وندا 2 ميلليون 800 مىڭ تەڭگە جينالدى
كوكشەتاۋداعى دوستىق ۇيىندە اقمولا وبلىستىق قازاقستان حالقى اسسامبلەياسىنىڭ جانىنداعى انالار كەڭەسى وبلىستىق اكىمدىكتىڭ قولداۋىمەن ەل تاۋەلسىزدىگىنىڭ 25 جىلدىعىنا وراي «قايىرىمدىلىق كەرۋەنى» رەسپۋبليكالىق اكتسياسى شەڭبەرىندە اۋكتسيون وتكىزدى.
ناۋقاس بالالار مەن ولاردىڭ وتباسىلارىنا كومەك كورسەتۋگە باعىتتالعان بۇل شاراعا وبلىستىق باسقارمالاردىڭ باسشىلارى, كاسىپورىنداردىڭ جەتەكشىلەرى, مەملەكەتتىك قىزمەتكەرلەر مەن كاسىپكەرلەر قاتىستى. قايىرىمدىلىق اكتسياسىنىڭ اشىلۋ راسىمىندە اقمولا وبلىسى اكىمىنىڭ ورىنباسارى نۇرلان نۇركەنوۆ كومەككە مۇقتاج جاندارعا قولۇشىن سوزۋعا نيەت بىلدىرگەن ازاماتتارعا العىسىن ءبىلدىردى.
– وبلىسىمىزدا مۇمكىندىگى شەكتەۋلى, ومىرگە قۇشتار جاندار از ەمەس. ولار قايىرىمدى ازاماتتاردىڭ كومەگىنە مۇقتاج. سونداي جاندارعا قولۇشىن بەرۋ قالىپتى نارسەگە اينالۋى كەرەك دەپ ەسەپتەيمىن. سوندا ءبىزدەر وزگەلەرگە ۇلگى بولىپ, مەيىرىمدىلىكتىڭ ءداستۇرلى تۇردە جالعاسۋىنا ۇيىتقى بولامىز, – دەدى نۇرلان جاڭبىرشى ۇلى.
بۇدان كەيىن التى كەزەڭ بويىنشا 30 لوت ويناتىلدى. مۇندا ونەرپاز دارىندى بالالارمەن جۇمىس جۇرگىزۋ جونىندەگى وبلىستىق وقۋ-ادىستەمەلىك ورتالىعى مەن «اۋلەت» مەكتەپتەن تىس جۇمىس ورتالىعى وقۋشىلارىنىڭ قولونەر بۇيىمدارى ساتىلىمعا ءتۇستى. سونداي-اق, اقمولا وبلىستىق قازاقستان حالقى اسسامبلەياسىنىڭ حالىقتىق ساندىك-قولدانبالى شىعارماشىلىق شەبەرلەرىنىڭ تۋىندىلارى قويىلعان ارنايى ساتىلىم كورمەسى ۇسىنىلدى. ساتۋدان تۇسكەن قارجى ايداربەك قاپاروۆ پەن مانسۇر قۇسايىنوۆ ەسىمدى ەكى ناۋقاس بالانى ەمدەۋگە جۇمسالماق.
اۋكتسيون قورىتىندىسىندا ارنايى كوميسسيا اقشالاي جانە شوتقا اۋدارۋ ارقىلى 2 ميلليون 800 مىڭ تەڭگەدەن استام قارجى جينالعانىن مالىمدەدى. بۇل اقشانى اقمولا وبلىستىق قازاقستان حالقى اسسامبلەياسى جانىنداعى انالار كەڭەسىنىڭ ءتورايىمى زەرە قيىقوۆا اتالعان بالالاردىڭ انالارى نۇرگۇل قۇسايىنوۆا مەن ساردال وماراليەۆاعا تابىس ەتتى.
باقبەرگەن امالبەك,
«ەگەمەن قازاقستان».
اقمولا وبلىسى.