭ باسپالداعىن ءوز كۇشىمەن قالاپ جاتىر. ياعني, كوپ ءتىل ءبىلۋ قاجەتتىلىك, وزىڭە پايداسىنان باسقا زيانى جوق.
الىبەك نۇرتاەۆ,
وڭتۇستىك قازاقستان وبلىستىق دەنەشىنىقتىرۋ جانە سپورت
باسقارماسىنىڭ باسشىسى
شىمكەنت